Read Kambera DEDI 41 Bible Online

DEDI 41 - Kambera bible

DEDI 41

¹Palàngangu dàmbu ndaungu, na hanganji Mehiru na-manggadipangu, nyuna ndolaku-nanya la hingi Luku Nilu wàna.

²Hi jia ni bianja ba pihuda da hapi mboka, da manula-da da-kalilangu, da luhu welingu la luku, hi da-pakiringu pangangu rumba la hingi luku.

³Tunaka nu luhu dànyai ba pihuda da hapi ha-banjaru, da ma-kanjupu malakangu-ha; jiaha da manula-kiada da ma-kamburu-nja da riida. Da hapi nuda da ndolaku lihinja da hapi mboka la hingi luku.

⁴Tunaka nu nuda da hapi malakangu hoba nga-danjaka da hapi mboka. Hàlaka pawàla-nanyaka na hanganji welingu la katuda-na.

⁵Hàlaka nu hili katuda-nanyaka hi nahili manggadipangu. Nu la manggadipangu-na naita-ha ba pihu wilida da uhu nggàndumu da ma-paihi, rara-mada-nyaka hau kaleki-ada.

⁶Tunaka nu hili tumbu-danyai ba pihu wilida da uhu nggàndumu ha-banjaru da ma-kalàmba dàngu da karukutu marokutu paraï ngilu maràda telangu.

⁷Hàla da wili uhu nggàndumu ma-kalàmba da-kawaluku-maanja da pihu wili uhu paihi. Hàlaka nu katàtaku-nanyaka na hanganji dàngu pi nanyaka ba manggadipangu-nanya.

⁸La mbaru nu nda nangudu ndokupa naeti-na, ka paràhangu-nanyaka papaau hàlanja da mapingu alimu dàngu da ma-manggàna-ka la tana Mehiru. Hi na-paihi-nja da manggadipangu-na lai nyuda, tàka nda ningu ndoku haàtu mapingu pa-kaloka-ya na ihina.

⁹Tunaka nu na ma-paloku pa-unungu panii-nanyaka la hanganji, “La lodu nàhu kupeka-yaka bàdi na njala-nggu.

¹⁰Àmangu Tamu Umbu bau hàngga-nggama, na ma-paloku pangangu dàngu nyungga, hi patama-nggama la uma kapàtangu la umana na kapala manggangu uma hanganji.

¹¹La hau na rudungu nyuma tau madua ma-kawàra manggadipangu, tàka da manggadipangu-ma nda da-pahama na ihida.

¹²Lai nu ninya na haàtu bidi mini Imbarani na anguma nyuma. Nyuna papalewa-na na kapala manggangu uma hanganji-ya. Mapeka-nya da manggadipangu-ma, hi na-kaloka-ha da ihi manggadipangu.

¹³Tubangu-mana mbuu ndabàna hama tuna ba wàna na-patutu hàlangu-ma nu: nyumu Tamu Umbu mu-pabeli-ngga la pakata memanggu, tàka na ma-paloku pangangu hi huku pameti-ya,” wàna.

¹⁴Ka paràhangu-nanyaka na hanganji papiti-ya i Yuhupu, ka paluhu parengga-danyaka welingu la uma kapàtangu. Ba nahàla-ka i Yuhupu pa-kikiru dàngu pa-hilungu, hurungu-nanyaka la hanggana na hanganji.

¹⁵Ka panii-nanyaka na hanganji lai Yuhupu, “Nyungga ku-manggadipangu tàka nda ningu ndoku mapingu pa-kaloka-ya na ihina nu na manggadipangu. Ningu ma-paihi-ngga nyuna na mapingu pa-kalokangu manggadipangu,” wàdanggau.

¹⁶Nahema i Yuhupu, “Nda nyunggaa dumu miri, mbulungu i Ala-a duna na ma-kaloka pa-deningu manggadipangu,” wàna.

¹⁷Ka panii-nanyaka na hanganji, “Nyungga ku-manggadipangu, talànga ndolaku-nggu la hingi Luku Nilu wànggu.

¹⁸Ka luhu-danyaka welingu la luku ba pihuda da hapi mboka jua dàngu ba dawàngu pa-kalilangu da manula-da, hi da-pakiringu pangangu rumba la hingi luku.

¹⁹Tunaka nu wudaku wàdai ba pihuda da hapi ha-banjaru, da malakangu hi jiaha da-manula-ki-adaka da-ma-kamburu-nja da rinada. Ndedi ku-handàkangu pa-itangu hapi ma-kambànga tungu nu la nggubulu tana Mehiru.

