Read Kambera DEDI 2 Bible Online

DEDI 2 - Kambera bible

DEDI 2

¹Ka lundungu-nanyaka na ngera padika-nya mbutana na pa-nggubulu awangu-ka.

²La lodu papihu wàna mbàda palundu hàla-nanyaka i Ala na paràma-na, ka hangahu-nanyaka.

³Ka pa-kanyuru-nanyaka na lodu papihu wàna hi natuya lodu pa-kahaungu, nadu la lodu nuna hangahu-nanya i Ala ba nahàla-ka pa-palundu-nya na paràma-na.

⁴Nuna jia-duyaka na ruku padikangu pa-nggubulu awangu. Ba jiaya na wulu-nanya na pa-nggubulu awangu i MIRI Ala,

⁵ndedi ningua wini ma-kalunga dàngu ndedi ningu pa-tondungu la pinu tana, nadu i Ala ba ndedi na-papuru-nya na urangu dàngu ndedi ningu tau maràma-ya nuna na tana.

⁶Na nyuna pakiringu-nanyaka na wai pa-mahini weli dalungu dàngu hi na-mangàpahu-nya na pinu tana.

⁷Tunaka nu i MIRI Ala napiti hawutu tana hi nawulu-ya natuya haàtu tau, hàla hapui-nanyaka ngahu ma-paluri daa la kubu uruna; ka luri-nanyaka nu na tau.[5]

⁸Na pangalangu-na i MIRI Ala na-pandoi hau woka ngia pambawa la Endingu, la tuba pahunga lodu dàngu hi natuya lai nu, nu na tau na pambàda wuluna.

⁹I MIRI Ala na-patumbu-ha mbuu ndàbada da ngara pingi ai manandangu da ma-wuangu wua ai mahàmu. La padua dehina na woka ngia pambawa tumbu-nanyaka na pingi ai paluri wàngu dàngu na pingi ai papingu wàngu mahàmu dàngu ma-akatu.[6]

¹⁰Hapungu-na na luku na ma-lulungu welingu la Endingu, na ma-palanyiru-nya nuna na woka; tàka la hambeli Endingu na luku nuna na-pabiwangu hi patu mbungu kahanga-ya.

¹¹Na kawunga-na Pihungu-ya na tamuna; na luku nuna na-lulungu winggiru-nya na tana Hawila.

¹²Lai nu pangia-daka da àmahu rara ihi mbàngina dàngumbu mbii kati na manda muda la pa-ngalangu, lupa da watu mata tawuru.

¹³Na luku na padua wàna Nggihungu-ya na tamuna, na waina na-lulungu winggiru-nya na tana Kuhu.[7]

¹⁴Na luku na pa-tailu wàna Tinggirihu-ya na tamuna, na ma-lulungu la pahunga loduna na Ahuru. Na luku na papatu wàna Epuràtu-ya na tamuna.

¹⁵Tunaka nu i MIRI Ala na-bànjalu-ya nu na tau la woka ngia pambawa la Endingu ka napoka-ya dàngu ka na-tanara-ya nuna na woka.

¹⁶I Ala natuu liina la tau nuna, “Pekuna nyumu la pangaa ndàbanja da wuada da pingi aika la woka yiana,

¹⁷hinggilu-na welingu la pingi ai papingu wàngu mahàmu dàngu ma-akatu. Nda ukua kau nganya ra wuana; jàkau nganya, jia la metia la lodu nunama,” wànanya.

¹⁸Hàla i MIRI Ala natuu liina, “Nda nahàmu-a na tau jàka naluri pa-mehangu. Napa Nyungga ka kuwulu-nya anguna ma-jàngapu ka na-pambapa dànya,” wànaka.

¹⁹Ka piti-nanyaka tana hawutu tàka hi nawulu-ha da ngara ma - màtu banda la mamara dàngu da banda la lumbu awangu. Mbuu ndàbada nuda nangàndi-ha i Ala la tau nuna ka na-tàngaru-nja tamu patuna-nja nuda da banda. Nuya na pakiri-na hi kiri ningu tamuda nimbihu-da da banda la mamara dàngu la lumbu awangu.

²⁰Tuna nuduka na tau ba natunja tamuda mbuu ndàbada da banda la mamara dàngu la lumbu awangu. Tàka nda ana ningua la hongada ràka patuna anguna la pa-pambapa dànya.

²¹Hàla i MIRI Ala hi na-patàka-nya katuda minjalu na tau, tàka ba talànga katuda-naka nu, i MIRI Ala naàli-nya na hapungu na rii karaha-na welingu la ihina nuna na tau, hàla hi na-pandàda wànya toluna na rukuna.

²²Welingu la rii karaha nuna-duka i MIRI Ala hi nawulu haàtu kawini, hàla hi nangàndi-nya nuna na tau.

²³Ka pani-nanyaka nuna na tau, “Jia-duyaka yiana, na tau hamanggu nyungga — na rii welingu la riinggu dàngu na tolu welingu la tolunggu. Ku-patamu-nya kawini, nadu ba pa-àlingu welingu la mini[8] ya,” wàna.

²⁴Nunaya na pakiri-na na tau mini hi na-dunjaku-nja da ina da amana, ka na-kapuli niya na papaha-na, màta nyuda ba dadua ka mbulungu-ada.

²⁵Na mini dàngu na kawini da-kalulu, ba tuna nda da-pàdangu-a makia-da.