Read Kambera DEDI 26 Bible Online

DEDI 26 - Kambera bible

DEDI 26

¹La tana lai nu hilu tàka-nanyaka rimbangu hama tuna àmangu la rehina i Ambarahàmu. Ka lua-nanyaka i Ihàku lai Ambimeliku, hanganji tau Pilitingu, la Nggeràru, nakarai-ya pa-ngiangu lai nu.

²Nu hi nalaku-nya nuna, ma ba na-paitangu-duka wikina i MIRI lai nyuna, na mapeka-nya, “Àmbu lakudu la Mehiru; ndàdiku-ka lai yiahu, hama tuna ba mbàda wànggunggau.

³Napa kukuru mangga-manggau dàngu ku-pakanyuru-manggau duku. Nggubulu-na na ngabana yiana napa kuwua-nggaunya dàngu wàla wuamu. Napa Nyungga ku-patutu-manya duku na pa-njanjingu na pambàda wua-nggunya i Ambarahàmu na amamu.

⁴Napa Nyungga kuwua-nggau nyumu ana umbuku-mu hama dangu kandunu la awangu, dàngu nggubulu-na la ngabana yiana napa kuwua-nja nyuda. Mbuu ndàbana na banjaru la pinu tana napa dakarai-ka ka ku-pakanyuru-nja nyuda hama tuna ba ku-pakanyuru-nja da wàla wuamu.

⁵Napa Nyungga ku-pakanyuru-nggai, nadu i Ambarahàmu ba mbàda karadaku-nanggaka Nyungga dàngu ba na-kawana-njaka mbuu ndàbada da uku da pareta-nggu,” wànanya.

⁶Nu ka ndàdiku-nanyaka i Ihàku la Nggeràru.

⁷Ba da-paàra-nyaka tau lai nu rukuna i Ripuka, nahema i Ihàku eri-nggunya duku, nda papaha-anggunya, wànanja. I Ihàku na-mangàdatu pa-pameti-ya paraï da nuda da tau ka peku piti-danya i Ripuka na ma-kanjupu manandangu-ya.

⁸Ba na-harangu mandaika i Ihàku pa-ngiangu lai nu, la hau lodu na Hanganji Ambimeliku na-tàngaru welingu la katonga-na, ka ita-nanyaka i Ihàku ba talànga parohu pa-puduku-da dàngu i Ripuka.

⁹Ka paau-nanyaka i Ihàku hi na-paàra-nya, “Ka nda papaha-amunya nuna na tau kawini? Nggikina eri-nggunya hi wàmui?” wànanya. Nahema i Ihàku, “Na pa-pangàda-nggu, napa da-pameti-duka papaha-nggunya jàka wànggu, wànggudu,” wàna.

¹⁰“Nggàra-yaka nu hi tumu-nggama nu nyuma?” wàna i Ambimeliku. “Làti peku-ma-anaka na haàtu na tau pa-pareta-nggu ba na-katuda danya na papaha-mu, jàka natoma-ka patuna nu làti nyumu-maka dumu matanggu hemaya na panjala-ma nyuma,” wàna.

¹¹Tunaka nu i Ambimeliku hi napanau hàlanya na tau pa-pareta-na, “Nggamu na ma-kuhiku-ya na tau yiana dàngu papaha-na, napa kuhuku pameti-ya,” wànanja.

¹²I Ihàku na-hàbarangu wini ka ràma woka la tana lai nu, nu la ndaungu nuna na-ngalangu ihina pa-hangahu wundangu welingu la pa-hàbarungu, nadu i MIRI ba na-pakanyuru dunya.

¹³Da pawulu-na paruka - rukangu-madanya pa-bonjangu, hi lupa wulu dira matiki-ya.

¹⁴Ka malara-danyaka eti paraï da tau Pilitingu nadu ba nadangu atana, kabàba mbimbina dàngu hapina.

¹⁵Ka hungguru danjaka tana mbuu ndàbada da humuru paàki-da da atana i Ambarahàmu àmangu ba naluri-pa.

¹⁶Tunaka nu i Ambimeliku hi napanii-nya i Ihàku, “Lakuwa welingu la tanama. Nyumu lalu pangia ditangu-muka welingu lai nyuma,” wànanya.

¹⁷Jia hi nalaku i Ihàku, hi nawulu maüna la Lolangu Nggeràru. Lai nu na-ngiangu pi - pira mandaina.

