Read Kambera DEDI 24 Bible Online

DEDI 24 - Kambera bible

DEDI 24

¹I Ambarahàmu kaweda ailulu-mana-nyaka, ba tuna nyuna na-pakanyuru-nya paraïna i MIRI la mbuu ndàba-naka.

²La hau na lodu panii-nanyaka i Ambarahàmu la atana na marihi pa-matua, na ma-paloku hàlaha da banda da malanja-na, “Pa-dambaku-nya na limamu la manggawa manggalipi-nggu.[45]

³Harangu-wa la parongu-na i MIRI, na Ala na ma-kuaha-ya na awangu dàngu na tana, ba nda jia himbu-amunya papaha-na na ananggu i Ihàku welingu la honga tau la tana Kanaàngu.

⁴Lupangu-ma bàdi kau beli la tana ngia padedi-nggu kau himbu ninya papaha-na la nua kalembi-nggu,” wànanya.

⁵Ka paàrangu-nanyaka na atana lai nyuna, “Kanu Miri jàka era nda nabihu nuna na bidi kawini pa-dunjaku-nya na umana dàngu ka nda nabihu pakiku-ngga pa-pamaingu la tana lai yiahu? Màla ku-karia-nyaka bàdi na anamu Miri la tana ngia paweli-mu?” wànanya.

⁶Tàka nanapa-ya i Ambarahàmu, “Pa-nanjarungu! Mu-jàmangu ailulu pa-karia-nya na ananggu lai nàhu!

⁷I MIRI, i Ala na ma-kuaha-ya na awangu, mbàda ngàndi-nanggaka welingu la uma amanggu dàngu welingu la tanada da nua kalembi-nggu, dàngu ba mbàda harangu-naka lai nyungga la pa-wuangu-ya na tana yiana la wàla wuanggu. Nyuna duna napa na ma-paràhangu papalewa-na la patula-nggau nyumu hi peku hunggumu haàtu papaha-na na ananggu welingu lai nàmu.

⁸Tàka nuna na bidi kawini jàka nda nabihu pakiku-nggau, ka mara-munyaka dumu welingu la harangu yiana. Jiapa ka nda nggikina, àmbu karia-dunya na ananggu lai nàhu,” wànanya.

⁹Tunaka nu nuna na atana pa-dambaku-nanyaka na limana la manggawa manggalipi-na i Ambarahàmu mirina, dàngu hi na-harangu la pawànya hama tuna ba wànanya paraïna i Ambarahàmu.

¹⁰Nuna na ata napiti hakambulu ngiu ota hi na-pabuku-nja màtu - màtu malanja ma-pawilingu manguna na mirina, ka laku-nanyaka la paraingu pangia-na i Nahuru ba naluripa; na maninya la mbara diana na Mahupatamia.

¹¹Ba natàka-ka lai nàhu papànja-nanjaka da otana ka peku hangahu-da la lihi humuru la hambeli paraingu. Na lodu malingu-nanyaka, jia-mayaka nuna na rapa tàkada da kawini la humuru la pataku wai.

¹²Hàla hamayangu-nanyaka nuna na tau ata, “MIRI, Alana na miringgu i Ambarahàmu, ndula àruka ka peku ningu linguna na wai ngeranggu la lodu nàhu; hàmu àrunya eti na miringgu i Ambarahàmu.

¹³Tàngaru-ka, ba ku-ndolaku yia la lihi humuru. Tiangu-ki nàmu-njaka da anakaria welingu la paraingu da mamai pataku wai.

¹⁴Napa ka kupanii-nya na haàtu welingu lai nyuda, ‘Papuru àrunya na wurungu-mu dàngu kau wuangga duku ka ku-unungu,’ ka wànggunya, jàka nahema, ‘Unungu naa ama, napa da otamu ka ku-paunu-mbunja!’ jàka wàna, jia-duyaka nyuna na papindi-mu la patuya papaha-na na atamu i Ihàku. Jàka na-palànga-tàkangu-maka nuna ba wànggu, pidunggu-nyaka ba mbàda hàmu-munyaka eti na miringgu i Ambarahàmu,” wàna.

