Read Kambera DEDI 27 Bible Online

DEDI 27 - Kambera bible

DEDI 27

¹La hau lodu i Ihàku ba na-kaweda-ka dàngu napoki-mbuka, paau-nanyaka i Ehaü, na ana ma-maaya dehina, tuhangu-na, hi napanii-nya, “Ananggu!” wàna. “Ou ama,” wàna i Ehaü.

²I Ihàku napanii, “Pi-mamu-nggaka nyumu ba kaweda-manggu-nyaka dàngu talànga wanguna nda kuluri mandai-apa.

³Jia-duya piti-yawa na tandai panamu dàngu da ana panamu, luawa kau pa-tamangu heu banda la maràda.

⁴Manahu pa-màtaku-ya hama tuna na pakàli mbuhanggu, hàla kau ngàndi-ngganya. Napa ba kuhàla pangangu ka kuwua-nggaunya na kanyuru-nggu ba talànga ndedi metinggu,” wànanya.

⁵Na pa-banjarungu-da i Ihàku dàngu i Ehaü narongu-ya paraïna i Ripuka. Ba nalaku-ka i Ehaü pa-patamangu,

⁶panii-nanyaka i Ripuka lai Yakupu, “Bidi rongu-ma-anggunya na amamu ba napanii-nya i Ehaü,

⁷‘Lua kau pa-tamangu heu banda dàngu kau manahu pa-màtaku-ngga. Ba kuhàla-ka pangangu, napa kuwua-nggaunya na kanyuru-nggu la hanggana i MIRI, ba talànga ndedi kumeti,’ wànanya.

⁸Na, ha ananggu, patingingu dàngu wànyawa yiana na papanii-nggunggau.

⁹Luawa la pangia-da da mbimbinda, dàngu kau pindi dua ngiu ana kamàmbi ma-kambombu, ka ku-manahu-nya pangangu pambuha-na na amamu.

¹⁰Hàla kau ngàndinya ka nangangu, hàlaka nu ka nawua-nggaunya na kanyuru lai nyumu ba talànga ndedi metina,” wànanya.

¹¹Tàka i Yakupu hi na paniinya na inana, “Ha ina, ka ni ba na-hawulu na ihina i Ehaü, tàka nyungga yia ba ndia?

¹²Napa hi nadàma biaya na ihinggu i ama nu ka pi-nanggaka ba panyonga-nggunya; napa nda nawua - anggapa kanyuru tàka ràtungu-yaka lai nyungga,” wànanya.

¹³Nahema na inana, “Àmbu mangàdatu, dou na ananggu. Màta kutanggu-nya nyungga na ràtungu mbuu ndàbana. Tundu bianya jàka nggàraya na papanii-nggunggau, luawa papiti-ha nuda da kamàmbi,” wànanya.

¹⁴Ka lua-nanyaka i Yakupu papiti-ha da kamàmbi hi nangàndi-nya na inana, hàla i Ripuka hi na-manahu-nya pangangu pambuha-na i Ihàku.

¹⁵Tunaka nu i Ripuka hi napiti-ya na pakina i Ehaü na ma-manandangu halawàla, da pa-pahàmu-na la uma, hi napahau-nya i Yakupu.

¹⁶Na-wunjilu-nya manula ana kamàmbi da punguna dàngu na pola nggoruna i Yakupu na manda hawulu.

¹⁷Hàla hi na-pakata-nya i Yakupu da pangangu pa-manahu-na da ma-màtaku lupa da roti da-papandoi-na.

¹⁸Hàlaka nu lua-nanyaka i Yakupu la amana hi napanii, “Ama!” hi wàna. “Ou,” hi wàna, i Ihàku. “Nggamukau, Ehaükau jàka ndia Yakupu kau?” wàna.

¹⁹Nahema i Yakupu, “Ehaüka na ana ma-maaya dehimu. Bau palewa-ka ku-palaku-mayaka. Mandapu-wa kau ngangu tolungu pa-patama-nggu yiada da pangàndi-nggu, ka peku pa-kanyuru-mungga na ama,” wànanya.

