Read Kambera DEDI 16 Bible Online

DEDI 16 - Kambera bible

DEDI 16

¹I Harai papaha-na i Àmbaràmu, ndedi-mapa na-ngalangu ana. Tàka ninya na haàtu na atana welingu la Mehiru, anakaria-ya. Hanggaru-ya na tamuna.

²I Harai napanii-nya i Àmbaràmu, “I MIRI napàtu-kaka la paningu anangu. Jia ba tuna nahàmu kau angunya na atanggu yiana. Napa hi na-ngalangu bia pa-paana-ngga ana nyungga,” wàna. I Àmbaràmu napajia-ya na patikingu-na i Harai.

³Tuna nuduka i Harai ba nawua-nya i Àmbaràmu na atana, i Hanggaru patuya kala wihina. La rehi nuna nyuna i Àmbaràmu mbàda hakambulu ndau-naka la tana Kanaàngu.

⁴Ka katuda angu-nanyaka i Hanggaru nyuna i Àmbaràmu, hi naworu ihina nuna na tau kawini. Tàka ba napi-nyaka nyuna i Hanggaru ba woru ihi-nanyaka, katadaku wàngu-nanyaka ba na-pakalana-ya i Harai.

⁵Ka panii-nanyaka i Harai lai Àmbaràmu, “Nyungga kuwua-nggaunyaka na atanggu i Hanggaru kau tuya kala wihimu, tàka kandai pinanya ba woru ihi-nanyaka, hi pa-kalàna bia-nangga nyungga. Njalamu nyumu-maya nuna.[28] Nyunaka i MIRI ka nabota-ya na palakara-nda yiana lai nyumu dàngu nyungga,” wàna.

⁶Nahema i Àmbaràmu, “Nahàmu-du, nyuna ata-mamunya dàngu ba la limamu nyumu-maduya, wàngu bia papimu nu hanggangu lai nyuna,” wànanya. Tàka i Harai nawàngu mbana etina ba na-palua-nya lima i Hanggaru hi lupa napalai.

⁷Na papalewa-na i MIRI natoma-nya i Hanggaru la lihi matawai la maràda telangu, la ànda na ma-hanggangu la maràda telangu la Huru.

⁸Napanii na papalewa, “Ha Hanggaru, atana i Harai, nggi welimu dàngu nggi luamu?” wànanya. Nahema i Hanggaru, “Palai-nggunya welingu lai Harai na ràmbunggu,” hi wàna.

⁹Napaya na papalewa, “Beliwa lai nyuna, kau lumunya,” wànanya.

¹⁰Ka hili panii-nanyaka na papalewa, “Napa Nyungga kuwua padanggau ana umbuku-mu, hi lupa nda ningu haàtu mapeku padiha-ha.

¹¹Nda namandai-apa ba pa-anangu-munyaka haàtu anakeda mini; màta Ihimailu[29] ka wàmunya na tamuna, nadu i MIRI ba narongu-yaka na hiimu.

¹²Tàka nuna na anamu napa naluri hama tuna kalandai matàmba-ya; nyuna napa nalawa hàlanya na tau, tàka na taui duna napa nalawa hàlanya nyuna. Nyuna napa naluri pa-mehangu welingu la angu dedi-naka,” wànanya.

¹³Ka paàrangu-nanyaka la etina i Hanggaru, “Tuba-manaka ihu ba kuita-ya i Ala na ma-tanara-ka?” wàna. Hi nanyura-nya ngarana i MIRI na mambàda panii dànya, “I Ala Ma-patanara,” wànanya.

¹⁴Nunaya na pakiri-na na humuru lai nu, la manggawa Kandihu dàngu Mberitu, “Humuru-na Na Maluri Na Ma-tanara-ka,” wànanya tau.

¹⁵Hàla i Hanggaru hi na-habola-nya na haàtu na anakeda mini, tàka i Àmbaràmu amana, Ihimailu, hi wànanya ba natunya tamuna.

¹⁶La rehi nuna nyuna i Àmbaràmu walu kambulu nomu mbua ndau-naka na lurina.