¹⁵Ba dàngu hamayangu bia-napa nu, tàka-nanyaka i Ripuka, na anakaria na ma-kanjupu manandangu-na tàka hi bidi kawini-mayapa, ba dàngu ngàndina wurungu la kunduna nu ba namai la humuru. Nyuna anana i Mbetuilu-ya, da ina amana i Mbetuilu jiaha i Nahuru dàngu i Miluka; i Nahuru ayana i Ambarahàmu-ya. I Ripuka nalua la humuru hi na-paihi-nya na wurungu-na, hàla laku beli-nanyaka.

¹⁶

¹⁷Nyanyaru-nanyaka na atana i Ambarahàmu ba nalua la lihina, “Màla àru làti dou na ananggu, wuangga duku ka ku-unungu la wuru waimu,” wànanya.

¹⁸Nahema nu na ana karia, “Unungu duna Ama,” wàna; hi na-papuru parengga-nya na wurungu-na hi na-pajàma-nya pa-unungu nuna na atana i Ambarahàmu, ba dàngu kata-nanya na wurungu.

¹⁹Ba na-hàlaka pa-unungu nuna na tau ata; napanii nuna na ana karia, “Napa ka kutaku-mbunja wai da otamu Ama, ka daunu lundu hodada nida da banda,” wànanya.

²⁰Tunaka nu buri parengga-nanyaka na wai la wurungu la ngia paunu-da da ota, hàla hi na-nyanyaru la humuru pahili taku padangu wai hi lundu hodaha pa-unungu nuda da banda.

²¹Nu ba talànga tuna nu panau-mananya paraïna atana i Ambarahàmu ba dàngu nda ana hau papanii-na. Rinjungu-mananya papinya jàka tuba tunanya ihina na pamai wàna paraïna i MIRI hi ndia.

²²Ba daunu pa-mbihungu hàlaka da ota, nu na atana i Ambarahàmu napiti ngaü àmahu rara mambotu wilina, hi na-pakàna-nya la uruna nuna na ana karia. Da limana natunja ba hamawa-da da kara àmahu rara.

²³Hàla nuna na, “Màla kamangu papanii jàka nggamuya na amamu. Ningu nu ngia patodu la umana, ka kutodu nyungga dàngu da dakaria-nggu?” wànanya.

²⁴“Na amanggu jiaya i Mbetuilu, anada i Nahuru dàngu i Miluka,” wàna na anakaria.

²⁵“La umama nyuma ninguma ngia patodu-mu, tàka da dangumbu da rembi dàngu dangu pangada da banda,” wàna.

²⁶Ka maràbaku-nanyaka nuna na ata ba na-maraku-nya i MIRI.

²⁷“Pa-wotungu-ya i MIRI, Alana na miringgu i Ambarahàmu. Lohangu-nanyaka ba na-tuturu i MIRI dàngu ba nahàmu-nya eti na miringgu i Ambarahàmu. Nyuna na mairu ngàndika hi lupa ku-wingungu la nua kalembi-na,” wàna.

²⁸Tunaka nu nyanyaru-nanyaka nuna na bidi kawini la uma inana hi napanii-nya mbuu ndàbana na madedi.

²⁹I Ripuka ninya na ayana na haàtu na ma-tamungu Lambàngu. Narongu-ya na erina rukuna na papanii-na nuna na ata. Dàngu naita-mbuha da ngaü la uruna dàngu da kara la limana. Ka nyanyaru-nanyaka la hambeli uma hi nalua tomaya na atana i Ambarahàmu, ba ndolaku bia-nanyapa dàngu da otana la lihi humuru.

³⁰

³¹Ka panii-nanyaka i Lambàngu, “Nyumu ama, tau pa-pakanyuru-na i MIRI-kau! Àmbu jiapa-kau yiahu la hambeli. Màla-ndawa ka talaku la uma. Mbàda payema-manggauka kuru pangia-mu dàngumbu pangia-da da otamu,” wànanya.

³²Ka kikungu-nanyaka na ata hi natama la uma. Papuru-nanjaka da ngàndida da ota i Lambàngu, hi natunja rembi uhu dàngu pangada nuda da banda. Hàlaka ngàndi-nanyaka wai pabaha wàngu wihi ndumana nuna na ata dàngu da karia-naka.

³³Ba da-pawandalu-njaka pangangu, ka panii-nanyaka nuna na ata, “Ndedi jia ngangu-anggu duku jàka ndedi ku-patàka-nya na pulungu pangàndi-nggu,” wànaka. Nanapa-ya i Lambàngu, “Màla kau paniika duna,” hi wànanya.

