Read Kambera DEDI 43 Bible Online

DEDI 43 - Kambera bible

DEDI 43

¹Na rimbangu la Kanaàngu pa-rukangu-mana-nyaka pa-mbàringu, nu da tau la kuru umana i Yakupu da panjàpu hàla-haka da pangàndi-da welingu la Mehiru, ka panii-nanjaka da anana i Yakupu, “Mihili luawa nu lai nàhu, kai keinda uhu nggàndumu panganda,” wànanja.

³Napaya i Yahunda la amana, “Na nggumbunuru Mehiru napeka haha ma-nggamaka ba nda peku hurungu-ama lai nyuna, jàka ndia-madu ma-karia-nya na erima.

⁴Jàka upulinya nyuna ama na erima palua karia-nggama jia hi malua lai nàhu pakei pangangu.

⁵Tàka jàka ndau pulinya i Mbanyamingu palua karia-nggama, nda mabihu-a palua, nadu na nggumbunuru ba mbàda peka-mana-nggamaka: ba nda peku-ama pa-hurungu la hanggana jàka nda na-kikungu na erimi,” wàna.

⁶Napaya i Yakupu, “Nggikina nyimi hi pa-handuka-ka bai paniinya na tau nuna ba ninyapa na erimi?” wàna.

⁷Dahema nyuda, “Na tau nuna kandàharu-mana-nggama ba na-paàra-nggama ngerama nyuma dàngu ngera kuru umanda ba napanii, ‘Naluri-pa na amami? Ningupa nu erimi anakeda mini hawiangu?’ wàna. Ka hema lera-manjaka da paàrangu-na mbuu ndàbada. Nggiki hama pimanya nyuma ba jiangu-ma na-karuhi-kama pa-karia-nya na erima?” wàdaka.

⁸Hàla panii-nanyaka i Yahunda la amana, “Pulinya nyuna na anakeda ka na-tundungu, nyungga duku matanggu hemaya na ngerana nyuna. Ka maluu laku ka àmbu jàmu ningu lai nyuta mameti rimbangu.

⁹Nyungga duku hiluna, karuhi biaya na rukuna nyuna lai nyungga. Jàka nda ku-karia beli dàngu hàmunya, nyungga duku matanggu-nya na hukungu la ngala luringgu.

¹⁰Làti jàka nda lalu mandai tunda nu pa-patiangu, nàhu mbàda pandua wundangu-mbumaka duma làti palua beli,” wàna.

¹¹Napaya na amada, “Jàka tuna numaipa bàdi, ngàndiwa ihi tana mahàmu halawàla welingu la tana yiana kai tuha la karungu-mi màta ka jiaha da pawotu-minya na nggumbunuru: kilu wua kimihu, manggaluangu, rungu, wua kawilu dàngu wua mbandamu.

¹²Ngàndi àmahu pandua wundangu, nadu da àmahu pahunggu-mi la karungu ngàndi beli-maha bàdi. Talànga wanguna njala tudanja.

¹³Karia-nya na erimi, na nyuna beli pa-renggangu.

¹⁴Màla àru i Ala Mahupu-mbiha ka najuju-ya na etina na nggumbunuru ka namila-nggai eti, hi lupa na-pabeli-nja i Mbanyamingu dàngu i Hamiungu lai nyimi. Jàka jiaka nyungga duku, jàka pa-mbulangu wàdanya da ananggu mbuu ndàbada, màlawa nyuna,” wànaka.

¹⁵Tunaka nu da anguna paluhu i Yuhupu ngàndi-danyaka da pawotu-da dàngu àmahu pandua wundangu, hàla hadangu laku-danyaka la Mehiru karia-nya i Mbanyamingu. Ba datàka lai nàhu, hurungu danyaka lai Yuhupu.

