Read Kambera DEDI 18 Bible Online

DEDI 18 - Kambera bible

DEDI 18

¹I MIRI na-pawuwangu wikina lai Ambarahàmu la lihida da pingi ai hàri ngia pa-lumungu la Màmurei. La rehi nuna lalu mbanana na lodu, tàka i Ambarahàmu mandapu-na padua la pindu maüna.

²Ba na-wulaku-yaka na katiku-na, ita-nanjaka da tau madua haàtu da ma-ndolaku la hanggana. Ka lumbatu wàna-madua-ka i Ambarahàmu hi na-manyamalu palua pa-tàbuku-ha. Nawàngu pa-maràbaku

³ba napanii, “Miri, àmbi laku lànga-dunya na maünggu dàngu nda li pàkumi; pahia àrungga ka ku-lumunggai Miri.

⁴Màta ka kupiti wai kai baha wàngu wihimi Miri. Màlawa Miri kai hangahu pàku la lumbu ai yiana.

⁵Napa nyungga ka ku-paloku-nggai ana pangangu hakudu, ka peku hayandalu belimi kai mangu pa-pangala-nya na lakumi. Tembi-mami-nggaka nu bai wàngu pali la umanggu nyungga atami,” wànanja. Napaha nyuda, “Malangu-mu ba tuna nu na hàmumu. Li-madu-manya,” wàdanya.

⁶Ka manyamalu-nanyaka i Ambarahàmu hi natama la maü tàka hi napanii-nya i Hara, “Pa-renggangu, piti hau karungu kanguta mahàmu halawàla kau pandoi roti ka-bunggulu,” wànanya.

⁷Tunaka nu nyanyaru-nanyaka la pangia kabàba bandana, hi napindi heu ana hapi kambombu dàngu na mamàja toluna, hàla hi nawua-nya na papalewa-na, na marengga la pa-paloku-ya.

⁸Hàlaka nu i Ambarahàmu hi napiti wai huhu, ihi mbàngi huhu, dàngu tolungu pa-manahu, hàla hi na-kamahi-nja da ariyaa-na. Ba talànga nganguda nu, nyuna wikima i Ambarahàmu na ma-paloku la palumu-nja nyuda la lumbu ai nuna.

⁹Tunaka nu paàrangu-danyaka, “Ka nggiya i Hara na papaha-mu?” wàdanya. “Ni-madunya lua, daa la maü,” wàna i Ambarahàmu.

¹⁰Na haàtu welingu lai nyuda napanii, “Hiwa mbua wulangu-kiaka,[32] Nyungga napa kumai beli. Dàngu la rehi nuna i Hara na papaha-mu napa ngalangu-nanyaka haàtu anakeda mini,” wàna. La rehi nuna i Hara patingingu-na-padua la pindu maü, la kajia-da da ariyaa.

¹¹Nyuda i Ambarahàmu dàngu i Hara kaweda nàkapu-mada-nyaka, nyuna i Hara nda nahau-apa katàri.

¹²Jia-duyaka i Hara hi nariki la etina, dàngu hi napanii, “Nyungga mambàda kaweda dàngu ma-malaï tunggu yia, hilu ningu-ipa patikingu-nggu pa-papohungu dàngu leinggu? — Tàka na leinggu kaweda-madu-nanyai-ka,” wàna.

¹³Ka paàrangu-nanyaka i MIRI lai Ambarahàmu, “Nggikina i Hara hi nariki dàngu hi nandua ndandi wànya, peku-napa ihu nyungga la pa-paanangu ana la rehi kaweda-nggu? ba wàna.

¹⁴Màla ningu nu manda peku lai MIRI? Hama tuna ba mbàda wànggu kawai, hiwa mbua wulangu-kiaka napa kuhilu mai lai yiahu. Nu la rehi nuna i Hara napa pa-anangu-nanyaka haàtu anakeda mini,” wàna.

¹⁵Paraï pa-mangàdatu i Hara na-pahiningu, “Ndia-a, nda kuriki-a duku,” wàna. Nanapa-ya i MIRI, “Bau riki-madu kawai,” hi wàna.

¹⁶Hàlaka nu hadangu-danyaka da ariyaa pa-kadua haàtuda hi na-karia-nja paraïna i Ambarahàmu. Hàla tàka-danyaka la hau pangia na ngia papeku ita-danya la Hondumu.

¹⁷Napanii i MIRI la eti, “Nda ku-mbuhangu-a Nyungga pawini-nya lai Ambarahàmu jàka nggàraya napa na pa-patumbu-nggu.

