Read Kambera DEDI 22 Bible Online

DEDI 22 - Kambera bible

DEDI 22

¹Pi - pirana na rehi la malamiri i Ala nakama-nya na tuturu-na i Ambarahàmu. I Ala na-paaungu, “Ambarahàmu!” wàna. Nahema i Ambarahàmu, “Ou MIRI,” wàna.

²Napaya i Ala, “Luawa la tana Moria dàngu i Ihàku na ana kamehangu-mu, na ana pambana mbuhamu. Lai nu, la hau palindi napa na pa-paita-nggunggau, maraku wànyawa na anamu ka kameti maraku patunu-ya lai Nyungga,” wànanya.

³Hadangu harii la mba - mbaru, bera-nanyaka ai i Ambarahàmu nduma kameti maraku patunu tàka hi nahondu-ha hi nawotu-ha la kalandai. Ka laku-danyaka anguda i Ihàku dàngu da atana da madua la pa-ngiangu na papeka-na i Ala lai nyuna.

⁴La lodu patailu wàna ita-nanyaka paraïna i Ambarahàmu nuna na pa-ngiangu la mamarau.

⁵Hàla hi napanii-nja da atana da madua, “Ndàdiku nyimi yiahu dàngu yiada da kalandai. Nyungga dàngu na ananggu lua-manya lai nu pa-hamaya-nya i MIRI, taï mabeli tomakai,” wànanja.

⁶I Ambarahàmu nawotu-ha la kunduna i Ihàku da ai pa-mutungu kameti maraku patunu, tàka nyuna wiki nangàndi kahidi dàngu wàla epi pa-paketingu wàngu ai pa-mutungu. Nàhu ba dalaku kariangu,

⁷paàrangu-nanyaka i Ihàku, “Ama!” wàna. Nahema i Ambarahàmu, “Ou, nggàra wàmu ananggu?” wànanya. Paàrangu-nanyaka i Ihàku, “Nàhu tangàndi-ka epi dàngu ai, tàka nggiyaka na ana mbimbi na patuu kameti maraku patunu?” wàna.

⁸Nahema i Ambarahàmu, “Napa i Ala wikima duna na ma-payema-nda ana mbimbi patunda kameti maraku patunu,” wàna. Hàla laku pangalangu-danyaka.

⁹Nu ba datàka-ka la pa-ngiangu papeka-na i Ala lai Ambarahàmu, ka pandoi-nanyaka hau ngia pawotu maraku dàngu hi na-pakala-nja da ai mutungu dita la pinu. Hàla hi napainya na anana hi na-kunggulu-nya la ngia pawotu maraku la pinu ai pa-mutungu.

¹⁰Hàla piti-nanyaka na kahidi-na, ka kurori-ya na ananggu, ba wàna.

¹¹Tàka na papalewa-na i MIRI nawara-nya welingu la awangu, “Ambarahàmu, Ambarahàmu!” wànanya. Nahema i Ambarahàmu, “Ou MIRI!” hi wàna.

¹²“Àmbu pakatiu-duya jàka ndia àmbu nggi - nggiki-dumunya nana na anakeda,” wànaka i MIRI la ngaruna na papalewa. “Nàhu pi-nggunyaka bau maraku dàngu bau karadaku lai Nyungga, nadu ba ndau pandia-ya la pawua-ngganya na ana ka-mehangu-mu,” wànanya.

¹³Hàla i Ambarahàmu hi na-pawilikungu matana la winggiru-na, ka ita-nanyaka na heu mbimbi bumbu na ma-pakànangu kaduna la wuku ai. Ka piti-nanyaka i Ambarahàmu nuna na mbimbi hi na-maraku wànya lai MIRI ka kameti maraku patunu-ya hiluna na anana.

¹⁴I Ambarahàmu natunya tamuna lai nu “I MIRI na-payemangu[43] pa-kalana,” wànanya. Dàngu lundu nàhumbu napanii wàngu na tau, “La Palindi-na i MIRI na-payemangu pa-kalana,”[44] wàdanya.

¹⁵Hili hàndakangui welingu la awangu na papalewa-na i MIRI nawara-nya i Ambarahàmu,

¹⁶“Natuu liina i MIRI: Nàhu kunjanji-ya lumuna na tamu wikinggu, nadu nyumu bau tuyaka na matuna nu dàngu ba ndau pandia-ya la pawua-ngganya na ana kamehangu-mu,

¹⁷napa Nyungga ku-pakanyuru wànggau ma-bundungu ma-làndangu dàngu ku-paworu-ha da wàla wuamu hama tuna na kandunu la awangu dàngu hama tuna na wara la hingi tehiku. Da ana umbuku-mu napa datalu-ha da muhuda.

¹⁸Mbuu ndàbada da banjaru la pinu tana da-kamahi-ngga ka peku pa-kanyuru-nggunja hama tuna ba ku-pakanyuru-ha da wàla wuamu — nadu ba mbàda karadaku-dumu-nyaka na pareta-nggu,” wànanya.

¹⁹Hàlaka nu beli-nanyaka i Ambarahàmu la atana da madua, nu ka pa-kariangu hàla-danyaka pabeli la Mbiruhemba, tàka i Ambarahàmu pa-engangu-nanyaka lai nu.

²⁰I Ambarahàmu ninya na ayana, Nahuru-ya na tamuna. La hambeli-na na matumbu la Palindi Moria, i Ambarahàmu narongu-ya na rukuna i Miluka, papaha-na i Nahuru ba ninguka anana mini tau mawalu nu:

²¹i Uhu, na ma-maaya dehi; i Mbuhu na erina; i Kamuilu na amana i Aràmu;

²²i Kehitu, i Hahu, i Pilindàhu, i Yitulàpu, dàngu i Mbetuilu,

²³napa jia-duyaka na amana i Ripuka. Nuda-haka da tau mawalu da ana pahabola-na i Miluka ndumana i Nahuru angu dedina i Ambarahàmu.

²⁴I Nahuru ningu kala wihina, Riauma-ya na tamuna, nyuna na-paana-nya i Temba, i Nggahàmu, i Taha dàngu i Maaka.