³⁴Ka pakiringu-nanyaka papanii na atana i Ambarahàmu, “Nyungga yia atana i Ambarahàmu-ka.

³⁵Kanjupu pa-kanyuru-nanya paraïna i MIRI na miringgu hi lupa dira wuluya. Mbàda wua-nayaka kabàba mbimbi, kamàmbi, hapi, ota, kalandai, dàngumbu àmahu mabara, marara, lupa ata mini kawini.

³⁶Ba làpahu kaweda bia-naka i Hara, papaha-na na miringgu na-paanangu-ka haàtu anakeda mini, tàka na miringgu na-pakangeha hàla-njaka da banda da malanja-na la anana nuna.

³⁷Nu ka paràha-duna-nggaka panjanji wàngu harangu la pa-karadaku-nya na pareta-na, ‘Jàmangu, àmbu jia pindi-dumunya papaha-na na ananggu welingu la honga anakaria la yiahu la tana Kanaàngu,

³⁸tàka mbulungu welingu la nua kelembi-na na ama-anggu. Jia ba tuna lu laku parenggangu-wa lai nàhu,’ wànangga.

³⁹Ka paàra-dunggu-nyaka, ‘Ka nggiki-naka bàdi jàka nda na bihu pakiku-ngga nuna na ana karia?’ wànggunya.

⁴⁰Nanapa-ya nyuna, ‘I MIRI na pa-karadaku mànunggu, napa na-paràhangu papalewa-na la patula-nggau nyumu, hi peku ningu linguna na palaku wàmu. Napa muhunggu-manya duna papaha-na na ananggu la honga kalibaru wikinggu, nu la nua kelembi-na na amanggu.

⁴¹Na nyuna jàka da-jukaru-nggau nyuda da kalembi-nggu, hinaka duna hiu mara welingu la harangu-mu,’ wànangga.

⁴²Tàka kawai ba kutaka-ka la humuru ka hamayangu-dunggu-nyaka la etinggu, ‘MIRI, Alana na miringgu i Ambarahàmu, màla àru MIRI kau pawiti-nya ka ningu linguna na pamai wànggu.

⁴³Napa nyungga ndolaku-manggu-nyapa la humuru yiana. Jàka ningu anakaria mamai pataku wai, napa ka kukarai-ya wai pa-unungu.

⁴⁴Jàka na bihu-madu pawua-ngga, dàngu jàka nakarai-mbuka la pa-paunu-nja da otanggu, tandana jia-duyaka na papindi-na i MIRI ndumana na anana na miringgu, ka wànggu,’ wànggu.

⁴⁵Ndedimbu ku-panjàpu-ya na hamayangu la etinggu, tàka-ma-ananyai i Ripuka ba naduku-ya na wurungu la kunduna, hi nataku wai la humuru. Tunaka nu ka panii danggu-nyaka, ‘Wua àrunda wai ka ku-unungu,’ wànggunya.

⁴⁶Ka papuru parengga-madua-nanyaka na wurungu welingu la kunduna, hi napanii, ‘Unuwa Ama, napa da otamu ka ku-paunu-mbunja wai,’ wànangga. Ka unu-dunggu-nyaka, hàlaka hi na-paunu-mbunja wai da otanggu.

⁴⁷Hàlaka paàra-nggunyaka, ‘Nggamuya na amamu?’ wànggunya. Nahema-ka, ‘Na amanggu Mbetuilu-ya, anana i Nahuru dàngu i Miluka,’ wàna. Ka pakàna-dunggu-nyaka ngaü marara la uruna dàngu ha-mawangu kara àmahu la limana.

⁴⁸Ka maràbaku-nggunyaka ba ku-maraku-nya dàngu ba kuwotu-nya i MIRI, Alana na miringgu i Ambarahàmu. Nyuna-maka na mairu ngàndika hi ku-wingungu lai yiahu, la kalembi-na na miringgu, hi lupa kuhunggu-ya yiana na anakaria ndumana na anana.

⁴⁹Nàhu, jàka weli eti-madumi panamu-ya na miringgu dàngu jàka mi-pajàngapu-madunya na tanda pa-kalembi wàminya, màla àru kai wàlahu-ngganya, tàka jàka ndiakai duna peka-mbungganya, ka kupinya duku jàka nggikina wànggu,” wànaka.