¹⁸Nyuna naàki beliha da humuru da pambàda àki ba ngaru-napa i Ambarahàmu, da pambàda hungguru-da tana da tau Pilitingu ba taliu metina i Ambarahàmu. Hàlaka nu natunja tamuda da humuru, jia-mahapa da tamuda da patuna na amana.

¹⁹Da atana i Ihàku da àki humuru la Lolangu Nggeràru hi dahunggu wai da - dangu.

²⁰Tàka da tau pawangu la Nggeràru da-palumu dànja da tau pawangu lai Ihàku. “Yiana na wai manguma nyumaya,” wàda. Jia-duyaka i Ihàku hi na patamu-nya nuna na humuru “Pa-lumungu” hi wànanya.

²¹Da atana i Ihàku hili àki-danyai hau, ka hilu pa-lumungu-danyai rukuna nuna na humuru. Jia-duyaka i Ihàku hi natunya tamuna nuna na humuru “Pa-muhungu” hi wànanya.

²²Tunaka nu hi na-haleli welingu lai nu, ka hilu àki-danyai hau humuru patailu wàna. Yiana nyuna nda da-palumu wa-anyapa. Jia-duyaka na humuru nuna “Mara” hi wànanya na tamuna. Nu hi wàna, “Nàhu i MIRI wua-nandaka pamara wàngu la pa-ndàdiku la tana yiana, napa nyuta mbokaru-ndanyaka lai yiahu,” wàna.

²³Tunaka nu i Ihàku laku-nanyaka hi natàka la Mbiruhemba.

²⁴La rudungu nuna i MIRI na-paitangu wikina lai Ihàku, napanii-nya, “Nyungga Alana na ama-mungga. Àmbu mangàdatu; napa kumangga-manggau. Napa Nyungga ku-pakanyuru-nggau dàngu kuwua-nggau wàla wuamu madangu, rukuna na pa-njanjingu-nggu la atanggu i Ambarahàmu,” wàna.

²⁵Hàla i Ihàku pandolaku-nanyaka ngia pawotu maraku dàngu hi na-maraku-nya i MIRI la pa-ngiangu lai nu. Na-pamaüngu ningu lai nu tàka da atana hi da-àkiha da humuru hawiangu.

²⁶La hau na lodu tàka-danyaka i Ambimeliku welingu la Nggeràru, dàngu i Ahuhàtu na matanggu daünya, lupa i Pikulu na ngora pabera tanatara-na ba damai tomaya i Ihàku.

²⁷Ka paàrangu-nanyaka i Ihàku, “Nggikina nu hi mimai tomaka nàhu, làti àmangu ba papa-madu-mingga hi miwàngga-ka welingu la tanami?” wànanja.

²⁸Danapa-ha nyuda, “Nàhu pi-manyaka ba mangga-nanggau-padua i MIRI, tàka ba ma-patanda-nya nahàmu-pa ka tatura lii pa-njanjingu. Harangu-wa

²⁹ba ndau tunggama nyuma ma-akatu, hama tuna nyumai duma ba nda ma-handàkangu patu-nggàmu ma-akatu nyumu. Hàmu-mana-nyaka nu na hurima nyuma hanggangu lai nyumu hi mapuli dàngu hàmunggau palaku. Lohangu-mana-nyaka duma lai nyuma i MIRI ba na-pakanyuru-nggau nyumu,” wàdanya.

³⁰Tunaka nu i Ihàku hi na-paloku-nja pangangu da ariyaa-na, ka ngangu ngunungu-danyaka.

³¹Hadangu harii la mba - mbaru pa-njanjingu-danyaka nimbihu-da ba da-jorutu wànya harangu. Hàla i Ihàku hi na-kamahi-nja lii malangu ba dalaku tàka hi da-pahewa pa-ariyangu.

³²La lodu nunama ba damai da atana i Ihàku papanii-nya rukuna na humuru na pambàda àkida, “Mbàda ngalangu-maka wai,” wàdanya.

³³Hàla i Ihàku natunya tamu nuna na humuru “Harangu” wànanya. Nuya na pakiri-na, “Mbiruhemba”[50] hi kiri wàdanya nuna na paraingu.

³⁴Ba patu kambulu ndau-naka na lurina i Ehaü, lalei-nanyaka ba tau madua-ha da ana karia kabihu banjaru Heti, nu i Yunditu anana i Mbaeri dàngu i Mbàhamàtu anana i Elungu.

³⁵Nuda da kawini tau madua da-pahanduka-ya na lurida i Ihàku dàngu i Ripuka.