Read Kambera DEDI 34 Bible Online

DEDI 34 - Kambera bible

DEDI 34

¹La hau lodu i Ndina anana kawini i Yakupu dàngu i Lia, nalua pambawa la kawini Kanaàngu ba mapira-ha.

²Ba naita-yaka i Ndina paraïna Hikimu anana i Hemuru tau Hewi na ma-hanganji la ngabana lai nu ka palai ngàndi-nanyaka nu na anakaria hi na-rumbaku-ya.

³Nyuna mataru nda uku-nanya i Ndina, ba lalu payila etiya lai nyuna jia-duyaka hi na-parukangu keha ka nambuha-ngga, [82] ba wàna.

⁴I Hikimu na paniinya na amana, “Màla làti ama kau parukangu àru pangala-nya na bidi kawini nuna tunggunggu nyungga. Kumbuha-nya ka kutuu papahanggu wànggu,” wànanya.

⁵Narongu-maka i Yakupu ba na-pairaku-yaka tau na-paili wàna na anana, ba tuna ba talànga la maràda-hapa da anana pa-pawangu banda, ndedi nggiki wàna-a ba ndedi dabeli.

⁶I Hemuru, amana i Hikimu, namai lai Yakupu pa-pahama dànya.

⁷Jia-mayai duda na tàkada da anana i Yakupu welingu la padangu. Ba darongu-yaka nuna na matumbu, katàtaku-danyaka dàngu kanjupu karaü-ha da etida. Nadu ba na wàngu pa-rumbaku tunanya nu na anana i Yakupu, pa-makia hàla-mananya na tau Ihirailu paraïna i Hikimu, wàdaka.

⁸Ka tungu-nanyaka panii i Hemuru lai Yakupu, “Na ananggu i Hikimu, nambuha-nyaka na anamu; ku-kamahi-nggau kau pahia àrunya na ananggu ka napiti-ya wànggu.

⁹Màlawa ka tawunda lii pa-hàmangu, na banjaru-mi nyimi dàngu na banjaru-ma nyuma, màta ka da-pahaürungu na lalei na mangoma-da.

¹⁰Nyimi kai ngia dànggama nyuma la tana yiana; la nggi bia na pambuha-mi. Wàngu bia etimi bai danggangu dàngu bai wulu banda,” wàna.

¹¹Tunaka nu panii-nanyaka i Hikimu la amana i Ndina dàngu da aya-naka, “Patutu àrunya yiana na pakarai-nggu, napa nyungga duku kuwua-manggai nggàra bia pambuha-mi.

¹²Pekawa jàka nggàra pawua-nggu pambuha-mi, dàngu jàka pira nu banda wilina. Kuwua-manggai duku nggàra bia pakarai-mi, mili àru kai pahia-ngga papiti-ya nu na anakaria,” wàna.

¹³Tàka ba mbàda kajari-nanyaka na paili wàna i Ndina paraïna i Hikimu na erida i Ndina, panii kambàliku-danyaka da anana i Yakupu lai Hikimu dàngu i Hemuru na amana.

¹⁴Dapanii-nja nuda da tau madua, “Ma-makia nyuma jàka ma-pahia-nya na erima la pa-mangoma la tau manda kàri.

¹⁵Hi ma-patunju-aya nyuma nuna na pakarai-mu, ningu hauna na kalaratu, jiaya: Mbuu ndàbami mihama-nggama nyuma bàdi, nu mbuu ndàbana na mini lai nyimi lupangu nakàri-ma bàdi.

¹⁶Hàlaka patuna nu jia-yaka duna hi ma-patunju-ya na patumu na ngera lalei mangoma pa-haürungu ba wàmu. Pa-daingu-manyaka napa la hongami nyimi la paangu banjaru-nggai nyimi.

¹⁷Tàka jàka ndai tundungu la pawànya na kalaratu-ma nyuma ba ndai bihu pakàri, napa mapiti beliya duma nu na ana karia hi malaku ngàndiya,” wàda.

¹⁸I Hemuru dàngu i Hikimu da-pangàda-nya ba ràka-mana nuna na kalaratu,

¹⁹nyuna i Hikimu na-mbuhangu-ma pa-patutu-nya nuna na kalaratu nadu ba mbuha-mananya i Ndina. Nu la honga nua kalembi-na, jiaya nyuna i Hikimu na marihi pangaru.

²⁰Tunaka nu i Hemuru dàngu i Hikimu lua-danyaka la kàli ngia pa-pauhi la pindu bokulu paraingu, hi dapanii dànja da angu paraingu-da,

²¹“Da tau Ihirailu ariyaa-ndanja, jia ba tuna màta bianja ka da ngiangu la tana yiana dàngu nyuta, dàngu ka dawàngu eti biada ba da-paluangu ba da pa-maingu. Yiana na tana ba na-lerangu madu ba da-ngiangu ningu nyuda. Màta ka peku piti-ndaha da anada kawini nyuda, dàngu nyudambu ka peku piti-daha da ananda kawini nyuta.

²²Na nyuna da tau nuda hi da-mbuhangu pa-ndàdiku dànda nyuta dàngu la papohu banjarungu dàngu nyuta ningu kalaratu-na: nu mbuu ndàbana na mini lai nyuta kàri bàdi hama tuna nyuda.

²³Napa mbuu ndàbada da kabàba bandada dàngu mbuu ndàbada da malanja-da mangunda nyuta-haka. Jia-duya màlawa ka tatundu-nya na pakarai-da nyuda ka peku ndàdiku angu-danda nyuta,” wàda.

²⁴Mbuu ndàbana na angu paraingu-da da ma-pauhi da-pajia-ya na papanii-da i Hemuru dàngu i Hikimu, nu ka kàri hàla-danyaka da tau matua - tau matua-ka la paraingu nuna.

²⁵Palàngangu-ka tailu mbua lodu, nu ba dahidu biapa ruku kàri da tau mini, da madua da anana i Yakupu, da ayana i Ndina, i Hamiungu dàngu i Lewi, dapiti-ha da hapanda-da, hi datama kangunguhu daa la paraingu. Tunaka nu ka pameti hàla madua-danjaka da mini lai nu,

²⁶jia-mbuha i Hemuru dàngu i Hikimu. Hi dapiti-ya i Ndina, welingu la umana i Hikimu hi dalaku.

²⁷Ba dahàla-ka pa-pameti-ha nu, tama-danyaka pa-rambangu da anana hawiangu i Yakupu ka hilu kiringu-ya rukuna ba pa-kajari-yaka na paili wàna na erida.

²⁸Dapiti-ha da kabàba mbimbi, kamàmbi, hapi, kalandai dàngu mbuu ndàbada da maninja la kuru paraingu dàngu la maràda.

²⁹Dapiti hàlaha da malanja da ma-pawilingu, da-tanawa hàlanja da kawini dàngu da anakeda, dàngu hi dawàhi hàlaha da ihida da umaka la paraingu lai nu.

³⁰I Yakupu napanii-nja i Hamiungu dàngu i Lewi, “Pa-handuka-mamingga nyungga. Nàhu na tau Kanaàngu dàngu na tau Perihu dàngu mbuu ndàbana na ma-mandapu-nya na tana yiana napa da paumbi-ngga. Da taunda nyuta nda dadangu-a; jàka da-pambulungu ndàbaka da tau da ma-ngiangu la tana yiana tàka ka dahada-ngga nyungga, nggubulu-nda nyuta dàngu ihi kuru umanda pa-patàlaru-ta napa,” wàna.

³¹Tàka dahema nyuda, “Nda mamàta-anya ba tudanya nu na erima hama tuna na kawini pahunda,” wàda.