Read Kambera DEDI 20 Bible Online

DEDI 20 - Kambera bible

DEDI 20

¹I Ambarahàmu na-lelingu welingu la Màmurei hi nalaku la mbara luruna na tana Kanaàngu, hi na-paengangu lai nu la manggawa Kandihu dàngu Hiuru. Ndedi pira mandaina ba na-ngiangu la Nggeràru,

²napanii nyuna ba eri-nanya i Hara na papaha-na. Jia-duyaka na Hanganji Ambimeliku welingu la Nggeràru hi na-paràhangu tau pa-karia-nya i Hara lai nyuna.

³La hau na rudungu na-paitangu wikina i Ala la hanganji la dalu manggadipangu, ba napanii, “Meti-munyaka-napa, nadu bau pitiya nana na kawini; na mambàda ningu leingu,” wànanya.

⁴Na nyuna i Ambimeliku ndedi-apa na-jonggaru-ya i Hara, hi napanii na hanganji, “MIRI, nyungga nda kunjala-a! Màla nu MIRI mu-pamolu biangga nyungga dàngu banjaru-nggu?

⁵Ba nyunama duna i Ambarahàmu, nuna na kawini eri-nggunya ba wàna, dàngu na kawini nuna jia-mayai na paniina. Nyungga duku weli eti yahangu-manggu ba tunggu nu, jia-duya nyungga duku nda kunjala-a,” wàna.

⁶Nehama i Ala nu la manggadipangu, “Jia-maduya, kupi-manya ba weli eti yahangu-mamu ba tumu nu. Jia-duyaka nu hi ku-ndebuku hahakau ka àmbu muwunda njala hanggangu lai Nyungga, dàngu hi nda ku-pahia-nggau pa-jonggaru-ya nana na kawini.

⁷Tàka nàhu, pabeli-nyawa nyuna la mini leina. Na leina haàtu wunangu-ya, napa nyuna na-hamaya-nggau tunggumu hi nda peku metimu. Tàka jàka ndau pabeli-nya, pangàda-nya, nyumu dàngu na-rayatu-mu mbuu ndàbana napa imeti!” wànanya.

⁸Hadangu harii, la mba - mbaru, i Ambimeliku napaau hàlanja da panggawina, hi na-wàlahu hàlanja na rukuna nuna na matumbu. Ka mangàdatu halawàla-danyaka.

⁹Tunaka nu nyuna i Ambimeliku hi napaau-nya i Ambarahàmu, tàka hi na-paàra-nya, “Nggàra-yaka nu na pawunda-mu hanggangu lai nyuma? Nggàraya na njalanggu hanggangu lai nyumu, hiu kabai-nggama bau patàka-nggama ura pàda làti lai nyungga dàngu mbuu ndàbana na pa-hanganji-nggu? Langatàka nda ràka-ana ba tumungga nu nyungga.

¹⁰Nggikina hi tumu nu?” wànanya.

¹¹Nanapa-ya i Ambarahàmu, “Na pa-pangàda-nggu, lai yiahu nda ningu tau ma-mangàdatu-nya i Ala, jia napa da-pameti-kaka paraï tau mambuha-nya na papaha-nggu.

¹²Dàngumbu nyuna eri langatàka-manggunya. Nyuma haàtu ama-a-kama, tàka hau ina - hau ina-kama, la malamiri ka pa-kanoma-manyaka.

¹³Ba jia-yaka na-paràha-nangga i Ala la pa-dunjaku-nya na uma amanggu, tàka hi ma-lindingu la ta - tana tau hangàdangu, kupanii-nya na papaha-nggu, ‘Pa-itangu-wa tuturu-mu lai nyungga, bau panii la ta - tauka nyungga yia ba aya-mungga,’ ” wànggunya.

¹⁴Hàlaka nu i Ambimeliku hi na-pabeli-nya i Hara lai Ambarahàmu, dàngu la rehi nuna nyuna nawua-nja ata, mbimbi dàngu hapi.

¹⁵Nyuna na hanganji napanii-nya i Ambarahàmu, “Yiana-ya na nggubulu tananggu; pa-engangu bia la nggiya na pambuha-mu,” wànanya.

¹⁶Hàla napanii-nya i Hara, “Na ayamu kuwua-nyaka 1000 (harata) àmahu bara, màta ka mbutiya la tau mbuu ndàbana ba tuba langatàka-na ba ndau njala nyumu,” wànanya.

¹⁷I MIRI na-pawiti-nja la pambuta da kawini la kuru umana i Ambimeliku, kiringu ba tudanya nu i Hara papaha-na i Ambarahàmu. Ka hamayangu-nanyaka i Ambarahàmu lai Ala, tàka i Ala hi na-pamàlaru-ya i Ambimeliku, na papaha-na dàngu da atana kawini, hi lupa dahili woru beli.