Read Kambera DEDI 15 Bible Online

DEDI 15 - Kambera bible

DEDI 15

¹Hàlaka nu, i Àmbaràmu na-ngalangu harii mata dàngu narongu-ya i MIRI na mapanii dànya, “Àmbu mangàdatu Àmbaràmu napa kumangga-manggau welingu la hanggàmaru, dàngu napa kuwua-nggau wunda bokulu,” wànanya.

²Tàka nanapa-ya i Àmbaràmu, “MIRI Mahupu-jangga, MIRI ndau wua-mangga duku ananggu nyungga. Napa na tau na ma-kangeha-nja da bandanggu, jia-maki-ayaka i Eliyehiru, na atanggu welingu la Ndamàhiku.[27] Jia ba tuna MIRI nggàra lingu-napa bau wuangga wundanggu?” wàna.

⁴Tunaka nu hili rongu-nanyaka i Àmbaràmu, i MIRI ba napanii dànya, “Nda na ata-amu na ma-kangeha-nja da pamangu-mu, tàka napa na anamu mini wikima,” wànanya.

⁵I MIRI na-karia-nya la hambeli i Àmbaràmu, hàla hi napanii dànya, “Tàngara-wa la awangu dàngu kau kamangu padiha-ha da kandunu; napa da wàla wuamu nyumu hama danguda nuda da kandunu,” wànanya.

⁶I Àmbaràmu nawai-maya i MIRI, dàngu jia-duyaka ba tuna nu, i MIRI hi na-kataku-ya nyuna ba tau mali hàmuya na etina.

⁷Tunaka nu i MIRI hi nahili panii dànya, “Nyungga MIRI-ka, na mambàda iru ngàndikau paluhu welingu la tana Uru la Mbambilunia, la pawua-nggaunya na tana yiana kau mangunya,” wànanya.

⁸Tàka i Àmbaràmu hi na-paàrangu, “Dou MIRI Mahupu-jangga, nggiki wànggu-aka ka kupinya na tana nuna ba mangu-nggunya?” wàna.

⁹Nahema i MIRI, “Piti-nggawa Nyungga heu hapi bai, heu kamàmbi bai dàngu heu kamàmbi bumbu, nimbihu-da tailu mbua ndauda da umuru-da, dàngumbu heu mbàra dàngu heu kulundiha,” wàna.

¹⁰Hàla piti-nanjaka i Àmbaràmu nuda da banda ndumana i Ala. Hapi, kamàmbi dàngu mbimbi, nimbihu-da nabika padua-ha, hapapa - hapapa na-wandalu papapa-nja, ba dua ndalaru-da. Tàka da ma-hawurungu nda nabika-aha.

¹¹Nuda da tolungu na-rànjaku-nja ma-hawurungu da makàli ngangu meti banda, tàka i Àmbaràmu nawàngga-ha.

¹²Ba na-pakiringu-ka patama na matalodu, katuda minjalu-nanyaka i Àmbaràmu. Hi jia tàka bia-nanya mangàdatu hàlawàla.

¹³I MIRI napanii-nya nyuna, “Namu-maya, napa da wàla wuamu danjadi tau tàka la tana tau; nyuda napa daata lai nàhu dàngu ba na-parajaku-ha lundu patu ngahu mbua ndaungu.

¹⁴Na nyuna na banjaru na ma-paata-ha da wàla wuamu napa kuhuku-nya, tàka la rehi dunjaku-danya na tana nuna da wàla wuamu, napa dangàndi banda dangu.

¹⁵Nyumu wiki napa namalai na lurimu; napa nyumu mumeti mànjaku, hi taninggau.

¹⁶Ba patu ndalihu-naka na dedida, napa da ana umbuku-mu dabeli-ha lai yiahu, nadu ba ndedi kuwàngga-aha da tau Amori, jàka ndedi datoma-ya na pa-akatu wàda na malalu làmburu-na, hi lupa huku-manjaka bàdi,” wàna.

¹⁷Ba nalua-yaka pa-rudungu, hi jia ni bianya na tuluru na makawuu dàngu na hulu na maroka, nalaku li ningu la manggawa-da da kabika tolungu.

¹⁸Nu la rehina nuna-maka i MIRI ba natura-ya na pa-njanjingu-na dàngu i Àmbaràmu. Napanii i MIRI, “Ku-panjanjingu ba wua-nggunjaka da wàla wuamu napa na tana yiana nggubulu-na, piti welingu la padira tana Mehiru lundu toma la Luku Epuràtu,

¹⁹na-hanggaungu-mbu tana tau Keni, Kenàhu, Kàtumungu,

²⁰Heti, Perihu, Repayimu,

²¹Amori, Kanaàngu, Nggiringgahi dàngu Yembuhu,” wàna.