Read Kambera DEDI 32 Bible Online

DEDI 32 - Kambera bible

DEDI 32

¹I Yakupu na-pangala-nya na àndana. Hàla nàmu-njaka ba pi - piraha da papalewa da mamai tomaya.

²Ba naita-haka nyuda i Yakupu, panii-nanyaka, “Yiana pamaü terangu-na i Alaya” wàna; jia-duyaka na pangia nuna hi na-patamu-nya Mahanaïmu.[77]

³Hàlaka nu i Yakupu na-paràhangu ba pira - piraha da tau papalewa da malaku mangilu-nya nyuna la tana Endumu, la palua tomaya i Ehaü na ayana.

⁴I Yakupu na-wuanja kareuku nyuda, “Paniinya na ayanggu i Ehaü, ‘Nyungga Yakupu, atamu. Ba mandai tunggu nu, enganggu lai Lambàngu.

⁵Nàhu ninguka hapi, kalandai, mbimbi, kamàmbi dàngu atanggu. Ku pangàndi-nya langu na miringgu, na pamonu-nggu ka nahàmu na etina, wàna, wàminya,’ ” wànanja.

⁶Nu ba dabeli-ka da papalewa lai Yakupu dapanii, “Malua-duka lai Ehaü, na ayamu dàngu nyuna nàmu-manyaka nàmu la pamai pa-tàbuku-kau nyumu. Nàmu tau patu ngahuya na karia-na,” wàdanya.

⁷Narongu-yaka nuna i Yakupu lalu mbana mangàdatu-ya dàngu namimu na etina. Hàla hi na-kawàri-ha da tau karia-na ba na-kadua jurunja, tuna numbu da mbimbi, da kamàmbi, da hapi dàngu da otana.

⁸La pa-kanandi-na, “Jàka era tàkana i Ehaü, hi na-nàhaku-ya na juru ma-mangilu, talànga wànguna na juru padua wàna peku-naka la pa-pamara wikida,” wàna.

⁹Tunaka nu ka hamayangu-nanyaka i Yakupu, “Ou Ala, na palumu-na na bokunggu i Ambarahàmu dàngu na amanggu i Ihàku, patingi àrungga! Nyumu MIRI ma-paràhangga pabeli la tananggu dàngu la nua kalembinggu. Dàngu Nyumu MIRI ma-panjanjingu la pa-palànyapu pahàmu-nya mbuu ndàbana ndumanggu nyungga.

¹⁰Nda ràka-ana duku MIRI la pangera hàlanya na mbuhangu-mu dàngu na tuturu-mu na pambàda paita-mungga. La rehi lakunggu àmangu ba ku-palaya na Luku Yorundangu, nda nggàra-a pangàndi-nggu hinggilu-na na tokungu-nggu. Nàhu ba kubeli dua juru-ngguka.

¹¹Ku kamahi weli etinggau MIRI, pamara àruka welingu la ayanggu i Ehaü. Ku-mangàdatu napa hi mainanya pa-nàhaku bia-kama la papamàu hàla-kama, hamanai da kawini da anakeda wànggu.

¹²Namuya i MIRI ba mbàda pa-njanjingu-muka la pa-palànyapu pahàmu-nya mbuu ndàbana ndumanggu nyungga dàngu la pawua-ngga wàla wuanggu madangu. Nda ningu haàtu mamàka padiha-ya nadu na danguna ba hama wara la tehiku-ya ba wàmu,” wàna.

¹³Ba natodu-ka la rudungu nuna lai nu, kawàri-nanjaka hawiangu i Yakupu da bandana pawua-nanya i Ehaü. Da pawua-na: 200 kamàmbi bai, dua kambulu kamàmbi bumbu, 200 mbimbi bai, dua kambulu mbimbi bumbu, tailu kambulu ota ma-pahuhu dàngu anangu, patu kambulu hapi bai, hakambulu hapi mini, dua kambulu kalandai bai dàngu hakambulu kalandai mini.

