Read Kambera DEDI 23 Bible Online

DEDI 23 - Kambera bible

DEDI 23

¹Ba natoma-ka 127 mbua ndaungu na lurina i Hara,

²meti-nanyaka la Hemburungu la tana Kanaàngu. I Ambarahàmu na-hawina-nya dàngu na-paduduru-nya na metina na papaha-na.

³Hàlaka nu i Ambarahàmu namàta-nya na metina na papaha-na hi nalua la tau Heti, da mangia-nya na tana nuna. Napanii,

⁴“Nyungga yia tau tàkaka ma-ngiangu la hongami nyimi angu dedi; puli àrungga kukei halobaku tana ka peku tani ninggunya na papaha-nggu,” wànanja.

⁵Dahema nyuda,

⁶“Nyuma matembi-makau Umbu, ba liku uru ma-kapàru-dukau nyumu la hongama nyuma, jia ba tuna tani bianya duna na papaha-mu la reti mahàmu halawàla manguma nyuma. Dahàmu wànguma da etima duma ba ma-payema-nya retina na papaha-mu,” wàdanya.

⁷Tunaka nu maràbaku-nanyaka i Ambarahàmu la hanggada nyuda,

⁸hi napanii, “Nyimi angu dedi jàka ni-madunya na etingu-mi pa-pahia-ngga la patani-nya na papaha-nggu lai yiahu, màla àru kai karaiya lai Epurungu anana mini i Hohàru,

⁹ka nadangga-nya lai nyungga na Liangu Màkapela na maninya la halinggi wokana. Màta nyuna ka nadangga-nya nuna na tana lai yiahu, kai hakahii nyimi. Na wilina napa kuwua palundu-manya, ka peku mangu wiki-nggunya nuna na tana,” wàna.

¹⁰La rehi nuna, ni wiki-manyai duna i Epurungu ba na-mandapu danja da tau Heti la ngia pa-patomangu la pindu bokulu paraingu. Hàla dàngu hakahii-danya mbuu ndàbada da maninja lai nu, ka hema-nanyaka,

¹¹“Na banjaru wiki-manggu da ma-hakahii nuna na tana woka dàngu lianguna ba wuanggu-nggamu-nyaka kau tani ninya na papaha-mu,” wàna.

¹²Tàka i Ambarahàmu hi na-maràbaku la hanggada nyuda da tau Heti,

¹³dàngu ba angu rongu hàlana na tau, panii-nanyaka lai Epurungu, “Màla àru kau pa-tingingu. Nyungga mbuhangu-manggunya pakei hàlaya nuna na tana woka. Kei-hawa da àmahu wilina, ka peku tani ninggunya na papaha-nggu lai nu,” wànanya.

¹⁴Nahema i Epurungu,

¹⁵“Na hau lobaku tana na ma-bilangu ana patu ngahu àmahu bara pàkua, nggàra-mahaka nu lai nyuta tau madua? Tani bianya dumu Umbu lai nu na papaha-mu,” wànanya.

¹⁶I Ambarahàmu na-patunju-ya nuna na wilina na tana. Diha-nanjaka da àmahu nggubulu-da hama-mada da papanii-na i Epurungu, nu ba patu ngahu àmahu barada, nunjuya na timbangu na pakàli wàda da mini danggangu. Ka mbayaru-nanyaka lai Epurungu, hi da-hakahii ndàba da tau Hetu.

¹⁷Tuna nuduka na tana wokana i Epurungu na maninya la Màkapela la tuba pahunga loduna na Màmurei hi namangu-nya i Ambarahàmu. Na tana nuna wokaya dàngu liangu-ya, hi jiaha mbuu ndàbada da pingi ai lupa da pingi ai da maninja la padira.

¹⁸Na tana nuna nakada-nyaka ba manguna i Ambarahàmu-ya paraï mbuu ndàbana na tau Heti na mamàtu la ngia pa-patomangu la pindu bokulu paraingu.

¹⁹Hàlaka nu i Ambarahàmu hi natani-nya na papaha-na la liangu Màkapela la tana Kanaàngu.

²⁰Tuna nuduka na woka dàngu liangu-na làti ba mangu tau Hetiya nàhu duna manguna i Ambarahàmu-yaka nduma pangia reti.