Read Kambera DEDI 38 Bible Online

DEDI 38 - Kambera bible

DEDI 38

¹Talànga wanguna la rehi nuna i Yahunda na-dunjaku-nja da anguna paluhu tàka hi na-ndàdiku angunya i Hïra, haàtu tau mini ma-pawelingu la paraingu Andulàmu.

²Lai nu i Yahunda da-patanda dàngu na haàtu anakaria Kanaàngu, anana i Hua, ka pa-kanoma-danyaka.

³Na ana kawunga-da anakeda miniya, na-patamu-nya Eru, paraïna amana.

⁴Na anada na padua wàda, anakeda mini-mayai, da-patamu-nya Onamu.

⁵Na anada na padua haàtu wàda, anakeda mini-mayai hi da-patamu-nya Hiyela. Ba nadedi i Hiyela, i Yahunda talànga ninya la Kehipu.

⁶I Yahunda na-palalei-ya i Eru, na ana ma-maaya dehina napiti-nya i Tamàru.

⁷Na hurina i Eru na-akatu, hi lupa nahàngga i MIRI tàka hi na-pameti-ya.

⁸Tàka i Yahunda hi napanii-nya i Onamu erina i Eru, “Luawa la papaha pameti wàruna na ayamu, kau katuda angunya. Palundu-nya na wai ngeramu lai nyuna, nadu nyumu ba erina na leinanggau; ba tumu nu ka peku ningu kawuku-na na ayamu,” wànanya.

⁹Tàka i Onamu na pinya, da anana napa ba nda manguna nyunaha. Jia-duyaka handaka - handaka jàka na angunya na baluna, na-pahàla-maanya la hambeli na wai woruna, ka àmbu ningu kawuku-na na ayanggu ba wàna.

¹⁰Nu ba tuna nu nahàngga wànya i MIRI, hi na-pameti-mbuya.

¹¹Tunaka nu i Yahunda panii-nanyaka i Tamàru na rii anana, “Beliwa la uma ina amamu, kau ndàdiku lai nu ba kawini meti leikau ka lupa na-matua na ananggu i Hiyela,” wàna. Hi napanii tuna nu mangàdatu-nanya napa hi nahili pameti bia-yaka i Hiyela paraïna i MIRI, hama tuna da ayana da madua wàna. Ka beli-nanyaka duna i Tamàru la uma ina amana.

¹²Ngala mandai-naka la lodu malamiri meti-nanyaka na papaha-na i Yahunda. Ba nanjàpu-ka na lodu hawina-na, i Yahunda nawànda-ya i Hira na anguna welingu la Andulàmu, palua la Timuna, na ngia pangguti-nja da wulu mbimbina.

¹³I Tamàru narongu ba nàmunya na ama yenuna la Timuna la pa-nggutingu wulu mbimbina.

¹⁴Ka pahilu-nanjaka da paki kawini meti lei hi na paki ningu paki hau. Hi na-palumburu wànya tera tamalingu na matana, hàla mandapu-nanyaka la pindu bokulu paraingu Enaïmu, na maninya la ànda ma-hanggangu la Timuna. I Tamàru napi-manyaka i Hiyela, ana kamuri-na i Yahunda ba matua-nanyaka, tàka ndedi na-papohu-nya dàngu nuna na bidi mini.

¹⁵Ba naita-yaka i Tamàru paraïna i Yahunda, ba nakaka-ya kawini pahunda-ya ihu duna wàna bia, nadu ba na-palumburungu matana.

¹⁶Ka lua-nanyaka i Yahunda palihi-nya nu la hingi ànda, hi napulu-danya, “Pira pakarai-mu?” hi wànanya. Nyuna nda napinya na kawini nuna ba jiaya na rii anana. Napaya i Tamàru, “Nyumu kàka duna umbu,” wàna.

