Read Kambera DEDI 35 Bible Online

DEDI 35 - Kambera bible

DEDI 35

¹Na hau na lodu i Ala napanii-nya i Yakupu, “Nyungga-maka Ala na ma-paitangu wikina lai nyumu ba jiaya na palaimu welingu la ayamu i Ehaü. Laku pa-renggangu la Mbetilu. Ndàdiku-wa lai nu dàngu kau pa-hadangu hau ngia pawotu maraku ndumanggu,” wànanya.

²Ka panii dana-njaka i Yakupu da ihi umana dàngu mbuu ndàbada da tau da anguna nyuna, “Napa ta-hadangu welingu yiahu hi talaku la Mbetilu. Lai nu nyungga pahadangu-nggunyaka hau ngia pawotu maraku ndumana i Ala, na mambàda ndulaka ba talànga ningga la handuka dàngu na mamangga-ngga jiapa nda ngginika ba kulaku ningu. Jia ba tuna wàru-njawa da kahala hada marapu hangàdangu da maninja lai nyimi; paloku-yawa na lii pa-yahangu wiki dàngu kai wotu pakimi ma-yahangu,” wànanja.

⁴Ka wua-danyaka i Yakupu mbuu ndàbada da kahala hada marapu hangàdangu da maninja lai nyuda hamanai da pula-mbuda. Mbuu ndabàda nuda da malanja natani-nja paraïna i Yakupu la lumbu ai bokulu la lihi paraingu Hikimu.

⁵La rehi hadangu-na i Yakupu dàngu na juru kalembi-na, i Ala na-pamaradapu-ya nggubulu-na na mangia-nja da paraingu weli winggiru-na, tuna-nuduka hi nda dakeha-nya i Yakupu dàngu na juruna.

⁶Ka tàka-danyaka la paraingu Mbetilu la tana Kanaàngu, àmangu la Luhu ba wàdanya.

⁷Lai nu i Yakupu na-pandolaku hau ngia pawotu maraku hi natunya tamuna lai nu “Eli-Mbetilu” wànanya, nu hi wàna ka ba lai nudu ba na-paitangu wikina i Ala lai nyuna ba jiaya na palaina welingu la ayana.

⁸Lai numbu i Ndembora, na ina kabidangu-na i Ripuka nameti ningu hi taninya la lumbu ai bokulu la mbara luru paraingu. Nunaya na pakiri-na na pingi ai nuna “Pingi Ai Hii” hi wadànya.

⁹Ba nabeli-ka i Yakupu welingu la Mahupatamia, nahili pa-itangu wikina Ala lai nyuna hi na-pakanyuru-nya.

¹⁰Napanii i Ala lai nyuna, “Nyumu nda hili Yakupu-akaupa, tàka Ihirailu-kauka,” wànanya. Tuna nu i Ala ba natunya tamuna, Ihirailu ba wànanya.

¹¹Ka hili panii-nanyaka i Ala, “Nyungga-maka Ala Mahupu-mbiha. Màtawa kau paana umbukungu pada - dangu! Nyumu napa jiakau ngia pawelina na banjaru danguka dàngu boku la mangilu-da da hanganji dangukau.

¹²Na tana na pambàda wua-nggunya i Ambarahàmu dàngu i Ihàku napa ku-pakata-nggaunya nyumu dàngu na wàla wuamu,” wàna.

¹³Hàlaka nu i Ala hi na-dunjaku-nya i Yakupu.

¹⁴La ngia pa-paniina i Ala lai Yakupu, pa-ndolaku-nanyaka hau watu tanda. Hàla na watu nuna hi na-maraku-wànya lai Ala, ba naburi-nya angguru dàngu mina haitungu la pinuna.

¹⁵Na pangia nuna na-patamu-nya, “Mbetilu”.

¹⁶Hàlaka nu i Yakupu dàngu na juruna dunjaku-danyaka la Mbetilu. Nu ba harangu marau-ipa welingu la Epurata, toma-nanyaka na rehina i Rahilu pa-habola. Tàka naharui na-habola-nanya na anana.

¹⁷Ba na-làmburu-ka na katiu habola-na panii-nanyaka na ma-patika, “Pa-bokulu-ya na etimu Rahilu, na anamu hili anakeda mini-maya,” wànanya.

¹⁸Ba tuna i Rahilu mareni-ama-naka na njàpuna, mbotawa ba wànaka na kayeku-na, na-patamu-nya, Mbeni-Oni[83] na anana, tàka na amana duna na-patamu-nya Mbanyamingu.[84]

¹⁹Ba nameti-ka i Rahilu, tani-danyaka la hingi ànda na ma-hanggangu la Epurata, nàhu la Mbetulehimu, ba wàdanya.

²⁰I Yakupu na-pahadangu watu tanda panda mbulangu lai nu, tàka lupa la lodu nàhumbu, na tanda retina i Rahilu jia-mayapa na watu nuna.

²¹Hàlaka nu i Yakupu na-pangala-nya na lakuna, hi na-pandàngi maüna la hau pangia ba làpahu-nya na lewatu Endiru.

²²Ba talànga ninya lai nu, i Rumbingu katuda angu-nanyaka i Mbiluha na kala wihina na amana, na rukuna nuna narongu-maka i Yakupu, dàngu mbeni nda uku[85]-ya. I Yakupu ningu anana tau hakambulu madua mini.

²³Da anana i Lia, jiaha i Rumbingu (ana ma-maaya dehina na i Yakupu), i Hamiungu, i Lewi, i Yahunda, i Ihakàru dàngu i Hembulungu.

²⁴Da anana i Rahilu jiaha i Yuhupu dàngu i Mbanyamingu.

²⁵Da anana i Mbiluha, atana i Rahilu, jiaha i Ndàngu dàngu i Nàputali.

²⁶Da anana i Hilipa, atana i Lia, jiaha i Nggàtu dàngu i Ahiaru. Nuda da anana dedida la Mahupatamia.

²⁷Ka tàka-nanyaka i Yakupu lai Ihàku na amana, la ngia pa-ngiangu-na la Màmurei lihina la Hemburungu (Àmangu i Ambarahàmu, na bokuna lai numayai na-ngiangu ningu.)

²⁸Kaweda nàkapu-mana-nyaka i Ihàku, ka ba 180 ndau-dunaka na lurina hi namangu pameti, ka tani-danyaka paraï da anana, i Ehaü dàngu i Yakupu.