Read Kambera DEDI 25 Bible Online

DEDI 25 - Kambera bible

DEDI 25

¹I Ambarahàmu nahili lalei na pitiya na haàtu na kawini, na ma-tamungu Katura.

²Nuna na papaha-na na-paana-nja da anana da ma-tamungu: i Himuràngu, i Yòkuhàngu, i Mendàngu, i Mindiangu, i Ihimbàku, dàngu i Huwàhu.

³I Yòkuhàngu amana i Heimba dàngu i Ndendàngu, tàka da wàla wuana i Ndendàngu, jia-duhaka da tau Ahuru, tau Letuhu dàngu tau Leumu.

⁴Da anana i Mindiangu jiaha: i Epa, i Epiru, i Henuku, i Ambinda dàngu i Elinda-a. Nyuda mbuu ndàbada wàla wuana i Katura-ha.

⁵I Ambarahàmu jiapa ka na-pakangeha ndàbanja-kadu da bandana lai Ihàku,

⁶tàka ba talànga luri-napa nawua pada-manja tungguda da anana da pangala-na welingu la papaha - papaha-na hawiangu. Tunaka nu paràha-nanjaka nuda da anana pa-lelingu la ngaba tana la pahunga lodu tana Kanaàngu, ka damarau wànya i Ihàku na anana.

⁷I Ambarahàmu ba nameti làpahu mana-nyaka na kaweda-na, mbàda 175 mbua ndau-manaka.

⁹Ka tani-danyaka paraï da anana, nu i Ihàku dàngu i Ihimailu, la Liangu Màkapela, na maninya la woka la pahunga loduna welingu la Màmurei. Àmangu na woka nuna manguna i Epurungu anana i Hohàru tau Heti,

¹⁰tàka mbàda kei-nanyaka paraïna i Ambarahàmu welingu lai nyuda da tau Heti. I Hara papaha-na i Ambarahàmu, mbàda lai numaka tani ninya.

¹¹Ba taliu meti-naka i Ambarahàmu, i MIRI na-pakanyuru-nya i Ihàku anana i Ambarahàmu. La rehi nuna i Ihàku ngiangu-nanya la lihi humuru “Nyuna na Ma-tanara-ka” ba wàdanya.

¹²I Ihimailu jia-duyaka na anana i Ambarahàmu dàngu i Hanggaru, kawini Mehiru, na atana i Hara.

¹³I Ihimailu na-paanangu tau hakambulu madua, màta ka tapeka pandàki-nja tundunya na dedida: i Nembayutu, i Kendàru, i Àdambeyilu, i Mipihàmu, i Mihuma, i Nduma, i Maha, i Handàtu, i Tema, i Yeturu, i Napi dàngu i Ketima. Da anakeda nuda jia-duhaka da boku la mangilu-da da hakambulu dua kabihu, tàka da ndeha lupa da ngia pamaü terada patiki-ha tundunja da tamuda nyuda.

¹⁷I Ihimailu na lurina 137 mbua ndau-naka ba nameti.

¹⁸Da wàla wuana ngiangu-da la ngaba manggawa Hawila dàngu Hiuru la pahunga loduna welingu la Mehiru la tubana la Ahuru. Nyuda daluri pa-mehangu welingu la wàla wuana i Ambarahàmu hawiangu.

¹⁹Yiana-yaka na rukuna i Ihàku anana i Ambarahàmu.

²⁰I Ihàku mbàda patu kambulu ndau-naka na lurina ba na-kanoma-ya i Ripuka, erina i Lambàngu, anana i Mbetuilu, tau Aràmu, la Mahupatamia.

²¹Ngaha ba nda na-ngalangu ana i Ripuka, hamayangu-duna-nyaka i Ihàku lai MIRI ndumana na papaha-na. Nyuna i MIRI nahema-ya na liina i Ihàku la hamayangu, ka woru ihi-nanyaka i Ripuka.

²²Nyuna i Ripuka ana nduaha la kambuna, dàngu ba ndedipa dadedi nuda da anakeda, pa-aülungu-danya daa la kambu. Napanii i Ripuka, “Nggiki-manaka ihu hi tuna numaipa bàdi la wikinggu?” wàna. Ka hamayangu-nanyaka ba nakarai-ya na lii pa-irungu-na i MIRI.

²³I MIRI natuu puluna lai nyuna, “Tau dua banjaru-ya na maninya daa la kambumu; napa mu-paanangu tau dua banjaru ma-pamuhungu; na erina na kapàru-pa welingu la ayana na ma-maaya napa nalumu-nya na ma-maeri,” wànanya.

²⁴Toma-nanyaka na rehina i Ripuka la pa-habola, hi na-habola-nja da mini ana ndua.

²⁵Na ma-maaya na ka-raraku, na manula-na hama tuna kalembi ma-hawulu-ya. Jia-duyaka hi patamu-nya, Ehaü.[47]

²⁶Ba nadedi na ana rara na padua wàda, na limana nayàpa-ya na tandana i Ehaü na ayana. Jia-duyaka hi patamu-nya, Yakupu.[48] I Ihàku mbàda 60 mbua ndau-naka ba dadedi nyuda.

²⁷Nuda da anakeda madua matua - tua-danyaka. I Ehaü mini pa-tamangu hakapu-ya dàngu na-mbuhangu pa-engangu la maràda, tàka i Yakupu na-mandangu hurina dàngu na-mbuhangu pa-ndàdiku la uma.

²⁸I Ihàku nambuha ninyapa i Ehaü, nadu ba nakàli mangàbangu tolu banda pa-patamangu. Tàka i Ripuka nambuha ninyapa i Yakupu.

²⁹La hau na lodu i Yakupu ba talànga manahu-na rii kambii rara, tàka-nanyaka i Ehaü welingu la pa-patamangu. Manjuu-nanya.

³⁰Hi napanii-nya i Yakupu, “Lalu mbana manjuuka. Wuanda nada hawutu da kambii rara,” wànanya. (Jia-duya i Endumu[49] hi wàda mbunya).

³¹Nahema i Yakupu, “Hàmudu, mili kau wua mangilu pàku-ngganya na ngaba pa-maaya wàmu,” wànanya.

³²Napaya i Ehaü, “Nggàra kuila wànyaka duku na ngaba nuna. Manjuu nda palàda-manggunya!” wàna.

³³Nahili napaya i Yakupu, “Mu-harangu pàku ba wuamu-ngganyaka na ngaba pa-maaya wàmu lai nyungga,” wàna. Ka harangu-nanyaka i Ehaü hi nawua-nya na ngabana lai Yakupu.

³⁴Hàlaka nu nyuna i Yakupu hi nawua-nya roti dàngu hawiangu na rii kambii rara. Ngangu ngunungu-nanyaka i Ehaü hi na laku. Tuna nu nyuna i Ehaü ba nda na-pawili-nya na ngaba pa-maaya wàna.