Read Kambera DEDI 29 Bible Online

DEDI 29 - Kambera bible

DEDI 29

¹I Yakupu na-pangala-nya nalaku-na ba na-hanggangu la tana la pahunga loduna na tana Kanaàngu.

²Hi jia ita-bia-nanya na hau na humuru la padangu, dàngu la lihina pamuku-da-padua ba tailu bàbada da mbimbi da kamàmbi, ba lai nu kàli paita ninja wai. Na humuru nuna pa-padàbingu watu bokulu-ya.

³Jàka da pauhi ndàbaka da mbimbi dàngu da kamàmbi lai nu, kilu-danyaka la halinggi na watu paraï da ma-pawangu hàla hi da-paunu-nja da mbimbi da kamàmbi. Hàlaka patuna nu nyuda da ma-pawangu hi da-pandàbi belinya nuna na humuru.

⁴Hàla paàra-nanjaka i Yakupu nuda da ma-pawangu da maninja lai nu, “Nggi welimi nyimi angu?” wànanja. “Welima la Haràngu,” wàdanya.

⁵Nahili paàrangu i Yakupu, “Mitanda-ya nyimi i Lambàngu, anana i Nahuru?” wànanja. “Matanda-ya,” wàdanya.

⁶“Màla nggàra ehi-naka nu?” hili wàna i Yakupu. “Nda nggàra ehi-ana,” wàdanya. “Tàngaru, nàmu na anana kawini na matamungu Rahilu. Ngàndi-nanja da mbimbi da kamàmbina na amana,” wàdanya.

⁷Napaya i Yakupu, “Ba jiapa biaya-pa na lodu dàngu ndedi jia-aya na rehi pa-patama-nja la oka da mbimbi da kamàmbi. Nggikina nuda da banda hi ndai paita pàkunja wai, hàla kai mangu pa-paniti-nja rumba?” wàna.

⁸Dahema nyuda, “Nyuma duma, hina hi ma-paunu-nja wai da mbimbi jàka da-pauhi hàlaka da kabàba mbimbi lai yiahu dàngu jàka kilu-nyaka na watu ndàbina,” wàda.

⁹Ba talànga panii dana-njaka nu, tàka-nanyaka i Rahilu dàngu da kabàba mbimbi kamàmbi-na.

¹⁰Ba naita-yaka i Rahilu dàngu na kabàba-na paraïna i Yakupu, lua-nanyaka la humuru, hi nakilu-nya na watu ndàbina la halinggi tàka hi na-paunu-nja da kabàba.

¹¹Tunaka nu hi na-puduku-ya i Rahilu, dàngu hi nahii paraï pa-manaüru.

¹²Napanii-nya i Rahilu, “Nyungga anana i Ripuka anawinina na amamu,” wàna. Ka palai-nanyaka i Rahilu beli la umana, la papanii-ya na rukuna nuna la amana.

¹³Ba narongu-yaka i Lambàngu na rukuna i Yakupu, laleba-na, palai-nanyaka palua pa-hàmburu-ya. I Lambàngu na rohuya i Yakupu hi na-puduku-ya, hàla hi na-karia-nya patama la uma. Ba nahàla-ka i Yakupu pa-palara hàlanya naruku-na nyuna lai Lambàngu,

¹⁴napanii i Lambàngu, “Tuba-mana, kalembi nditaku-manggunggau nyumu,” wànanya. I Yakupu engana la uma nuna hau wula pa-tumbukungu-na.

¹⁵La hau lodu panii-nanyaka i Lambàngu lai Yakupu, “Nda nanggepi-a jàka muràma ju - jua bia lai nyungga, jàka jia biaya ba ngaha paana anawini-nggunggau. Pira nu wunda pambuha-mu?” wànanya.

¹⁶I Lambàngu dadua da anana kawini; na ma-maaya Liaya na tamuna, tàka na erina Rahilu-ya.

¹⁷I Lia na tawàla wua[57] matana, tàka i Rahilu na-talonahu ihina dàngu na-manandangu.

¹⁸I Yakupu nambuha-manyaka i Rahilu, jia-duyaka hi nahema-ya i Lambàngu, “Nyungga ku-mbuhangu paràma pihu mbua ndaungu jàka mu-pulingga pa-kanoma-ya i Rahilu,” wànanya na tuyana.

