Read Kambera DEDI 12 Bible Online

DEDI 12 - Kambera bible

DEDI 12

¹I MIRI natuu liina lai Àmbaràmu, “Dunjaku-nyawa na paraimu, da nua kalembi-mu dàngu na uma amamu, hàla lakuwa la tana na pa-paitanggu-nggau napa.

²Napa Nyungga kuwua-nggau wàla wuamu mada - dangu dàngu nyuda napa nadedi-ha banjaru bokulu. Napa ku-pakanyuru-nggau dàngu ku-wulaku-ya na tamumu hi nawuwa, hi lupa munjadi kanyuru.

³Napa Nyungga ku-pakanyuru-nya na ma-pakanyuru-nggau dàngu napa kuràtu-nya na tau maràtu-nggau. Dàngu rukumu nyumu Napa Nyungga ku-pakanyuru-nya mbuu ndàbana na banjaru la pa-nggubulu awangu,”[25] wànanya.

⁴I Àmbaràmu na ndau lurina pihu kambulu lima-naka ba jiaya na-dunjaku-nanya la Haràngu, pa-jàngapu-nya na pareta-na i MIRI lai nyuna. I Àmbaràmu nalaku la tana Kanaàngu anguda i Harai na papaha-na, dàngu i Lòtu, ana anguna paluhu, dàngu mbuu ndàbada da banda pawulu-na lupa da ata da pangala-da la Haràngu. Ba datàka-ka la Kanaàngu,

⁶i Àmbaràmu nanjada-nya na tana nuna lupa natàka la pingi ai hàri la Mori, nu na ngia pa-hamayangu la Hikimu. (La rehi nuna na tau Kanaàngu ngiangu-mana-nyapa la tana nuna.)

⁷I MIRI na-paitangu wikina lai Àmbaràmu, hi napanii-nya, “Yiana-yaka na tana na pawua-nggunya napa na wàla wuamu,” wànanya. Ka pahadangu-nanyaka i Àmbaràmu lai nu hau ngia pawotu maraku tungguna i MIRI na mambàda pa-itangu wikina lai nyuna.

⁸Hàlaka nu pangala-nanyaka na lakuna hu luru, la ngaba ma-patandulangu la pahunga loduna na paraingu Mbetilu, dàngu hi nawulu maüna la manggawa paraingu Mbetilu dàngu paraingu Aï: Na Mbetilu la patama loduya dàngu na Aï la pahunga loduya. Lai numbu nyuna na-pahadangu hau ngia pawotu maraku, hi na-maraku-nya i MIRI.

⁹Tunaka nu pangala-nanyaka na lakuna welingu la hau pa-ngiangu lupa hilu la hau pa-ngiangu, hanggangu-nanya la mbara luruna na tana Kanaàngu.

¹⁰Tàka la tana Kanaàngu talànga tunguna na rimbangu nda palàda, hi lupa nyuna i Àmbaràmu narihi marau-maipa hu luru na palaku-na, la tana Mehiru la pa-engangu lai nu lundu na-làpahu nuna na ura pàda.

¹¹La rehi ka pànggatu-ya na padira dàngu ka tamawa la tana Mehiru ba wànaka, panii-nanyaka i Harai na papaha-na, “Mu-manandangu nyumu, papaha-nggu.

¹²Jàka daita-kau tau Mehiru, papaha-nanya ni wàda-maka duda, nu ka pameti-danggaka nyungga, tàka nyumu hi damàta-nggau paluri.

¹³Jia ba tuna nahàmu-pa, eri-nangga ka wàmu bia, ka peku màta-dangga paluri dàngu ka peku kataku dàngu hàmu-dangga lumumu nyumu,” wànanya.

¹⁴Tàka tuba-mana, ba na-pànggatu-yaka na padira tana i Àmbaràmu dàngu ba natàka-ka la tana Mehiru, ita-danyaka paraï tau Mehiru i Harai ba lalu manandangu-ya.

¹⁵Ba mapira-ha da panggawi uma hanganji ba daita-yaka, lua-danyaka papanii la hanganji ba kanjupu manandangu-ya na kawini nuna; jia-duyaka hi da-karia-nya la uma hanganji.

¹⁶Lumuna i Harai ka kataku dàngu hàmu-nanyaka i Àmbaràmu paraïna hanganji, hi nawua-nya ata, kabàba mbimbi, kamàmbi, hapi, kalandai dàngu ota.

¹⁷Tàka paraï ruku piti-nanya i Harai nyuna na hanganji, i MIRI patàka-nanyaka panyaki ma-mbàringu na hanganji dàngu na tau la kuru umana.

¹⁸Ka paau-nanyaka i Àmbaràmu paraïna hanganji hi na-paàra-nya, “Nggàraya na pawunda-mu hanggangu lai nyungga? Nggikina hi ndau pekangga, ba papaha-munya nyuna?

¹⁹Nggikina eri-nggunya hi wàmungga tàka hiu pahia-ngga la papiti-ya tu papaha-nggu? Yiana-yaka na papaha-mu; piti-yawa kau laku!” wànanya.

²⁰Na hanganji nawua-nja pareta ba mapira-ha da panggawi-na, tàka nyuda hi da-pulinya palaku i Àmbaràmu, welingu la tana lai nu, dàngu na papaha-na hamanai mbuu ndàbada da manguna.