Read Kambera DEDI 14 Bible Online

DEDI 14 - Kambera bible

DEDI 14

¹Da hanganji tau mapatu nu: i Àmurapilu welingu la Mbambilunia, i Ariuku welingu la Elahàru, i Kendurulaomiru welingu la Elàmu dàngu i Tandialu welingu la Nggoyimu

²da-pabera dànja da lima hanganji hawiangu, nu i Mbera welingu la Hondumu, i Mbiruhia welingu la Nggomora, i Hinàpu welingu la Àtama, i Hamembiru welingu la Hamboimu, dàngu na hanganji welingu la Mbela la Huawàru ba wàda-mbunya.

³Nuda ba dalima da hanganji da-pakuhingu hi da-pauhi-nja da tanatara-da la Lolangu Hindimu, nàhu Tehiku Meti ba wàdanya.

⁴Mbàda hakambulu dàmbu ndaudaka ba na-kuaha-ha paraïna Hanganji Kendurulaomiru, tàka la ndaungu pa-hakambulu tailu wàna, patula ngganggangu-danyaka la palawa-nya nyuna.

⁵La ndaungu pa-hakambulu patu wàna, i Kendurulaomiru dàngu da angu pa-kuhingu-na mai kariangu-danyaka tanatara, hi da-pakàku-ha da tau Repayimu la Àhiterutu-Kàranaïmu da tau Huhimu la Hàmu, da tau Emimu la Hawi-Kiruyataïmu,

⁶da tau Hori la palindi Endumu, hàla hi dayaulu-ha lundu la Eli-Paràngu la halinggi maràda telangu.

⁷Hàlaka nu nyuda da ma-payaulu punjilungu-danyaka hi dabeli la Eni-Mihipàtu, nàhu la Kandihu ba wàdanya. Nyuda da-panyàku hàlaya na nggubulu tana Amaliku lupa datalu-ya na tau Amori na ma-ngiangu la Hahihungu-Tamàru.

⁸Tunaka nu da hanganji welingu la Hondumu, Nggomora, Àtama, Hamboimu dàngu Mbela wandalu-dahaka da juru tanatara-da la Lolangu Hindimu hi da-pabera

⁹dalawa-nja da hanganji welingu la Elàmu, la Nggoyimu, la Mbambilunia, dàngu Elahàru; jia ba tuna da hanganji tau malima dalawa-nja da hanganji tau mapatu.

¹⁰Na lolangu nuna nambinu wàngu humuru àpalu, màla ka tapalai welingu la ngia pa-pabera ba wàdaka da hanganji welingu la Hondumu dàngu Nggomora, ka hanjubulu-danyaka la humuru nuda. Da hanganji matailu peku tamàhiku-da nyuda hi dapalai la ma-palindingu.

¹¹Da hanganji tau mapatu da matalu dawàhi ndàbaha da maninja la Hondumu dàngu la Nggomora, hamanai da pangangu, hi damangu palaku.

¹²I Lòtu ana angu dedina i Àmbaràmu na-ngiangu lai nu la Hondumu, jia-duyaka da-tanawa-mbunya paraï muhu hamanai da banda da malanja-na.

¹³Tàka na haàtu na tau na ma-tamàhiku, laku-nanyaka pa-wàlahu ndàbaya na matumbu lai Àmbaràmu, na tau Imbarani. Nyuna i Àmbaràmu na-ngiangu la lihida da pingi ai hàri ngia pa-lumungu manguna i Màmurei, tau Amori. Nyuna i Màmurei dàngu da anguna paluhu, nu i Ehikòlu dàngu i Aniru anguna pa-pakuhingu i Àmbaràmu-ha.

¹⁴Ba narongu-ka i Àmbaràmu rukuna na ana angu dedina ba na-tanawangu, pauhi hàla-nanjaka da tau la ngia pa-pamaüngu-na, nu da mapingu pa-pabera, tau 318-ha danguda, hi dayaulu-ha da hanganji mapatu, lupa tàka la paraingu Ndàngu.

¹⁵Lai nu nyuna i Àmbaràmu na-pabiwa-nja da tauna ba pira juruda, hi handàka tarànjaku-da pa-nàhaku-ha da muhu nu la rudungu, hi datalu-ha. Dayaulu-ha lupa tàka la Homba, la mbara diana na paraingu Ndamàhiku.

¹⁶I Àmbaràmu na-ngalangu pawàhi beliha da malanja paramba-da, i Lòtumbu dàngu mbuu ndàbada da banda da malanja-na, dàngu da kawini hamanai da tanawangu hawiangu.

¹⁷Ba natalu-yaka na Hanganji Kendurulaomiru dàngu da hanganji angu pa-kuhingu-na, beli-nanyaka i Àmbaràmu. Tàka na hanganji Hondumu hi nalua pa-hàmburu-ya la lolangu Hawi, na Lolangu Hanganji ba wàda-mbunya.

¹⁸I Melikuhendiku, na hanganji Halimu, na ma-katangu-mbu Ratuna i Ala Mahupu-jangga, nangàndi roti dàngu angguru ndumana i Àmbaràmu,

¹⁹ka pa-kanyuru-nanyaka i Àmbaràmu, “Màla àru i Ala Mahupu-jangga, na mambàda padika-nya na awangu dàngu na tana, ka na-pakanyuru-nya i Àmbaràmu!

²⁰Pa-wotungu-ya i Ala Mahupu-jangga, na mambàda wuanggau talu manàra la muhumu,” wànanya. Hàlaka nu i Àmbaràmu nawua-nya i Melikuhendiku hangia la hakambulu welingu la mbuu ndàbada da malanja pa-rambangu da pangàndi belina.

²¹Hàla panii-nanyaka na hanganji Hondumu lai Àmbaràmu, “Piti-hawa da malanja pa-rambangu, na nyuna mili àru kau pabeli-nja lai nyungga mbuu ndàbada da taunggu,” wànanya.

²²Tàka nanapa-ya i Àmbaràmu, “Nyungga ku-harangu la hanggana i Miri Ala Mahupu-jangga, Ma-padikangu awangu dàngu tana,

²³ba nda jia piti-anggu duku ngga - nggàra welingu la mangumu, jiapa ka ana hawàla lulu kamba jàka ndia hakadipu liku halapa-amu ndiambu duku. Na matuna nu màta ka àmbu upanii wàngu, ‘Nyungga-a hi kiri wuluna i Àmbaràmu,’ ka àmbu wàmu wàngu.

²⁴Nda kabihu-a nyungga papiti ngga - nggàra tunggu wikinggu. Na nyuna ku-mbuhangu payema-ha jàka nggàraha da pambàda pakida da taunggu. Ba tuna da angunggu pa-pakuhingu, nu i Aniru, i Ehikòlu dàngu i Màmurei, màta ka dapiti kangeha-da,” wàna.