Read Kalderash Romani Cornilescu Bible 2020 (Romania) 1 Samuelohko 7 Bible Online

1 Samuelohko 7 - Kalderash Romani Cornilescu Bible 2020 (Romania) bible

1 Samuelohko 7

¹Le manuši andoa Chirat-Ieraim avile, thai ankalade o chivoto le Raiehko; nigărde les ando khăr le Abinadabohko, po pleai, thai sfinçosarde lehkă šeaves le Eleazaros kaste arakhăl o chivoto le Raiehko.

²Naklosas dăstul čiro dă andoa des dă kana thodinesas o chivoto ando Chirat-Ieraimo. Nakhlesas biši bărši. Atunčeara soa khăr le Israelohko ruia pala o Rai.

³O Samuelo phendea sa le khărăhkă le Israelohkă: „Kana anda sa tumaro illo ambolden tume koa Rai, ankalaven anda tumaro maškar sal devla le străinea thai le Astarteele, orton tumaro illo karing o Rai, thai kanden Les dăsar Les; thai O skăpila tume andoa vast le Filistianengo.”

⁴Thai le šeave le Israelohkă ankalade anda pehko maškar le Baaluren thai le Astarteele, thai kandine dăsar le Raies.

⁵O Samuelo phendea: „Tiden sa le Israelos ande Miçipa, thai me rudiva ma le Raiehkă anda tumende.”

⁶Thai tidine pe ande Miçipa. Ankaladine pai thai šordine les angloa Rai, thai postisardine ando des kodoa, phendindoi: „Bezexardeam angloa Rai!” O Samuelo krisînilas le šeaven le Israelohkărăn ande Miçipa. O Israelo fales nasul.

⁷Le Filistenea ašundine kă le šeave le Israelohkă tidinesas pe ande Miçipa, thai le raimata le Filisteainengă ankăste poa Israelo. Koa ašundimos kadoa le šeave le Israelohkă daraile le Filisteainendar,

⁸thai phendine le Samuelohkă: „Na atărdeo te çîpis anda amende angloa Rai, amaro Dell, kaste del ame drom andoa vast le Filisteainengo.”

⁹O Samuelo lea khă bakrišoro čiučeako, thai andea les întergo sar phabarimos dă sa le Raiehkă. Çîpisardea karing o Rai andoa Israelo, thai o Rai ašundea les.

¹⁰Ta kana anelas o Samuelo o phabarimos dă sa, le Filistenea pašile kaste marăn le Israelos. O Rai trăsnisardea ando des kodoa bară ašundimasa pal Filistenea, thai thodea le po našlimos. Sas mardine angloa Israelo.

¹¹Le rom andoa Israelo ankăstine andai Miçipa, line pe pala le Filistenea, thai mardine le ji tala o Bet-karo.

¹²O Samuelo lea khă baŕ kai thodea les maškar e Miçipa thai o Šen, thai thodea lehkă o anau Eben-Ezer (Baŕ kandimahko) phendindoi: „Ji koče o Rai kandea me.”

¹³Kadeadar sas meklinetele ăl Filistenea, thai či mai aviline pel phuwea le Israelohkă. O vast le Raiehko sas bimeklimahko pal Filistenea ande soa čiro la čivavako le Samuelohko.

¹⁴Le četăçi kai linesas le ăl Filistenea katoa Israelo, amboldi'le koa Israelo, kata o Ekrono ji ando Gat, pehka phuweasa; o Israelo çîrdea le anda o vast le Filisteainengo. Thai sas împătimos maškar o Israelo thai le Amoriçea.

¹⁵O Samuelo sas krisînitorii ando Israelo soa čiro pehka čivavako.

¹⁶O jealas ande sako bărši ta kărălas o rotimos le Betelohko, le Ghilgalohko thai la Miçipako, thai krisînilas le Israelos ande sa kadala thana.

¹⁷Pala kodea amboldelas pe ande Rama, kai sas lehko khăr; thai oče krisînilas le Istraelos. Thai vazdea oče khă altari le Raiehkă.