²⁰Nuda da hapi malakangu dangaa pambuta-maaha da hapi mboka nu kawai.

²¹Tàka hàlaka nu da hapi malakangu pa-daingu malakangu-maada. Hàla hadangu-nggunyaka, welingu la katuda-nggu.

²²Tunaka nu katuda nggunyaka dàngu hilu manggadipangu-manggunyai ku-itaha ba pihu wilida da uhu nggàndumu da ma-paihi dàngu da mambàda rara, tumbuda la hau kaleki-na.

²³Hàla tumbu-danyai ba pihu wilida da uhu nggàndumu da ma-kalàmba dàngu da ma-karukutu marokutu paraï ngilu maràda telangu.

²⁴Da wili uhu nggàndumu da ma-kalàmba nuda da-kawàluku-maanja da wili uhu nggàndumu da ma-paihi kawai. Mbàda panii-manggu-njaka làti nuda da manggadipangu-nggu ba dàmbuda la tau mapingu alimu, tàka nda ningu haàtu mapingu pa-kaloka-ya na ihina,” wàna.

²⁵Nahema i Yuhupu la hanganji, “Nuda da manggadipangu ba dàmbuda hama-maana na ihida; i Ala peka hàla-nanggau Tamu Umbu jàka nggàraya napa na pa-patumbu-na.

²⁶Da pihu hapi mboka jia-duha da pihu mbua ndaungu, hamanai da pihu wili uhu nggàndumu paihi jia-mayai da pihu mbua ndaungu; ba dàmbuda hama-maana na ihida.

²⁷Da pihu hapi malakangu, da ma-kawudaku malamiri hamanai da pihu wili uhu nggàndumu ma-kalàmba da ma-karukutu marokutu la ngilu maràda telangu jia-duyaka na rehi rimbangu pihu mbua ndaungu.

²⁸Hama tuna ba mbàda wànggunggau Tamu Umbu, i Ala paita haha-nanggau jàka nggàraya napa na pa-patumbu-na.

²⁹Napa la pihu mbua ndaungu na manàmu-nya mbokaru dira matiki-yaka la tana Mehiru nggubulu-na.

³⁰Hàlaka nu tàka-danyaka da pihu mbua ndau rimbangu, tàka na rehi pihu mbua ndau mbokaru napa pa-marombangu ailulu-ma-ayaka, nadu na ndau rimbangu napa ba lalu mbana hanggàri-na, hi lupa na bulu ailulu yiana na tana.

³¹

³²Hi na-panduangu na manggadipangu-mu Tamu Umbu, na ihina nu rukuna nuna ba mbàda kawuku-nanyaka paraïna i Ala, ba patumbu langatàka dàngu ba parengga-mananya.

³³Jiaya nu Tamu Umbu, nahàmu kau pindi haàtu tau mamàhi dàngu ma-manggàna kau wuanya kuaha ka na-palànyapu-ya yiana na tana.

³⁴Dàngu nyumu Tamu Umbu kau wotu panggawi hawiangu, dàngu kau wuanja kuaha ka dapiti hangia welingu la lima ngia uhu nggàndumu pangala-na na tau la dalu pihu mbua ndaungu mbinu mbokaru, hàlaka pabundu-nja la hau parai - hau paraingu, dàngu ka mangga-manja.

³⁵

³⁶Da uhu nggàndumu nuda jia-duhaka da pangangu pa-payemangu la dalu pihu mbua ndau rimbangu na manàmu-nya la Mehiru. Ba tuna nu jia-duyaka hi nda nameti rimbangu na rayatu,” wàna.

³⁷Na hanganji dàngu da panggawi-na da-patunju hàlaya mbuu ndàbana na pawuku hahana i Yuhupu.

³⁸Ka panii-nanyaka na hanganji lai nyuda, “Nda peku-apa nyuta ba tahilu hunggu haàtu marihi jàngapu welingu lai Yuhupu, nadu ba tunggulu-mananya nyuna paraïna Ngahuna i Ala,” wàna.

³⁹Ka panii-nanyaka na hanganji lai Yuhupu, “I Ala napeka hàla-manggau-nyaka yiana mbuu ndàbana, jia ba tuna lohangu-mana-nyaka ba nyumu-maka tau marihi màhi dàngu manggàna welingu lai nggamu-kadu.

⁴⁰Nyumu wotunggu-nggauka la pa-nggumbunuru, dàngu nggubulu na rayatu-nggu napa na karadaku la pareta-mu. Didi-aka nyungga marihi kuaha welingu lai nyumu,” wànanya.