⁵⁰Dahema i Lambàngu dàngu i Mbetuilu, “Yiana na matumbu ba ma-pawelingu lai MIRI-mayaka, nda ràka-anapa duma la pa-wuangu botangu.

⁵¹Yiana i Ripuka; màta bia ka na-karia-nggau dumu Ama ka natuu papaha-na na anana na mirimu, hama tuna ba wàna wiki i MIRI,” wàdanya.

⁵²Nu na atana i Ambarahàmu ba narongu-yaka na kareuku-da, maràbaku-nanyaka ba na-marubuku-nya i MIRI.

⁵³Hàla paluhu-nanjaka da paki dàngu da ngaü àmahu mabara marara, nawua ndàbanya i Ripuka. Màlamai na ayana dàngu na inana nawua-nja banda mbana wilina.

⁵⁴Hàlaka patuna nu ngangu ngunungu danyaka na atana i Ambarahàmu dàngu da karia-na, hi datodu lai nu. Ba da-hadangu-ka nu hadangu harii panii-naka nu na ata, “Puli-nggawa ka kubeli la miringgu,” wàna.

⁵⁵Tàka napaya na ayana dàngu na inana i Ripuka, “Màtaki ka naangu-kinggama i Ripuka ana hau minggu jàka ndia ana hakambulu lodu, hàlaka duna ka nalaku-ka,” wàdanya.

⁵⁶Tàka nanapa-ya paraïna ata, “Màtangu àmbu pàtu-duka, ba i MIRI-maka matunya linguna na pamai wànggu; jia puli bia-nggawa ka kubeli la miringgu,” wànanja.

⁵⁷Dahema nyuda, “Màla ka tapaau-nya i Ripuka ka ta-paàra-nya jàka nggàra wàna nyuna,” wàdaka.

⁵⁸Kapaau-danyaka i Ripuka hi da-paàra-nya, “Màla dumu ka kulaku karia-nja yiada da tau wàmuka?” wàdanya. Nahema nuna na ana karia, “Wua, ku-mbuhangu-ma,” wàna.

⁵⁹Ka puli-danyaka i Ripuka dàngu da ata ngàndina palaku karia-nya nu na atana i Ambarahàmu dàngu da karia-na. Hàlaka pa-kanyuru-danyaka i Ripuka, “Mili àru nyumu Ripuka ka nda pira piku pàku biaya na tau na maina-nggau! Mili àru da wàla wuamu ka da-panyàku-ha da paraingu-da da muhuda!” wàdanya.

⁶⁰

⁶¹Tunaka nu kamomatu-danyaka i Ripuka dàngu da anakaria ata ngàndina, hi da-kaliti ota ba dalaku karia-nya nu na atana i Ambarahàmu.

⁶²Ba talànga tunaka nu nyuna i Ihàku mbàda mai-naka welingu la[46] maràda telangu làpahu-nya na humuru “Nyuna na Ma-tanara-ka” ba wàdanya, hi na-ngiangu la mbara luruna na Kanaàngu.

⁶³La hau na malingu luhu-nanyaka welingu la maüna ka ku-wenangu la woka wàna, nu ka ita-duna-njaka da ota da manàmu-nja.

⁶⁴Nu i Ripuka ba naita-yaka i Ihàku, puru-nanyaka welingu la otana,

⁶⁵hi na-paàra-nya na atana i Ambarahàmu, “Nggamuya nàmu na tau mini la woka na mamai hanggangu lai nyuta?” wànanya. “Nyuna jia duyaka na miringgu,” hi wàna na atana i Ambarahàmu. Ka piti-nanyaka i Ripuka na tera tamalingu-na hi na-patamali-nya na matana.

⁶⁶Tunaka nu nuna na ata hi na-palara hàlanya lai Ihàku na pa-paloku-naka.

⁶⁷Hàlaka nu nyuna i Ihàku karia-nanyaka i Ripuka patama la maüna i Hara na inana, ka kanoma-nanyaka i Ripuka. I Ihàku nambuha-manya i Ripuka; ka nggaüru beli-nanyaka na etina i Ihàku welingu la hawina ba nda ninyapa na inana.