¹⁷Nahili panii i Yahunda, “Napa ka ku-wuanggau heu kamàmbi kamboka,” wànanya. Nahema i Tamàru, “Màla nyuna, mili ningu payàpa-nggu, ka lupa mu-pangàndi-nya nuna na kamàmbi,” wàna.

¹⁸“Nggàra payàpa-ka nu?” hi wàna i Yahunda. Nahema i Tamàru, “Wua-ngganya nana na ndata tamumu mangu likuna dàngumbu na tokungu-mu,” wànanya. Ka wua-nanyaka nuda da malanja, hàla ka paangu-danyaka, nu ka woru ihi-nanyaka i Tamàru.

¹⁹Beli-nanyaka i Tamàru la umana, hi na-bunggahu-ya na lumburu matana, hàla hi nawotu beliha da paki kawini meti leina.

²⁰Pi - pira na rehi malamiri, i Yahunda paràha-nanyaka i Hira na anguna, palua patunya na kamàmbi dàngu la pakarai beliha da malanja pa-payàpa-nanya, tàka i Hira nda nahunggu-ya nuna kawini.

²¹I Hira na-paàra - àrangu la tau la Enaïmu, “Nggiya na kawini pahunda na-makàli napa tau la hingi ànda yiana?” wàna. “Nda kàli ningua kawini pahunda lai yiahu,” hi wàdanya.

²²Ka beli-nanyaka duna i Hira lai Yahunda hi napanii-nya, “Nda kuhunggu-aya nuna na kawini. Tundunya na panii tau lai nu, wàngu pànda ninguma duna kawini pahunda lai nu,” wàna.

²³Napaya i Yahunda, “Màta bia-njaka duda da malanja ka namàngi-nja, mili àmbu ta-makia nyuna. Keha ka kuwua-nya wànggu-maka làti, tàka ba ndau hunggu-duyai,” wànanya.

²⁴Palàngangu-ka ràka tailu mbua wulangu ka rongu-nanyaka i Yahunda, i Tamàru na rii anana, na-pahada kawini pahunda-ka wikina, nu pa-anakedangu-nanyaka. Ka wuangu-nanyaka pareta i Yahunda, “Lua papiti-ya ka tunuya ka lupa nameti!” wànaka.

²⁵Ba talànga luhu ngàndi-danyaka i Tamàru la hambeli, pangàndi-nanyaka langu na ama yenuna, “Nyungga natungga ihi kambunggu na tau na mamangu-nja yiada da malanja. Pareha-ya jàka nggamu mamangu-nja yiada na ndata tamu dàngu likuna, hamanai yiana na tokungu,” wànaka.

²⁶Natanda-haka i Yahunda nuda da malanja, ka panii-nanyaka, “Nda nanjala-a nuna na tau kawini. Nyungga manda palundu-nya na wai ngeranggu lai nyuna; làti duna lupangu-maka ku-papohu-nja dàngu na ananggu i Hiyela,” wàna. I Yahunda nda nahili angu-anyapa i Tamàru.

²⁷Ba jia-yaka na rehi habola-na i Tamàru, pi-danyaka ba habolangu-nanya ana ndua.

²⁸Ba talànga habola-na nu, na haàtu na anarara la kambu na-paluhu-ya na limana, tàka na kawini patika hi nayapa-ya hi nahondu-nya lulu kamba rara. Napanii, “Na anakeda yiana na madedi mangilu,” wàna.

²⁹Tàka nuna na anana rara na-pandàngi beliya na limana, tàka na anarara haàtu jia-yaka na madedi mangilu. Jia-duyaka na ma-patika hi napanii, “Nuya na hurimu bau pa-hihiku paluhu!” hi wàna. Ka patamu-danyaka na anarara na madedi mangilu Perihu[92] wàdanya.

³⁰Hàlaka nu hinaka hi nadedi duna na ma-maeri na maningu lulu kamba rarangu la limana. Nyuna hi da-patamu-nya Heràhu wàdanya.