¹⁸Ka nda jiaha da wàla wuana napa da madedi banjaru bokulu dàngu da ma-kuaha? Ka nda rukuna nyuna, hi ku-pakanyuru-nya napa mbuu ndàbana na banjaru la pinu tana?[33]

¹⁹Mbàda pindi-manggu-nyaka nyuna ka na-pareta-ha da anana dàngu dawàla wuana la pa-karadaku-ngga Nyungga dàngu la pawunda-ya na mahàmu dàngu na mamola. Jàka dawunda-ya nuna, ku-palundu-manya duku napa na pa-njanjingu-nggu lai Ambarahàmu,” wàna.

²⁰Na pangalangu-na napanii i MIRI lai Ambarahàmu, “Ningu mambotu pa-panjala wànya na Hondumu dàngu na Nggomora, tàka tubangu-ma ba lalu bokulu-mada da njalada.

²¹Jia-duyaka nu hi kupuru Nyungga lai nàhu, la pa-hàlatu-ya, jàka na-padeningu hi ndia mbuu ndàbana na pa-panjala wànja na parongu-nggu,” wàna.

²²Hàla da madua da ariyaa laku hanggangu-danyaka la Hondumu, tàka i MIRI ni bia-nyapa dàngu i Ambarahàmu.

²³I Ambarahàmu nalihi-nya i MIRI hi na-paàrangu, “Tuba-manaka nu MIRI patàlaru-ya ba wàmu na tau manda njala papohu-nya na tau na manjala?

²⁴Jàka era ningu tau lima kambulu manda njala la paraingu nuna, jiangu-maka MIRI bau patàlaru hàlaya nuna na paraingu? Ka ndau jàma-manyapa MIRI ka peku marada nuda da tau lima kambulu?

²⁵Màta àrunja MIRI nuda da tau da manda njala ka àmbu pameti papohu-nja dàngu da tau manjala. Màtangu MIRI! Nadu jàka uwunda-mayaka MIRI, na tau na manda njala jiangu-maka duna ba huku papohu-nya dàngu na manjala. Nggiki peku-naka na ma-patandangu ngera la pa-nggubulu awangu hi jia tu bia-nanya na manda mola!” wàna.

²⁶Napa i MIRI, “Ngera hama tuna jàka ku-hunggunggu tau lima kambulu manda njala la Hondumu, napa kujàma-nya nggubulu-na nuna paraingu lumuda nyuda,” wàna.

²⁷I Ambarahàmu hili panii-nanyai, “Jàma àrungga MIRI ba kutoru mbeni lerangu pa-panua-nya na kareuku-nggu. Nyungga duku tau-aka dàngu nda ngera-anggunya la patuu ana hau.

²⁸Tàka napa hi ningua tau patu kambulu malima na manda njala, nda lima kambulu-ada. Jiangu-maka nu MIRI bau pamolu-nya nggubulu-na nuna na paraingu ba na-pahilitu na tau malima-a?” wàna. Nanapa-ya i MIRI, “Na paraingu nuna nda pa-patàlaru-aya jàka era hunggunggu lai nu tau patu kambulu lima manda njala,” wàna.

²⁹I Ambarahàmu hilu panii-mananyai, “Ka nu jàka ningu tau patu kambulu-a?” wàna. Nahema i MIRI, “Lumuda nuda da tau patu kambulu nda ku-pangala-anyapa na pawuku-nggu,” wàna.

³⁰I Ambarahàmu napanii, “Àmbu hànggadu MIRI jàka kuhili panii. Ka nu jàka tau tailu kambulu-aya?” wàna. Nahema i MIRI, “Jàka ku-tomangu tau tailu kambulu, kumàta-nya na pawuku-nggu,” wàna.

³¹I Ambarahàmu napanii, “Jàma-kingga MIRI ba kutoru mbeni pa-panua-nya na paniinggu. Ka nu ka tau dua kambulu-aya?” wàna. Nahema i MIRI, “Jàka kuhunggu-madu tau dua kambulu, nda jia patàlaru-anggunya nuna na paraingu,” wàna.

³²Ba jiaka wàngu i Ambarahàmu napanii, “Àmbu hànggadu MIRI, panii-nggunya handàkangu-aka. Màla jàka ana hakambulu-ya na maninya?” wàna. Nanapa-ya i MIRI, “Jàka ningu tau hakambulu manda njala, nda jia patàlaru-anggunya nuna na paraingu,” wànanya.

³³Hàlaka papanii dànya i Ambarahàmu, laku-nanyaka i MIRI, tàka i Ambarahàmu beli-nanyaka la umana.