Read Kambera DEDI 21 Bible Online

DEDI 21 - Kambera bible

DEDI 21

¹I MIRI na-pakanyuru-nya i Hara, hama tuna na pambàda njanjina.

²La rehi na pambàda kawuku-na i Ala, ba kaweda-mana-nyaka i Ambarahàmu, woru ihi-nanyaka i Hara hi na-paana-nya na haàtu na anakeda mini.

³I Ambarahàmu natunya tamuna na anana, Ihàku, wànanya;

⁴ba walu mbua lodu-naka i Ihàku, i Ambarahàmu nakàri-ya na anana, pa-jàngapu-nya na pareta-na i Ala.

⁵I Ambarahàmu mbàda 100 ndau-naka ba nadedi i Ihàku.

⁶Na paniina i Hara, “I Ala natungga pariki[38] wàngu, nadu ba nggaüru eti-nggunya. Na tauka na marongu-ya na rukuna yiana napa dariki ba da-nggaüru eti dàngga,” wàna.

⁷Nahili nuaya na paniina, “Nggamuya làti na ma-ngalangu papanii-nya na leinggu, ba ku-pahuhu ananggu napa? Ba tuna paana bia-nggunyaika nàhu, jiapa-kai ka na-làpahu na kaweda-na na leinggu,” wàna.

⁸Na anakeda nuna parukangu-nanyaka pa-matua, nu la lodu ba na-pakiringu pajàma patumbu-nanyaka remi pa-mbabungu i Ambarahàmu.

⁹La hau na lodu, i Ihimailu, anana i Ambarahàmu dàngu i Hanggaru kawini Mehiru, talànga pajulu-dànanya[39] i Ihàku, anana i Hara.[40]

¹⁰I Hara naita-ya nuna hi napanii-nya i Ambarahàmu, “Wànggaya nuna na kawini ata dàngu na anana. Nda peku-ana na anana nuna na kawini ba na-hanggaungu hawiangu welingu la pawulu-mu da pa-kangeha-na na ananggu i Ihàku,” wàna.

¹¹I Ambarahàmu nda nahàmu ndoku na etina ba narongu-ya nuna na pa-wukuna i Hara, nadu i Ihimailu ba ana-madu-nanyai duna.

¹²Tàka i Ala hi napanii-nya i Ambarahàmu, “Àmbu hondaru-du rukuna i Hanggaru na atamu dàngu na anana. Tundu-nyaka na pambuha-na i Hara, nadu ba lai Ihàku-du nyumu napa hi mu-ngalangu wàla wuamu na panjanji-nggunggau.

¹³Tuna numbu napa la anana i Hanggaru napa kuwua padanya ana umbuku-na, hi lupa nadedi hau banjaru. Nadu nyuna ba anambu-dumunya,” wànanya.

¹⁴Hadangu harii la mba - mbaru, i Ambarahàmu wua-nanyaka pangangu dàngu wai la kanai ma-nulangu bàlada nàhu la ànda. Hi na-pabuku-nya na anakeda lai Hanggaru, hàla paràha-nanyaka nuna na kawini palaku. Ka laku-nanyaka i Hanggaru, nàhu ba danjada-nya na maràda telangu la Mbiruhemba.

¹⁵Ba nanjàpu-njaka wai bàlada, bànjalu-nanyaka na anana la lumbu ai,

¹⁶hàla hi na-uhuku marau hawutu ràkangu 100 metiru welingu lai nu. Napanii daa la etina, “Nda kunoru-nya na etinggu ba kuita-ya na ananggu ba nameti,” wàna. Ka hii-nanyaka.[41]

¹⁷I Ala narongu-ya na warana i Ihimailu, dàngu welingu la awangu na papalewa-na i Ala napanii dànya i Hanggaru, “Nggàraya na pa-handuka-mu, Hanggaru? Àmbu mangàdatu-du. I Ala narongu-mayaka na warana na anamu.

¹⁸Luawa la anamu, dandanya kau pa-kahàna-nya. Napa Nyungga kutuha banjaru bokulu dawàla wuamu,” wànanya.

¹⁹Hàla i Ala na-paharii-ya na matana i Hanggaru, hi peku lohangu-na ba naita-ya na hau na humuru. Ka lua-nanyaka pa-paihi-nya wai na kanai manulangu, tunaka nu hi na-paunu-nya na anana.

²⁰I Ala karaha-mananya i Ihimailu. Nuna na anakeda paru - rukangu-mananya pa-matua; nyuna na-padaingu la maràda Paràngu, tàka hi lundu mini patamangu ma-mahiya.

²¹Na-palalei-ya paraïna inana ba napiti-nya papaha-na haàtu kawini Mehiru.

²²La rehi nuna na Hanganji Ambimeliku dàngu i Pikulu na ngora pabera tanatara-na, damai lai Ambarahàmu hi dapanii dànya, “I Ala nandula-makamu la mbuu ndàbana ngga - nggàra biaya na paula-mu.

²³Jia ba tuna, harangu-wa nàhu la hanggana i Ala lai yiahu, ba ndau kahili-ka nyungga hamangui da ananggu jàka ndia da wàla wuanggu. Hama tuna nyungga duku ba kuhàmu-nggau eti nyumu, màta ka tumu numai dumu lai nyungga dàngu la tana na ngia pa-ngiangu-mu yiana,” wàna.

²⁴Nanapa-ya i Ambarahàmu, “Ku-harangu-ma,” hi wàna.

²⁵Tàka ba tunaka nu napeka halaera i Ambarahàmu lai Ambimeliku rukuna na hau na humuru na pambàda wàhida da atana na hanganji.

²⁶Nahema i Ambimeliku, “Nyungga nda kupia-nya jàka nggamu na matuya na matuna nu. Nyumui dumu ndedi mu-handàkangu papanii-ngga, hina wàngu nu duku hi kurongu-ya na rukuna nuna,” wàna.

²⁷Hàla i Ambarahàmu hi nawua-nya hau dangu mbimbi dàngu hapi i Ambimeliku, nuda da tau madua tura-danyaka pa-njanjingu.

²⁸I Ambarahàmu na-kawàri pihu ngiu ana mbimbi welingu la kabàba mbimbina,

²⁹ka paàrangu-nanyaka i Ambimeliku, “Nggikina hiu tuya na matuna nu?” wànanya.

³⁰Nahema i Ambarahàmu, “Keihawa nida da ana mbimbi, ka tanda pajia-munya nyumu ba nyunggama duku mambàda àkiya yiana na humuru,” wànanya.

³¹Tuna nuduka la pa-ngiangu nuna la ‘Mbiruhemba’[42] hi wàdanya, nadu ba lai nudu da tau madua nuda ba da-patura pa-njanjingu.

³²Ba dahàla-ka pa-patura pa-njanjingu la Mbiruhemba, i Ambimeliku dàngu i Pikulu beli-danyaka la tana tau Pilitingu.

³³Hàla i Ambarahàmu hi na-pamula hareti pingi ai tamarika la Mbiruhemba dàngu piti welingu nu la pa-ngiangu nuna natuya ngia palumu-nanya i MIRI na Ala malundu nu - nuna.

³⁴Hàlaka nu i Ambarahàmu na ana mandai-mapa ba engana la tana tau Pilitingu.