¹⁹Napaya i Lambàngu, “Nahàmu ningupa ka kuwua-nggaunya nyumu, nggàra hi kuwua-nya na tau hawiangu; ndàdiku-wa nyuna yiahu,” wànanya.

²⁰Ka ràma-nanyaka i Yakupu la dalu pihu mbua ndaungu ka peku ngala-nanya i Rahilu, la etina da ndaungu nuda da-làpahu beringu ana pira mbua lodu ada, paraï pambuha-nya nuna na anakaria.

²¹Hàlaka nu i Yakupu napanii dànya i Lambàngu, “Da-làpahu-ka da pihu mbua ndaungu tuya; puli-nggawa ka ku-kanoma-ya na anamu,” wànanya.

²²Hàla i Lambàngu wulu nanyaka mbabu lii lalei-lii mangoma, hi nadunda hàlanya na ihi paraingu.

²³Tàka nu la rudungu, nyuna i Lambàngu nda jiaya i Rahilu-a, tàka jiaya i Lia na pawua-nanya i Yakupu ba na-papohu-nja, ka angu-nanyaka duna i Yakupu nu la rudungu. (

²⁴I Lambàngu nawua-nya na atana kawini i Hilipa lai Lia, ka ata ngàndinanya.)

²⁵Hadangu la mbaru nyuna i Yakupu hinaka hi napinya ba jiaya i Lia na pa-papohu-danya. Ka lua-nanyaka i Yakupu lai Lambàngu hi na-paàranya, “Ka nggikina tuya hi tumungga nu nyungga ba kuràma keha ka kungala-nya i Rahilu wànggu duku. Ka ni hiu panyonga-ka?” wànanya.

²⁶Nahema i Lambàngu, “Tundunya na huri lai yiahu, nda ukua na ma-maeri ka napangga-ya na ma-maaya la pa-mangoma.

²⁷Napa ka nanjàpu paku na remi pihu mbua lodu, napa kuwua-ma-dunggaunya i Rahilu, mili nyuna kau ràmaki pihu mbua ndaungu,” wànanya.

²⁸Jiaya wàna i Yakupu, dàngu ba nalà-pahuka na remi, wua-nanyaka i Rahilu paraïna i Lambàngu, ka papaha-nanya. (

²⁹I Lambàngu nawua-nya na atana kawini i Mbiluha lai Rahilu, ka ata ngàndi-nanya.)

³⁰Nyuna i Yakupu angu-nanyaka i Rahilu, dàngu narihi mbuha-manyapa i Rahilu welingu lai Lia. Tunaka nu ka ràma-nanyaka hili pihu mbua ndaungu.

³¹Ba naita-yaka paraïna i MIRI i Lia ba nda natika pambuha-nya hama tuna i Rahilu paraïna i Yakupu, ka pahia-nanya pa-paana i Lia paraïna i MIRI, tàka i Rahilu ndedi mapa ningu anana.

³²I Lia naworu ihina hi na-paana-nya na haàtu na anakeda mini, “I MIRI naita-yaka na handuka-nggu, nàhu duku mbuha-nanggaka na leinggu,” wàna. Hàla hi na-patamu-nya “Rumbingu”[58] na anana.

³³Hili woru ihi-mananyai i Lia, hi na-paana-nya na haàtu na anakeda mini, “I MIRI nahili wuangga haàtu anakeda mini nadu ba narongu-ka nyungga ba nda nambuha-ngga leinggu,” wàna. Hàla hi na-patamu-nya “Hamiungu”[59] na anana.

³⁴Hili woru ihimananyai i Lia, hi na-paana-nya na haàtu na anakeda mini, “Nàhu na leinggu karitaku-nanyaka duku lai nyungga, nadu ba tau madua haàtu-haka da anakeda mini pa-paana-nggunya.” Hàla hi na-patamu-nya “Lewi”[60] na anana.

³⁵Tunaika nu hili woru ihimananya i Lia, hi na-paana-nya na haàtu na anakeda mini, “Nàhu duku kuwotu-nya i MIRI,” wàna. Hàla hi na-patamu-nya “Yahunda”[61] na anana. Hàlaka nu jiaka-naka pa-paana i Lia.