Read Kambera DEDI 19 Bible Online

DEDI 19 - Kambera bible

DEDI 19

¹Ba dahàla-ka pa-ariyaa lai Ambarahàmu, da papalewa da madua laku-danyaka la Hondumu ba datàka lai nu rudungu-nanyaka. I Lòtu mandapu-na-padua la pindu bokulu paraingu, nu ba naita-haka nyuda, hadangu-nanyaka hi nalua pa-jàmburu-ha. Ka maràbaku-nanyaka la hanggada nyuda,

²dàngu hi napanii, “Miri, màlawa kai li la umanggu. Napa kai bahaha da wihimi dàngu kai todu la umanggu. Haromu jiaya jàka wàmi kai hada mbarungu kai pangala-nya na lakumi,” wànanja. Tàka dahema nyuda, “Malangu-mu, màta bia-nggama ka matodu lai yiahu la talora paraingu,” wàda.

³I Lòtu na-kamahi pambana-ha, ka lupa tama karia-danyaka daa la umana. I Lòtu na-payema-nja pangangu mahàmu dàngu na-handara-nja roti ràka pangada, ka ngangu-danyaka.

⁴Tàka ndedi-mbupa dalua pa-katuda nuda da ariyaa, tàka-madua-danyaka da tau Hondumu ba da-nggupulu-ya na uma. Mbuu ndàbada da tau mini la paraingu nuna, ma-kaweda bidi tau ninja lai nu.

⁵Dawara-nya i Lòtu ba da-paàra-nya, “Nggi-haka da tau da mamai patodu la umamu? Puli-nggamanja, ka peku papohu damanja!” wàda.

⁶Ka luhu-nanyaka i Lòtu welingu la umana, tàka ba nahàla-ka pabita-nya na pindu,

⁷hi napanii dànja da tau Hondumu, “Ku-kamahi langatàka-nggai angudedi, màtangu àmbi tuya na ruku ma-akatu tungu nu!

⁸Patingingu, nyungga ninja da ana karia-nggu ba dadua, màta ka kuwua-nggainja dàngu ka nggiki-ndanja jàka wàmi, kai wàngu bia papimi. Na nyuna àmbi nggi - nggiki diminja da ariyaa-nggu; nadu ba tanggu-manggu-nyaka duku la pa-kahiri-ha,” wànanja.

⁹Tàka napaha da tau Hondumu lai Lòtu, “Laku! Nyumu tau tàka ka kutanggu aturu-ha wàmu-nggama? Pahiangu, lakukau! Jàka ndia napa marihi pajàra-kau nyumu welingu lai nyuda,” wàda. Hàla jukaru-madua-danyaka i Lòtu, dàngu hi da-lumbatu-nya ka ma-nàhaku-ya na pindu wàdaka làti.

¹⁰Tàka nyuda da ariyaa madua, da-pajola-nya lima, hi dayila-ya i Lòtu patama la uma, hi dabita-nya na pindu.

¹¹Da-pahambala hàlaha da tau da maninja la hambeli uma, hi lupa nda dahilu hungguya na pindu uma.

¹²Nuda da ariyaa madua dapanii-nya i Lòtu, “Jàka ningu nu anamu mini, anamu kawini, ana layia-mu jàka ndia ana kalembi-mu hawiangu da ma-ngiangu lai yiahu la paraingu, luhu karia-nja welingu lai yiahu,

¹³nadu na paraingu yiana ba pamàu-manyaka. I MIRI narongu-mahaka da ma-panjala bokulu-ya na tau na ma-ngiangu lai yiahu, dàngu nyuma paràha-na-nggamaka la pa-pamauya na paraingu Hondumu,” wàda.

¹⁴Hàla lua-nanyaka i Lòtu patoma-ha da tubada da anana da tau madua hi napanii-nja, “Parenggangu kai luhu welingu yiahu, nadu i MIRI ba pamauya yiana na paraingu wànaka,” wànanja. Tàka nyuda tangeji-nanya duna wàda bia.

¹⁵Ba pabarahu-yaka nuda da papalewa madua da-pambana-ya i Lòtu ka na-parenggangu palaku ba wàda. “Parenggangu kai laku dàngu papaha dàngu da anamu welingu yiahu, ka àmbi imeti jàka pamauya yiana na paraingu,” wàdanya.

¹⁶I Lòtu na-hondaru. Tàka i MIRI namila-nya eti; jia-duyaka da ariyaa-na da madua hi dalonda-ya i Lòtu dàngu na papaha-na hamanai da anana da madua paluhu welingu la paraingu.

