Read Kalderash Romani Cornilescu Bible 2020 (Romania) Krisînitorea 20 Bible Online

Krisînitorea 20 - Kalderash Romani Cornilescu Bible 2020 (Romania) bible

Krisînitorea 20

¹Sal šeave le Israelohkă ankăste dă kata o Dano ji ando Beer-Šeba thai o čem le Galaadohko, thai o tidimos tidea pe sar khă korkoŕo manuši angloa Rai, ande Miçipa.

²Le šerălebară sa le poporohkă, sa le semençii le Israelohkă, avile ando tidimos le poporohko le Devllehko: sas štar šella mii manuši telal, kai ankalavenas e sabia.

³Thai le šeave le Beniaminohkă ašundine kă ankăstesas le šeave le Israelohkă ande Miçipa. Le šeave le Israelohkă phendine: „Phenen sar ta kărdili kadea došimasti buti?”

⁴Atunčeara o Levito, o rom kodola juwleako kai sas mudardi, lea o divano, thai phendea: „Arăslemas, andekhthan mîŕa phiramnitoreasa, ande Ghibea le beniaminosti, kaste ašeas pai reat oče.

⁵Le manuši andai Ghibea uštile pa mande thai dineroata o khăr ande sao sîmas. Sas le ande godi te mudarăn ma, asaine pehkă mîŕa phiramnitoreasatar, ji kana mulli.

⁶Lem mîŕa phiramnitoarea, šindem la andel kotora, save tradem le ande sal phuwea le madndimatahkă le Israelohkă; kă kărdine khă baro bikrisako thai khă pîngănimos ando Israelo.

⁷Dikta tume saoŕă, le šeave le Israelohkă; den tume duma, thai len khă phendimos koče!”

⁸Soa poporo ušti'lo sar khă korkoŕo manuši, thai phendea: „Či iekh anda amende te na jeal ka pedti çăra, thai khonikh te na amboldel pe khără.

⁹Dikta akana so kărasa la četateakă la Ghibeakă: te jeas pa late sar anklela o çîrdimoslabaxteako.

¹⁰Te las anda sal semençii le Israelohkă deši manuši andakh šell, ăkh šell andakh mia, thai khă mia anda deši mii; on te jean te roden xabenata andoa poporo, anda, koa amboldimos lengo, te kăras la četateakă Ghibeakă andoa Beneamino khă pîngărimos sar kărdea oi ando Israelo.”

¹¹Kadeadar sa le rom andoa Israelo uštile pai četatea, tidine sar khă korkoŕo manuši.

¹²Le semençii le Israelohkă tradine varesar manuši ande sal familii le Beneaminhkă, te phenen lehkă: „So ameal kadea bilajaimos kadoa kai kărdi'lo maškar tumende?

¹³Ankalaven akana avri le manušen kodolen le rimomeandai Ghibea, kaste mudaras le thai te ujaras o nasul andoa maškar le Israelohko.” Ta le Beneamiça či kambline te ašunen o mui pehkă phralengo, le šeavengo le Israelohkărăngo.

¹⁴Le Beneamiçea ankăste anda pehkă četăçi, thai tide pe ande Ghibea, kaste marăn pe le šeavença le Israelokărănça.

¹⁵O dindimos le Beneamiçăngo ankăsto ando des kodoa sas dă biši thai šou mii manuši, kai ankalavenas e sabia, bi te mai dinel pe i le manuši andai Ghibea, kai sas efta šella manuši alosarde.

¹⁶Ande sa kadoa poporo, sas efta šella manuši alosarde kai či kandenas pe le vastestar le čeačestar; sa kadala, šudenas khă baŕ la praštiasa, daštinas te otin khă firo ballehko, thai či denas avervarekai.

¹⁷Kărdi'lo o dindimos le romengo andoa Israelo, avri andoa Beneamino, thai arakhadile štar šella mii kai ankalavenas e sabia, sa murši mardimahkă.

¹⁸Thai le šeave le Israelohkă uštile, ankăste ando Betelo, thai pušline le Devlles, phendindoi: „Kon anda amende te anklel anglal te marăn pe le šeavença le Beniaminohkărănça?” O Rai dea le anglal: O Iuda te anklel anglal.”

¹⁹Le šeave le Israelohkă telearde kana pharadi'lo o des, thai arăsle ande Ghibea.

²⁰Thai le rom le Israelohkă găline angle kaste len te marăn pe le romença le Beneaminohkă, thodine pe ande linia le mardimasti angla e četatea la Ghibeati.

²¹Le šeave le Beneaminohkă ankăste andai Ghibea, ando des kodoa sovleardine kai phuw biši thai dui mii manuši andoa Israelo.

²²O poporo, le šave le Israelohkă, mušardine pe, thai thodine pe pale ande linia le mardimasti kai thodinesas pe ando des anglal.

²³Thai le šeave le Israelohkă ankăste, thai ruine angloa Rai ji reate; thai pušline le Raies, thai phendine: „Te ankleau te mara ma le šeavença mîŕă phraleskărănça le Beneaminohkă?” O Rai dea anglal: „Anklen pa leste.”

²⁴Le šeave le Israelohkă găline anglal šeave le Beneaminohkă, ando duito des.

²⁵Thai ande kodoa des, Le Beneamiça ankăste lengă anglal andai Ghibea, thai pale kovleardine kai phuw dešuoxto mii amnuši andal šeave le Israelohkă, sa kai nigrănas le arme.