¹⁶Na-kawàri - wàriha nuda da banda hi ningu pira juruda, nimbihu-da na-pakata-nja la haàtu ata. Napanii-nja, “Ilaku mangilu padua nyimi, manggangu ka ningu ma-manggawangu la hajuru welingu la hajuru,” wànanja.

¹⁷I Yakupu nawua-nya pareta na ata ma-mangilu, “Jàka era jàmburu-nanggau na ayanggu i Ehaü, ka na-paàrangu, ‘Nggamuya na mirimu? Nggi luamu? Nggamu mangu-danja nada da banda paweli-mu?’ jàka wànanggau.

¹⁸Kau hemaya, ‘Manguna na atamu i Yakupu. Na-pangàndi-nja yiada, ka kuwua-nya i Ehaü na miringgu, wàna. Na atamu i Yakupu nàmu-nyapa duna la kajia-ma nyuma’ wàmu,” wànanya.

¹⁹La atana na padua wàna, na patailu wàna dàngu mbuu ndàbana na tau na pa-patanggu-na la pa-paloku-ha da kabàba-na, hama-mana na pareta pawua-nanja. Ba nareki-ya i Yakupu pekuna la pa-pamanda-nya i Ehaü ba na-wuaha nuda da pawua-nanya, napa jàka da-pahàmburu ka na-muluru wàngu na etina i Ehaü, wàna.

²¹Jia-duyaka hi na-pangàndi mangilu-nja nuda da pawua-na, tàka nyuna todu-nanyapa la maü.

²²Nu la rudungu nunama i Yakupu na-hadangu, hi nakaria-nja da papaha-na ba duada, da kala wihina ba dadua dàngu ba hakambulu haàtuda da anana, dapala-ya na Luku Yambuku.

²³Ba na-papala-njaka, beli-nanyaka hi na-papala hàlanja da bandana la hapapa.

²⁴Tàka nyuna wiki ndàdiku meha-nanyapa. Ka tàka-nanyaka na haàtu na tau mini na ma-paudulu dànya i Yakupu lundu mareni hariina.

²⁵Nuna na tau ba napàda-nyaka ba ràkangu nda taluna nu la pa-udulungu, làndahu-nanyaka na kinjiru-na i Yakupu, hi lupa na-pahili na kawohu-ku kinjiru-na.

²⁶Napanii na tau, “Pulingga; ba hungga-amana-ka na lodu,” wàna. Nahema i Yakupu, “Nda kupuli-anggau, hinggilu-na jàka mu-pakanyuru-ngga,” hi wàna.

²⁷“Nggamuya na tamumu?” wàna na tau ba na-paàrangu. “Yakupu-ka,” wàna i Yakupu.

²⁸Napaya na tau nuna, “Na tamumu nda Yakupu-ayapa. Nyumu mu-paudulu danya i Ala lupa dàngu tau, nyumu matalu; ba tuna Ihirailu[78]-yaka na tamu,” wànanya.

²⁹Napaya i Yakupu, “Ka nyumu MIRI, peka-ngganya na tamumu,” wànanya. Tàka nahema nuna na tau, “Nda nggàra muihi wàngua bau paàrangu nggamuya na tamunggu!” wànanya. Ka pa-kanyuru-nanyaka i Yakupu.

³⁰Tunaka nu panii-nanyaka i Yakupu, “Nyungga ku-pahàmburu mata dànyaka i Ala, dàngu luri bia-nggunyapa,” wàna. Jia-duyaka na pangia nuna na-patamu-nya Panialu.[79]

³¹Ba nahunga-ka na mata lodu dunjaku-nanyaka na Panialu i Yakupu dàngu na-kanjiku-ka ba na-pahili na kinjiru-na.

³²Lundu nàhumbu da wàla wuanai Ihirailu nda ningu mabihu pangangu tolu banda ma-kamburu-nya na kawohuku kinjiru-na, nadu ba pa-làndahu weli kinjiru-duya i Yakupu.