Read Kambera DEDI 40 Bible Online

DEDI 40 - Kambera bible

DEDI 40

¹Palàngangu-ka pi - pirana na rehi malamiri da tau madua da malumu-nya na hanganji, nu na ma-paloku-nya pa-unungu dàngu na ma-paloku-nya pangangu ningu panjala-da la hanganji.

²Ka hàngga-nanjaka nuda da tau madua da malumu-nya paraïna hanganji,

³hi na-patama-nja la uma kapàtangu la umana na kapala manggangu, na ngia pataha-danya i Yuhupu.

⁴Damandai-ma la uma kapàtangu, tàka na kapala manggangu uma hanganji hi na-patanggu-nya i Yuhupu la palumunja.

⁵La hau na rudungu na ma-paloku pa-unungu dàngu na ma-paloku pangangu da maràngga manggadipangu. Na ihi manggadipangu-da nda da-pahama-a.

⁶Ba namaika i Yuhupu lai nyuda nu hadangu harii, naita-ha ba bitida-paduaka.

⁷Hi na-paàra-nja paraïna i Yuhupu, “Hi tu-inaka na bitimi la lodu nàhu?” wàna.

⁸Dahema nyuda, “Kamodu ma-manggadipangu, dàngu nda ningua haàtu mapinya ihina,” hi wàda. Napaya i Yuhupu, “Mbulungu i Ala na mawua-nya peku na tau la pa-kaloka-ya na ihi manggadipangu. Màla kamangu papeka-ya na manggadipangu,” hi wàna.

⁹Na ma-paloku pa-unungu hi napanii, “La manggadipangu-nggu kuita-ya na hareti na pingi angguru la hangganggu.

¹⁰Na angguru nuna tailu kahanga-na. Hina-maapa da parungu da kahanga-na, luma wàla-ma-adanya, hàla rara-ma-adanya da wuana.

¹¹La rehi nuna yàpa-nggunya-padua na kaba wai paunu wàna na hanganji ka pàpu-nggunyaka wua angguru hi kupohu-nya na kabai waina na hanganji, hi ku-payema-nya,” wàna.

¹²Napaya i Yuhupu, “Yiana-ya na ihina na manggadipangu-mu: Da tailu kahanga ba wàmu jiaya na tailu mbua lodu.

¹³Tailu mbua lodu-kiaka napa na hanganji na-pahàla-kau, napa najàma-nggau dàngu hi na-pabeli-nggau la pakata memamu. Napa nyumu muhilu payema belinya kaba wai paunu wàna na hanganji hama tuna la wungana.

¹⁴Na nyuna namu àruka duku jàka era hàmu-naka na ngeramu nyumu. Peka àrunya na hanganji na rukunggu nyungga, ka na-pahàla-ka welingu la uma kapàtangu yiana.

¹⁵Nadu, làti nyungga duku àmangu ba piti ramba-adangga welingu la paraingu tau Imbarani, tàka lai yiahu-mbu la Mehiru, nda nggàrama duku pa-pandoi-nggu hau ma-akatu hi peku patama dangga la uma kapàtangu,” wànanya.

¹⁶Na ma-paloku pangangu ba napii-nyaka ba nahàmu na ihi manggadipangu-na na ma-paloku pa-unungu, kapanii-ma-nanyaika duna lai Yuhupu, “Nyunggambu ku-manggadipangu, tidungu-nggunya tailu mbua katanga roti la katingguku-nggu wànggu.

¹⁷Daa la katanga mangia pinu dehi ningu ma - màtu kanguta ndumana na hanganji, tàka nàmunja da ma-hawurungu da ngaa pambuta-maha nuda da kanguta, wànggu,” wàna.

¹⁸Nahema i Yuhupu, “Yiana-ya na ihina nuna na manggadipangu: Da tailu mbua katanga jia-mayai na tailu mbua lodu.

¹⁹La dalu tailu mbua lodu paràhangu-nanyaka tau na hanganji pa-katiku-ya na katiku-mu, na kayumbu-mu hi tiwalu-nya la kapuka ai, ka mai-danyaka da ma-hawurungu panganya na tolumu,” wànanya.

²⁰Palàngangu-ka tailu mbua lodu jia-yaka na lodu dedina na hanganji, wulu-nanyaka remi bokulu nduma mbuu ndàbada da panggawi. Na-wuangu pareta ka paluhu-ha welingu la uma kapàtangu na ma-paloku pa-unungu dàngu na ma-paloku pangangu dàngu hi karia-nja la hangga mbuu ndàbada da panggawi uma hanganji.

²¹Na ma-paloku pa-unungu pabeli-nanyaka la pakata memana àmangu.

²²Tàka na ma-paloku pangangu hi nahuku pameti-ya. Na-padeningu hàla hama tuna ba mbàda wàna i Yuhupu.

²³Na nyuna na ma-paloku pa-unungu nda nahili namu-ayapa i Yuhupu. Maromba ailulu-maana-nyaka.