Read Kambera DEDI 30 Bible Online

DEDI 30 - Kambera bible

DEDI 30

¹Tàka i Rahilu ndedi-mapa ningu anana. Jia-duyaka ba tuna nu hi na-kapihi-nya na ayana, hi na panii danya i Yakupu, “Wuangga duku ananggu, jàka ndia mata ka kumeti bia,” wànanya.

²I Yakupu nambeni-nya i Rahilu, hi napanii, “Nyungga nda Ala-aka. I Alama duna na matuna-nggau nu hi ndau paana,” wànanya.

³Napayai Rahilu, “Yiana na atanggu i Mbiluha; katuda angunya, ka na-paana. Ba tuna màta ka naina-ngga nyungga rukuna nyuna,” wàna.

⁴Ka wua-nanyaka i Mbiluha na leina, tàka i Yakupu hi na katuda angunya nuna na atana.

⁵I Mbiluha naworu ihina hi na-paana-nya na haàtu na anakeda mini.

⁶I Rahilu na panii, “I Ala na-patandangu-ka wai ngeranggu nyungga. Na rongu-yaka na kamahingu-nggu, hi na wuangga haàtu anakeda mini,” wàna. Hàla hi na patamu-nya i Ndàngu[62] na anana.

⁷I Mbiluha hili woru ihi-nanyai hi na-paanangu haàtu anakeda mini.

⁸Napanii i Rahilu, “Nyungga ku-pamukaru mbana etingu, ba ku-hangganya na ayanggu, nu talu-nggunyaka,” wàna. Jia-duyaka hi na-patamu-nya Nàputali[63] na anana.

⁹Ba napà-danguka wikina i Lia ba nda nahili ngalangu-pa ana, wua-nanyaka na atana i Hilipa lai Yakupu ka natuya papaha-na.

¹⁰I Hilipa na-paanangu haàtu anakeda mini.

¹¹Napanii i Lia, “Wangu-manaka duku,” wàna, hàla hi na-patamu-nya Nggàtu[64] na anana.

¹²I Hilipa hili pa-anangu-mananyai haàtu anakeda mini,

¹³napanii i Lia, “Oha-angguka! Nàhu duku mbuu ndàbana na kawini, oha-amuka, wàna hàla-nggaka,” wàna. Jia-duyaka hi na-patamu-nya Ahiaru[65] na anana.

¹⁴Nu la wula muti uhu nggàndumu, wenangu-nanyaka i Rumbingu la maràda, ka hunggu-nanyaka lai nu na pingi ai paworu wàngu,[66] hi nangàndi-nya i Lia na inana. Napanii Rahilu lai Lia, “Wuangga duku hakudu welingu la tàda ai pahunggu-na na anamu,” wànanya.

¹⁵Nahema i Lia, “Ndedi natoma-mapa nu bau wàhiya na leinggu? Nàhu hili kamangu-munyai papiti-ya na tàda ai pahunggu-na na ananggu,” wàna. Napanii i Rahilu, “Jàka mubihu pawua-ngganya nana na tàda aina na anamu lai nyungga, pekuna la rudungu nàhu kau katuda dànya i Yakupu,” wànanya.

¹⁶Ba nabeli-ka i Yakupu la uma welingu la padangu nu la malingu, hàmburu-nanyaka paraïna i Lia hi napanii danya, “Katuda angu-nggawa nyungga la rudungu nàhu, nadu ba mbàda wua-nggunyaka himbalu-na nuna wàngu tàda aina na ananggu,” wàna. Hàla angu-nanyaka nyuna paraïna Yakupu la rudungu nuna.

¹⁷I Ala na-kataku-ya na kamahingu-na i Lia, ka woru ihi-nanyaka hi na-paana-nya na anana na palima wàna.

¹⁸Napanii i Lia, “I Ala nawua-nggaka wundanggu ba kuwua-nyaka i Hilipa na leinggu,” wàna, jia-duyaka hi na-patamu-nya Ihakàru,[67] na anana.

¹⁹Hili woru ihi-mananyai i Lia hi na-paana-nya na anana na panomu wàna.

²⁰Napanii, “I Ala nawua-nggaka tunggunggu mambana manandangu. Nàhu duku tembi-nanggaka na leinggu, nadu ba tau manomu-haka da ananggu mini pa-paananggu,” wàna, jia-duyaka hi na-patamu-nya Hembulungu,[68] na anana.

²¹Hàlaka nu i Lia na-paana-nya na hàatu na anakeda kawini na pa-patamungu Ndina.

²²Hàla ka namu-nanyaka Rahilu paraïna i Ala; na-kataku-ya na hamayangu-na hi pekuna paningu anana.

²³Ka woru ihi-nanyaka i Rahilu. Hi na-paanangu haàtu anakeda mini. Napanii i Rahilu, “I Ala naàli wàru-nyaka na makia-nggu.

²⁴Mala àru i MIRI ka nawua-kingga hili haàtu anakeda mini,” wàna. Jia-duyaka hi na-patamu-nya Yuhupu[69] na anana.