²⁰Napaya i Ihàku, “Ka lalu mbana renggakau pa-ngalangu ananggu,” wànanya. Nahema i Yakupu, “Ka ba i MIRI Ala-maka na palumu-mu na maluu padeni-ngga,” wàna.

²¹Hàla i Ihàku hi napanii-nya i Yakupu, “Maikau mareni-ki ka kudàma-kau, Ehaü làngatàka-dukau?” wàna.

²²I Yakupu hi nalihi-nya na amana, tàka na amana hi dadàmaya hi napanii: “Na nggorumu hama tuna nggoruna i Yakupu-kau, tàka na pungumu hama tuna punguna i Ehaü-kau,” wànanya.

²³I Ihàku nda natanda-aya ba jiaya i Yakupu, nadu da punguna, ba da-hawulu hama tuna da punguna i Ehaü. Tàka la rehi ka ku-pakanyuru-nyawa ba wànaka,

²⁴hili paàrangu-mana-nyaipa handàkangu, “Jia làngatàka-dukau i Ehaü?” wàna. “Tubana, jia-maka,” hi wàna i Yakupu.

²⁵Hàla ka panii-nanyaka i Ihàku, “Wua-ngganya nana na tolungu. Napa jàka kuhàla pangangu ka kuwua-nggaunya na kanyuru-nggu lai nyumu,” wàna. Nyuna i Yakupu nawua-nya na tolungu na amana dàngumbu hawutu angguru pa-unungu.

²⁶Ka panii-nanyaka na amana, “Mai kikau la lihinggu, ananggu, kau puduku-ka,” wàna.

²⁷Ba nalihi-nyaka paraïna i Yakupu la pa-puduku-ya, pàda-nanyaka i Ihàku na-hambungaru pakina i Ehaü, ka pa-kanyuru-madua-nanyaka. Napanii i Ihàku, “Nawau hambungaru-na na ananggu hama tuna wau hambungaru maràda-ya na pambàda pa-kanyuru-na i MIRI.

²⁸Màla àruwa i MIRI ka na wua-nggamu mburungu welingu la awangu, na matunya pa-kamboka wàngu na wokamu! Màla àru Nyuna ka nawua-nggau uhu nggàndumu dàngu angguru mabundu làndangu!

²⁹Màla àru na banjaru dangu kau atanya dàngu na kabihu - kabihu banjaru ka na-karadaku lai nyumu. Màla àru kau ngia dita la nua la kalembi-mu mbuu ndàbana, dàngu da wàla wuana na inamu ka da-maràbaku la hanggamu. Màla àru ka nanggàna-ya ràtungu mbuu ndàbana na tau na maràtu-nggau dàngu ka pa-kanyuru-nya mbuu ndàbana na tau na ma-pakanyuru-nggau,” wàna.

³⁰Ndedi nggi mandai ba nahàla-ka pa-wuangu kanyuru i Ihàku dàngu ba nalaku-ka i Yakupu, i Ehaü ayana, beli-nanyaka weli pa-patamangu.

³¹Nyuna manahu-mananyai duna pangangu ma-màtaku hi nangàndi-nya na amana, “Mandapu-wa ama, kau ngangu tolungu pangàndi-nggunggau, ka peku pa-kanyuru-mungga,” wàna.

³²“Ka nggamukau?” hi wana i Ihàku ba na-paàrangu. “Nyungga Ehaü, anamu ma-maaya dehi,” hi wàna.

³³Ka nda - ndànda-naka mbuu ndàbana na ihina i Ihàku, dàngu hi na-paàrangu, “Ka jàka tuna nu, ka nggamu-yaka na ma-patamangu bànda dàngu na mangàndi-ngga ni kawai? Kunga-manyaka ba ndedi mutàka. Hàla mbàda wua-nggunyaka na hupu njàpu kanyuru-nggu lai nyuna, nàhu na kanyuru nuna màngi-mananyaka duna lundu nu - nu,” wàna.