⁴¹Hàlaka nu na hanganji hi na-butuhu-ya na tawuru welingu la limana, na maningu huratu hàpu hanganji, hi napuhi-ya la limana i Yuhupu, hi napanii, “Yina jiayaka na pawotu wàngukau la pa-nggumbunuru la nggubulu tana Mehiru,” wànanya. Tunaka nu na hanganji hi na-pahau-nya i Yuhupu hawàla kalembi bokulu linangu ma-haluputu, dàngu hi na-pahàngalu-nya la nggoruna hawalangu kanàtaru.

⁴²

⁴³Hàla hi nawua-nya i Yuhupu na kareta hanganji na padua wàna pa-kaliti wàna, dàngu da mini manggangu tanda mangarangu dalaku mangilu-nya na kareta hi da-warangu, “Manggangu! Pa-hiangu ànda! Pa-hiangu ànda!” wàda. Tuna nu ba wotuya i Yuhupu la pa-nggumbunuru la nggubulu tana Mehiru.

⁴⁴Na paniina na hanganji lai nyuna, “Nyungga ma-hanganji — dàngu ku-pakada-nya nu jàka nda pulumu nyumu nda jia ningua haàtu la Mehiru nggubulu-na ba jia ningu ulana,” wànanya.

⁴⁵Hàla na hanganji hi natunya tamu Mehiru-na i Yuhupu, nu i Hàpunatu-Paania wànanya. Nawua-mbunya haàtu papahana, na-matamungu Àhanàtu, anana i Potipera, na ratu la paraingu Haliupolihu. I Yuhupu tailu kambulu ndau-naka na lurina ba na-pakiringu paràma la hanganji Mehiru. Ka hadangu-nanyaka i Yuhupu welingu la uma hanganji hi nalaku pa-winggiru-nya na nggubulu tana Mehiru.

⁴⁶

⁴⁷Nu la dalu pihu mbua ndaungu mbinu mbokaru, na tana na-wuangu ihina mabundu làndangu.

⁴⁸Da uhu nggàndumu na-pauhi-nja i Yuhupu, hi na-pahàmu-ha la hau parai - hau paraingu. Nu la nimbihu paraingu na pahàmu-ha da uhu nggàndumu ihida da woka la winggiru-da nuda da paraingu.

⁴⁹Da uhu nggàndumu da pa-pauhi-na lalu mbana danguda, hi lupa na pànjangu-maaka i Yuhupu pa-takaru-ha, nadu na danguda ba hama wara la tehiku-ha.

⁵⁰Ba ndedi natàka na rapa rimbangu, i Àhanàtu papaha-na i Yuhupu na-paanangu tau madua anakeda mini.

⁵¹Na paniina i Yuhupu, “I Ala na-palingga hi lupa kumbula hàlanya na mayila-nggu dàngu na tau la kuru uma amanggu,” wàna. Jia-duyaka hi natunya tamuna na anana na ma-wungangu i Manahi[93] wànanya.

⁵²Nahili panii, “I Ala nawua-nggaka ananggu la rehi handuka-nggu,” jia-duyaka hi natunya tamuna na ana padua wàna i Epuraïmu[94] wànanya.

⁵³Pihu mbua ndaungu mbinu mbokaru na-pahanggau hàmuna na tana Mehiru, njàpu-nanyaka.

⁵⁴Ka tàka-nanyaka na pihu mbua ndaungu rimbangu, na-padeningu hama tuna ba mbàda wàna i Yuhupu. La pa-nggubulu awangu tungu-nanyaka na rimbangu, tàka la Mehiru nggubulu-na ningu padua pangangu pa-payema hahangu.

⁵⁵Ba na-pakiringu-ka pa-pàdangu rimbangu na tau Mehiru, ka lua-danyaka pakarai pangangu la hanganji. Tàka na hanganji na-paràha-nja lai Yuhupu dàngu la pa-karadaku-nya na lii pareta-na i Yuhupu lai nyuda.

⁵⁶Ba nangeri mbangatu-ka dàngu ba na-panggàbalu ndàba-nyaka rimbangu nuna na tana, bunggahu-nanjaka i Yuhupu mbuu ndàbada da uma eri hi na-danggangu uhu nggàndumu la tau Mehiru.

⁵⁷Welingu la pa-nggubulu awangu mai-nanyaka na tau la Mehiru la pakei uhu nggàndumu lai Yuhupu, nadu na rimbangu ba lalu mbana mbàringu-ya la nggi - nggini.