¹⁷Hàlaka nu na haàtu na papalewa hi napanii, “Palaiwa, pamara-ya na lurimu! Àmbi nggilaku-du la kajia dàngu àmbi pànjangu-du la lolangu. Palaima la ma-palindingu, ka àmbu peku metimi!” wànanja.

¹⁸Tàka nahema i Lòtu, “Ai inai Miri, àmbu paràha-dunggama papalai la ma-palindingu.

¹⁹Tubangu-ma Miri, kanjupu danguya na tula-munggama dàngu bau pamara-ya na lurima. Tàka na ma-palindingu lalu mbana marauna; napa hi natoma biangga na ura pàda ka meti-yaka duna ba ndedi patàka lai nàhu.

²⁰Tàngaru, nina ni la hangga ninya na ana paraingu kudu na manda pira marauna. Pahia àrungga ka kupalai lai nu ka kumara,” wàna.

²¹Nahema na papalewa, “Hàmudu, nuna na ana paraingu nda kupamau-aya.

²²Parenggangu, palai! Nadu ba ndedi nggàra pawunda-nggu jàka ndedi mitàka lai nu,” wàna. Rukuna ba napanii i Lòtu nakudu na paraingu ba wàna, jia-duyaka hi kiri patamu-nya Huawàru[34] nuna na paraingu.

²³Hunga-nanyaka na lodu ba natàka i Lòtu la Huawàru.

²⁴Hi jia papuru bia-nanya i MIRI na urangu tana lira maningu epingu la Hondumu dàngu la Nggomora.

²⁵Nuda da paraingu ba dàmbuda pa-palàjaru-haka, hamanai nggubulu-na na lolangu lai nu dàngu lupa mbuu ndàbada da pingi ai hamanai mbuu ndàbana na tau na ma-ngiangu lai nu.

²⁶Tàka na papaha-na i Lòtu na-nggilaku la kajia, hàla ka pambeli-madua-nanyaka kanjiru mehi.

²⁷Hadangu harii, la mba - mbaru, i Ambarahàmu ri - ringana palua la ngia pa-ndolaku-na la hanggana i MIRI kangeu.

²⁸Hi na-tàngaru hanggangu la Hondumu dàngu Nggomora hamanai la nggubulu-na na lolangu, hi naita-ya na kawuu na ma-kahuluku welingu la tana lai nu, ba hama tuna na kawuu raü bokulu-ya.

²⁹Tuna nuduka ba na-pamija mauha paraïna i Ala nuda da paraingu la lolangu ngia pa-ngiangu-na i Lòtu, i Ala nanamu-ya i Ambarahàmu hi natula-nya i Lòtu papalai ka na-pamara wikina.

³⁰Ba na-mangàdatu i Lòtu pa-engangu la Huawàru, ka laku-nanyaka la ma-palindingu, kariangu dàngu da anana kawini ba dadua, ka ndàdiku-danyaka lai nu la lumbu liangu.

³¹Na anana kawini na ma-maaya napanii dànya na erina, “I Ama kaweda-nanyaka, dàngu la nggubulu tana[35] lai yiahu nda ningu haàtu mini ràka ma-kanoma-ta nyuta ka ningu ananda.

³²Màla ka tawuku-ya i ama ka na-maüku, hàla ka ta-katuda dànya, ka peku ngalangu-nda ana,” wàna.

³³La rudungu numa wua-danyaka na amada pa-unungu angguru, hàla na ma-maaya hi na-katuda dànya na amana; tàka na amana maüku halawàla-mananya, hi lupa nda ana pinanya jàka nggàraya na manjadi.

³⁴Hadangu harii, na ana ma-maaya dehi napanii-nya na erina, “Kamodu nyungga ku-katuda dànyaka i Ama! Tai la rudungu ka tahili wukuya ka na-maüku-ki, hàla nyumu kau katuda dànya. Napa nyuta ka maràngga ningu ananda,” wàna.

³⁵Tuna nuduka la rudungu nu hi da-pamaüku-ya i Lòtu, tàka na anana na ma-maeri hi na-katuda dànya. Nyuna i Lòtu maüku halawàla-mananya hi lupa nda ana pinanya jàka nggàraya na manjadi.

³⁶Ka woru ihi-danyaka nuda da anana i Lòtu ba dadua rukuna na ama wikida.

³⁷Na ana ma-maaya dehi na-paanangu haàtu anakeda mini, Muapu[36] wànanya na tamuna. Nyuna jia-duyaka na boku la mangilu-na na tau Muapu na maninya nàhu.

³⁸Na ana ma-maeri na-paanangu-mai haàtu anakeda mini, Mbeni-Ami,[37] wànanya na tamuna. Jia-duyaka na boku la mangilu-na na banjaru Amungu nàhu.