³⁴Ba narongu-yaka nuna, ka kaladaku-madua-nanyaka pahii i Ehaü dàngu kahàdiku nda ukuya na etina, “Pakanyuru àrunggai duku làti ama!” wàna.

³⁵Napayai Ihàku, “Na eri-muka na mamai lai yiahu hi na-panyonga-ka. Nyunaka na mambàda pitiya na kanyuru na pa-wuangu-ya nyuna ba wànggu-nggau làti,” hi wàna.

³⁶Na-kataku-ya i Ehaü, “Yiana pa-nduangu wàngu-nanyaka pa-panyonga-ka. Mutalu-du hi Yakupu[51]-ya na tamuna. Mbàda hàla-manaka nyuna papiti-ya na ngàba pa-maaya wànggu, tàka nàhu hili piti-nanyai na kanyuru tunggunggu nyungga làti. Màla ama nda hilu ningu mapa nu kanyuru hau tunggunggu nyungga?” wàna.

³⁷Nahema i Ihàku, “Nyuna kutu-yaka mirimu, dàngu mbuu ndàbada da nua da kalembi-na kutu-haka atana. Nyungga kuwua-nyaka nyuna uhu nggàndumu dàngu angguru. Nàhu nda nggàra ndoku-apa maningu ka kuwua-nya ba wànggunggau, dou na ananggu!” wànanya.

³⁸I Ehaü nda na-pànjangu-ma pa-kamahi-nya na amana, “Ka jiama-ayaka ba hauna ama na kanyuru-mu? Pa-kanyuru àrunggai duku ama!” wàna. Hàla hili hii-mananyai.

³⁹Tunaka nu ka panii-nanyaka i Ihàku lai nyuna, “Napa nda ningu-apa mburungu la awangu lai nyumu, napa nda ningu-apa woka ma-kamboka tunggumu nyumu.

⁴⁰Napa luri wàngu-munya hapanda-amuka dumu nyumu, na nyuna ba tuna, nyumu naata-nggauka na erimu, tàka jàka mu-patula ngganggangu[52] lai nyuna, napa mu-pahàlangu welingu la kuwaha-na,” wànanya.

⁴¹I Ehaü na-paumbinya i Yakupu, nadu na amana ba nawua-dunyaika na kanyuru-na la erina. Pa-kanandi-na, “Piranai-pa na metina i ama, hàla pa-palundungu hawina napa ku-pameti-ya i Yakupu!” wàna.

⁴²Ba na ronguka i Ripuka na ruku pawuku-na i Ehaü, ka parahangu-nanyaka tau pa-paaunya i Yakupu hi napanii-nya, “Patingingu, na ayamu i Ehaü tuu-nanyaka kiringu ka kupameti-ya wànanggau.

⁴³Na, tundu-nyawa yiana jàka nggàra wànggungau. Laku parenggangu-wa la ayanggu i Lambàngu la Haràngu,

⁴⁴dàngu ndàdiku dànyawa lai nu pi - pira mandaina, lupa na wàdaru na hànggana na ayamu,

⁴⁵dàngu ka lupa na-maromba-nya jàka ngga - nggàraya na pandoku-mu hanggangu lai nyuna. La malamiri napa ka ku-paràhangu tau palua papiti-kau kau beli yiahu. Nda ku-mbuhangu-a jàka handàka mbulangu-da da ananggu pa-kadua-da la dalu hau lodua,” wàna.

⁴⁶Ka panii-nanyaka i Ripuka lai Ihàku, “Nyungga hoda-nanggaka dàngu kumayau-ka paita-ha da papaha-na i Ehaü welingu la kabihu banjaru tau hangàdangu. Jàka na-kanoma anakaria tau Hetimai duna i Yakupu na-rihingu hàmu ka kumeti bia,” wàna.