²⁵Ba nahàla-ka i Rahilu pa-paana-nya i Yuhupu, napanii i Yakupu lai Lambàngu “Tuya, puli-nggawa ka kubeli la parainggu.

²⁶Pahia-ngga ka kulaku karia-nja da papaha-nggu da madua hamanai da ananggu. Hi kungala-nja nyuda jiaya ba kuràma lai nyumu Tuya. Pi wiki-mamunya Tuya ba mbàda ràma dira matiki-mangguka,” wànanya.

²⁷Nanapa-ya i Lambàngu, “Rongu pàku: Ku-ngalangu-ka panyura-ya ba rukumu nyumu hi na-pakanyuru-ngga nyungga i MIRI.

²⁸Peka bia nu jàka pira pa-karai-mu,” wànanya.

²⁹Nahema i Yakupu, “Ha tuya, pi wiki-mamunya Tuya ba mbàda ràma dira matiki ma-ngguka, tàka hi da-bonjangu da bandamu ruku pawangu-nggu nyungga-maka.

³⁰Ba ndedi kutàka nyungga, da bandamu nyumu Tuya ndedi pira-ada, tàka nàhu nyumu Tuya tau wulu-kauka. I MIRI na-pakanyuru-nggauka rukunggu nyungga.[70] Nàhu duku jia-yaka na rehina ba kuràma ndumana na kuru uma wikinggu,” wànanya.

³¹Napanii i Lambàngu, “Ka nggàra-maka bàdi ràka pawua-nggunggau?” wànanya. Nahema i Yakupu, “Àmbu nggàradu pawua-mungga Tuya! Nyungga duku daingu-mana ba kupawa-nja da bandamu, mili nu kau pajia-ya na paniinggu Tuya:

³²La lodu nàhu kau pulingga ka kulua la padua kabàba mbimbi kamàmbimu, ka kupiti-ha da ana mbimbi da ma-mitingu,[71] dàngu da ana kamàmbi ma-mbàlangu jàka ndia da ma-kadutulu. Nudaha duku da wundanggu da paora-nggu.

³³La malamiri napa peku pimu-nyaka Tuya na tànjinggu hi ndia. Jàka era maimu pa-tàngaru-ha da wundanggu, jàka mu-itangu kamàmbi manda kadutulu jàka ndia manda mbàlangu, jàka ndia kai mbimbi manda mitingu, pi-maamu-nyaka ba banda pa-manganga-nggunja,” wàna.

³⁴Nahema i Lambàngu, “Jiaya! Napa ka tatundu bianya hama tuna ba wàmu!” wànanya.

³⁵Tàka la lodu nuna i Lambàngu na-kawàri hàlaha da kamàmbi bumbu da ma-pandàningu jàka ndia ma-mbàlangu dàngu jàka ndia maningu bara kalimbungu dàngumbu na-kawàri hàlaha da mbimbi mitingu. Tunaka nu na paràha-nja da anana pa-paloku-ha nuda da banda,

³⁶hàla laku-danyaka hi dangàndi-ha nuda da banda maraünya i Yakupu, tailu mbua loduna ba lakunya. Na rihida da kabàba mbimbi kamàmbi-na i Lambàngu, i Yakupu na mapawa-nja.

³⁷Tunaka nu i Yakupu hi napiti lai muru welingu la ai langira ai nahu dàngu ai haki, nabinu pahonga - pahonga-nja da tàdada hi da-kambora.

³⁸Na-bànjalu-ha nuda da lai ai, la tuba hangga kabàba kamàmbi, daa la ngia paunu-da wai, nadu unungu wai jàka wàda nuda da banda ba da-mbuhangu pa-paminingu.

³⁹Jia-duyaka nuda da kamàmbi jàka da pa-miningu-ka la tubada nuda da ai pa-kambora, napa da anada da pa-ndàningu jàka ndia da-mbàlangu jàka ndia da-kadutulu.

⁴⁰Tunaka nu i Yakupu napiti-ha da mbimbi hi na-pahangga-nja la kamàmbi mbàlangu dàngu mitingu. Ba wàngu pa tuna nu ngalangu duna-nyaka kabàba banda wikina dàngu hi na-kawàri-ha welingu la kabàba bandana i Lambàngu.

⁴¹Jàka era pa-miningu-daka da banda da ma-halangatu, bànjalu-nanjaka da ai pa-kambora-na la hanggada nuda da banda, nu daa la ngia paunu-da wai.

⁴²Tàka na-nyuna nuda da lai ai nda na-bànjalu-aha la tubada da banda da ma-mangonangu. Jia ba tuna mbuu ndàbada da banda da mabara da-mangonangu, nu jia-duhaka da bandana i Lambàngu, tàka mbuu ndàbada da banda da ma-mamitingu, da ma-mbàlangu dàngu da ma-kadutulu da-halangatu, nu jia-duhaka da bandana i Yakupu.

⁴³Ba tunaka nu jia-duyaka i Yakupu hi lupa wulu nda ukuya. Nyuna ningu dangu kabàba mbimbi, kamàmbi, ota, kalandai, dàngu ata danguna.