Read Kambera DEDI 36 Bible Online

DEDI 36 - Kambera bible

DEDI 36

¹Yiada-haka da wàla wuana i Ehaü, i Endumu ba wàda-mbunya.

²I Ehaü napaha-ha ba tau madua haàtu-ha da kawini Kanaàngu nu: i Anda, anana i Elungu tau Hetu; i Ohulimbama anana i Ana, umbuku-na i Himbiungu,[86] tau Hewi;

³i Mbàhamàtu, anana i Ihimailu, dàngu erina i Nembayutu.

⁴I Anda na-paana-nya i Elipàhu, i Mbàhamàtu na-paana-nya i Rehuilu,

⁵tàka i Ohulimbama na-paana-nya i Yeuhu, i Yaelàmu dàngu i Kora. Mbuu ndàbada da anana dedida la tana Kanaàngu.

⁶Tunaka nu i Ehaü dunjaku-nanyaka i Yakupu hi nalaku la hau paraingu, na-karia hàla-manja da papaha-na, da anana dàngu mbuu ndàbana na tau la kuru umana hamanai mbuu ndàbada da bandana dàngu da malanja-na da pambàda ngalana la tana Kanaangu.

⁷I Ehaü na-pahewa dànya i Yakupu maa ba lalu mbana danguda da bandada jia hi nda peku ngia duangu-da lai nu. Hinggilu-nai nu na tana ngia pa-ngiangu-da nanjaka-nja pangada da bandada da malalu mbana danguda.

⁸Ka pa-engangu-nanyaka i Ehaü, i Endumu ba wàda-mbunya la ngabana na ma-palindingu la Heyiru.

⁹Yia-dahaka da wàla wuana i Ehaü, boku la mangilu-na na tau Endumu.

¹⁰Na papaha-na i Ehaü na ma-tamungu Anda na-paanangu haàtu anakeda mini, Elipàhu-ya na tamuna. Tàka i Elipàhu dalima da anana mini nu: i Temàngu, i Omaru, i Hepu, i Nggaitàmu dàngu i Kenàhu. I Elipahu ningu kala wihina, Timuna-ya na tamuna. Nyuna na pa-anangu haàtu anakeda mini Amaliku-ya na tamuna. Na papaha-na i Ehaü na ma-tamungu Mbàhamàtu na-paanangu haàtu anakeda mini, Rehuilu-ya na tamuna. Nyuna i Rehuilu dapatu da anana mini nu: i Nahàtu, i Heràhu, i Hama dàngu i Miha.

¹⁴Na papaha-na i Ehaü na ma-tamungu Ohulimbama, na anana i Ana dàngu na umbuku-na i Himbiungu,[87] na-paanangu tau madua haàtu anakeda mini nu: i Yeuhu, i Yailamu dàngu i Kora.

¹⁵Yiada-haka da ina ama kabihu wàla wuana i Ehaü: i Elipàhu, ana ma-maaya dehina i Ehaü, jia-duyaka na boku la mangilu-da da kabihu da ma-pandàkingu yiada: Temàngu, Omaru, Hepu, Kenahu,

¹⁶Kora, Nggaitàmu dàngu Amaliku. Nyuda mbuu ndàbada wàla wuana i Anda, papaha-na i Ehaü.

¹⁷I Rehuilu, anana i Ehaü, jia-yaka na boku la mangilu-da da kabihu yiada da ma-pandàkingu: Nahàtu, i Heràhu, Hama dàngu Miha. Nyuda mbuu ndàbada wàla wuana i Mbàhamàtu, papaha-na i Ehaü.

¹⁸Da kabihu da ma-pandàkingu yiada jia-duhaka da wàla wuana i Ehaü welingu la papaha-na na ma-tamungu Ohulimbama anana i Ana, nu: Yeuhu, Yaelàmu dàngu Kora.

¹⁹Mbuu ndàbada nuda da kabihu wàla wuana i Ehaü-ha.

²⁰Na mangia memanya na tana Endumu, paheka-nya kabihu-na la wàla wuana i Heyiru, tau Hori. Nuda da kabihu jia-duhaka: Lotàngu, Hombàlu, Himbiungu, Ana, Ndihiungu, Ehiru dàngu Ndihiangu.

²²I Lotàngu jia-duyaka na boku la mangilu-na na kabihu Hori dàngu Hemàngu. (I Lotàngu ninya na anawini-na, jia-duyaka i Timuna.)

²³I Hombàlu jia-duyaka na boku la mangilu-na na kabihu: Aluwàngu, Manahàtu, Embàlu, Hepu dàngu Onàmu.

²⁴I Himbiungu da dua da anana mini, nu i Aya dàngu i Ana. (I Ana jia-duyaka na ma-hungguha da humuru wai mbana la maràda telangu, ba talànga pawa-nanja da kalandai-na na amana.)

²⁵I Ana jia-duyaka na amana i Ndihiungu, tàka Ndihiungu jia-duyaka na boku la mangilu-na na kabihu: Hemindàngu, Ehimbàngu, Yituràngu dàngu i Keràngu. I Ana ningumbu haàtu anana kawini, na tamuna Ohulimbama.

²⁷I Ehiru boku la mangilu-na na kabihu: Mbiluhàngu, Haawàngu dàngu Akàngu.

²⁸I Ndihàngu boku la mangilu-na na kabihu Uhu dàngu Aràngu.

²⁹Yiada-haka da kabihu Hori la tana Endumu: Lotàngu, Hombàlu, Himbiungu, Ana, Ndihiungu, Ehiru dàngu Ndihiangu.

³¹Ba ndedipa ningu hanganji ma-pareta la Ihirailu, yiada da hanganji da ma-pareta la tana Endumu, da ma-pandàki - pandàkingu: I Mbela anana i Mbeuru welingu la Ndinuhamba. I Yombàpu anana i Njera welingu Mbòhura. I Huhiamu welingu la ngaba la Temàngu. I Handàtu anana i Mbendàtu welingu la Awitu (nyunaka na matalu-ha da tau Mindiangu la pabera la ngaba Muapu.) I Hàmula welingu la Màhareka. I Haulu welingu la Rihombutu la hingi luku. I Mbaàlu-Hanàngu anana i Àkumburu. I Handaru welingu la Pahu (na tamu papaha-na i Mehitambeyilu, anana i Màtaretu dàngu umbuku-na i Mihahàpu).

⁴⁰I Ehaü jia-yaka na boku la mangilu-da da kabihu - kabihu Endumu yiada da ma-pandàkingu: Timuna, Àluwa, Yetitu, Ohulimbama, Ela, Pinungu, Kenàhu, Temàngu, Mipunjaru, Màkandialu, dàngu Iramu. Da tamuda da nimbihu kabihu jiaha da pa-patamu wàdanja da ngaba ngia pa-ngiangu-da.