Read Kambera DEDI 13 Bible Online

DEDI 13 - Kambera bible

DEDI 13

¹I Àmbaràmu na-dunjaku-nya la Mehiru hi nalaku hanggangu hu dia, da-hanggangu la mbara luruna na tana Kanaàngu dàngu na papaha-na hamanai mbuu ndàbada da pamangu-na, dàngu i Lòtu na-tundungu-mbu.

²I Àmbaràmu la mbana wuluya; ningu mbimbina, kamàmbi-na, hapina, dàngumbu àmahu marara mabara-na.

³Ka laku-nanyaka welingu la hau pa-ngiangu lupa la hau pa-ngiangu, ba na-hanggangu la Mbetilu. Natàka la ngaba manggawa Mbetilu dàngu Aï, la pangia mahàri, la ngia pawulu-na maü

⁴dàngu ba na-pahadangu ngia pawotu maraku àmangu. Lai nu nalumu-nya i MIRI.

⁵I Lòtu ningumai duna kuru umana dàngu atana, hamanai mbimbi, kamàmbi dàngu hapi.

⁶Jia-duyaka ba tuna nu na tana lai nu, hi nda da-kadangu maràda ningu rumbangu la pangia duangu nyuda, nadu da bandada ba lalu danguda.

⁷Ka pahànggangu-danyaka da tau pawangu lai Àmbaràmu dàngu da tau pawangu lai Lòtu. (La rehi nuna da tau Kanaàngu dàngu da tau Perihu ngiangu-mada-nyapa lai nu.)

⁸I Àmbaràmu napanii-nya i Lòtu, “Nyuta yia tau ma-paangu dedingu-ta, nda nahàmu-a jàka da-pahànggangu da taumu nyumu dàngu da taunggu nyungga.

⁹Jia-duya nahàmu-pa ka ta-pahewa. Pindiwa la tana yiana jàka nggi ngabaya na pambuha-mu. Jàka ulaku hanggangu lai nu nyumu, màta nyungga ka ku-hanggangu lai nàhu,” wànanya.

¹⁰I Lòtu na-tàngaru la winggiru-na dàngu ka ita-nanyaka ba nadangu waina la nggubulu Lolangu Yorundangu lupa la paraingu Huawàru, hama tuna na Woka ngia pambawa-na i MIRI,[26] jàka ndia hama tuna na tana Mehiru. (Tuna nu na hadana ba ndedi na-pamolu-nja paraïna i MIRI da paraingu Hondumu dàngu Nggomora.)

¹¹La malamiri i Lòtu napindi niya na Lolangu Yorundangu nggubulu-na ka laku-nanyaka la pahunga lodu. Tuna nuduka ba da-pahewa nuda da tau madua.

¹²I Àmbaràmu pa-daingu-nanyaka la tana Kanaàngu, tàka i Lòtu wulu-nanyaka maüna la parai - paraingu la mondu lundu la lihina la Hondumu.

¹³Na parai Hondumu nangia-nya tau ma-kanjupu akatu dàngu njalada hanggangu lai MIRI.

¹⁴Hàlaka nu ba nalaku-ka i Lòtu, i MIRI napanii-nya i Àmbaràmu, “Welingu lai nu la ngia pa-ndolaku-mu, tàngaru pahàmu-nya mbuu ndàbana la nggi mbara bia;

¹⁵napa Nyungga kuwua-nggaunya nyumu dàngu wàla wuamu-ka nggubulu-na na tana na pangita-mu kau mangunya lundu nu - nu.

¹⁶Napa Nyungga ku-wuanggau wàla wuamu ma-kanjupu danguda, hi nda ningu haàtu mamàka padiha-ha. Hama tuna na tau ba nda namàka padiha-ya na kumburu tana, tuna numbu na wàla wuamu ba nda pamàka padiha-ya.

¹⁷Nàhu, hàlatu-yawa nggubulu-na na tana yiana, nadu ba wuanggunggau-nyaka nyumu,” wànanya.

¹⁸Hàlaka nu paleli-nanyaka na ngia pa-pamaüngu-na i Àmbaràmu hi na-engangu la lihida da pingi ai hàri ngia pa-lumungu la Màmurei lihina la Hemburungu, tàka lai nu na-pandoi hau ngia pawotu maraku tungguna i MIRI.