²⁶Sa le šeave le Israelohkă thai soa poporo ankăste thai avile ando Betelo; ruine thai ašile oče angloa Rai, postisardine ande kodea reat ji reate, thai andine phabarimata dă sa thai jertfe naismaskă angloa Rai.

²⁷Thai le šeave le Israelohkă pušline le Raies — oče arakhadiolas pe atunčeara o chivoto le phanglimahko le Devllehko,

²⁸thai o Fineas, o šeau le Elezarohko, o šeau le Aronohko bešelas ando čiro kodoa angloa Dell, — thai phendine: „Te mai telearau koa mardimos pa le šeave mîŕă phralehkă le Beneaminohkă, or te meka ma? O Rai dea anglal: „Anklen, kă texara daua les ande tumaro vast.”

²⁹Atunčiara o Israelo thodea varesar manuši koa arakhaimos pai četatea la Ghibeati.

³⁰Le šeave le Israelohkă ankăste pal šeave le Beneaminhkă, ando trito des, thai lašarde pe ande linia le mardimasti anglai četatea Ghibea, sar i ande le kolaver des.

³¹Le šeave le Beneaminohkă ankăste angloa poporo, thai sas çîrdine dur katai četatea. Line te malaven mullimasa ando poporo, sar i ande le kolaver des, andel droma le bară, kai anklen: iekh ando Betelo thai iekh ande Ghibea andoa islazo, thai mudarde paše treanda mii anda le rom le Israelohkă.

³²Le šeave le Beneaminohkă phenenas: „Dikta le marde angla amende i sar mai anglal!” Ta le šeave le Israelohkă phenenas: „Te našas, thai te çîrdas le dur andai četatea, koa drom o baro.”

³³Sa le rom andoa Israelo mekline pehkă thana, thai širosai le mardimahkă ando Baal-Tamaro, thai le manuši le Israelohkă, kai bešenas koa arakhaimos, šude pe andal thana kai sas, andai Maare-Ghibea.

³⁴Deši mii manuši alosarde anda soa Israelo arăsline anglai četatea Ghibea. O mardimos sas zuralo, thai le Beneamiça či denas pe godi o prăpădo anda sao avena te nakhăn.

³⁵O Rai mardea le Beneaminos angloa Israelo, thai le šeave le Israelohkă mudardine ando des kodoa biši thai panji mii thai ăkh šell manuši andoa Beneamino, sa kai daštinas te nigrăn le arme.

³⁶Le šeave le Beneaminohkă pateanas kă le šeave le Israelohkă sî mardine, kă kadala kărănas than le Beneamiçăngă thai zureaonas andel manuši kai thodinesas le koa arakhadimos pai četatea la Ghibeati.

³⁷Le manuši kata o arakhaimos šudine pe iekhatar pai četatea la Ghibeati, line la angle thai nakhade sai četatea andoa skuçimos la sabiako.

³⁸Pala khă sămno kai thodinesas les le rom andoa Israelo, thai kola kai bešenas koa arakhaimos sas te avel te kărăn te vazdel pe andai četatea khă thuw thullo.

³⁹Atunčeara le šeave le Israelohkă amboldinisai'le koa mardimos. Le Beneamiçea mudardesas lengă paše treanda mii manuši, thai phenenas: „Biathadimahko, dikta le marde angla amende sar ando anglal mardimos!”

⁴⁰Ta khă tuw kalo lelas te vazdel pe atunči andai četatea. Le Beneamiçea dikhline parpale; thai dikta kă e para le iagăndi vazdelas pe anda sai četatea karing o čeri.

⁴¹Le rom le Israelohkă amboldinisai'le sas; thai le rom le Beneaminohkă darai'le, dikhlindoi o prăpădo kai avelas te arăsăle.

⁴²Dine le zăia anglal šeave le Israelohkă, thai našline po drom kai nigărăl ande pustia. Ta le kola kai avilesas line pe pala lende, thai kolen kai ankăstesas andai četatea sovlearde le kai phuw, kă atardesas le ando maškar.

⁴³Dine roata le Berneminos, našade les thai linčearde les iekhatar so kamelas te čiiol pe, ji anglai četatea e Ghibea karing o kham anklel.

⁴⁴Dešoxto mii murši peline andoa Beneamino, sa zurale.

⁴⁵Anda kukola kai dine le zăia kaste našen kating e pustia koa kotorlebaŕăbarăhko Rimon, le rom le Israelohkă xasardine panji mii manuši pel droma; line pe pala lende ji ando Ghideomo, thai mudarde anda lende dui mii.

⁴⁶Soa dindimos le Beneamiçăngo kai pele ando des kodoa sas dă biši thai panji mii manuši kai daštinas te nigrăn le arme, sa zurale.

⁴⁷Šou šella manuši sas kola kai dinesas le zăia thai našeleasas karing e pustia koa kotorlebaŕăbarăhko Rimon; oče ašile štar šon.

⁴⁸Le rom le Israelohkă amboldi'le kal šeave le Beneaminohkă, thai nakhade'le andoa skuçîmos la sabiako, katal manuši andai četatea ji kal juvindimata, thai sa so arakhline. Thodine sa kadea iag sa le četăçengă kai arakhline le ando drom.