¹⁶I Yuhupu ba naita-yaka i Mbanyamingu dàngu da ayana, panii-nanyaka na papalewa-na na ma-kapala paloku la umana, “Karia-nja nuda da tau la umanggu. Nyuda napa daangu ngangungga la lodu nàhu, jia-duya rupuwa heu banda hàla paloku-ya,” wàna.

¹⁷Na papalewa nuna nunju-nanyaka na pareta-na i Yuhupu hi na-karia-nja da anguna paluhu la uma nggumbunuru.

¹⁸Ba karia-njaka la umana i Yuhupu, mangàdatu-danyaka dàngu pa-kanandi-da, “Hi da karia-nda yiahu, jia-haka rukuda da àmahu pahunggu nda la karungu ba jiaya namainda àmangu. Napa yàpa harabanda-dandaka, hi da pitiha da kalandai-nda, tàka nyuta hi da-atanda,” wàda.

¹⁹Jia-duyaka, la lihi pindu umana i Yuhupu, hi dapanii-nya na kapala paloku kuru uma,

²⁰“Malangu-mu Umbu, nyuma mbàda handàkangu-maka pamai yiahu pakei pangangu.

²¹Nàhu la ànda ba mabeli, tàka la ngia patodu-ma, hi ma-bunggahu-ha da karungu-ma. Ka ni hàla-njaika da àmahu wili uhu nggàndumu-ma la pinu uhu nggàndumu daa la karungu. Nda mapinya jàka nggamu mapuhi-ha nuda da àmahu. Nàhu mangàndi beli-manggaunja duma Umbu. Hinggilu-da nuda mangàndi-mapa àmahu pahili kei wàngu pangangu,” wàda.

²³Nahema na papalewa, “Àmbi mangàdatu. Àmbi kahàdiku-du. Na Alami nu na Alana palumu-na na amami, Nyuna duna na mapuhi-ha nu da àmahu daa la karungu-mi. Nyungga duku kukei-mahaka da àmahu wilida da uhu nggàndumu-mi,” wànanja. Tunaka nu karia-nanyaka i Hamiungu lai nyuda,

²⁴hàla tama karia-nanjaka daa la uma. Na wuanja wai pabaha wàda wihida, dàngumbu uhuda da kalandai-da.

²⁵Hàlaka nu paloku-danjaka da pawotu-da, tiangu da pawua-nya i Yuhupu jàka nabeli la tidu lodu, nadu ba mbàda panii-mana-njaka napa ba ngangu-danya dàngu nyuna.

²⁶Ba natàka-ka i Yuhupu la uma wotu-danjaka da pangàndi - pangàndi-da lai Yuhupu ba dàngu maràbaku-da lai nyuna.

²⁷I Yuhupu na-paàra-nja jàka nda nggàra ehida, hi napanii, “Mbàda panii-minggaka rukuna na amami na mambàda kaweda. Màla ndiadu nggàra ehina? Ha - hàmu-nanya kadu?” wànanja.

²⁸Dahema nyuda, “Na atamu Tamu Umbu, na amama, ha - hàmu-màdu-nanya,” wàda, hàla hi da-maràbaku-nya.

²⁹I Yuhupu ba naita-yaka i Mbanyamingu na erina, panii-nanyaka, “Ka nu jia-yaka yiana yia na eri hupuma ba wàmi, na pambàda panii-mingga? Màla àru i Ala ka na-pakanyuru-kau ananggu,” wàna.

³⁰Na etina i Yuhupu na-mbumbaru na rinju-nanya dàngu nanamu-nanya na erina. Natika panda roputu wikina, jia-duyaka hi jia haleli biana welingu lai nu hi natama la kurungu, hi nahii.

³¹Hàlaka nu hi nabaha matana, hi naluhu beli dàngu pàtu-nanya na etina, hi na-paràhangu pa-bànjalu-ha da pangangu.

³²I Yuhupu ngangu-nanya la menja mehana, tàka da ayana la menja hauha. Da tau Mehiru da maninja lai nu ngangu-danya la hau menjamai duda, nadu ba pawawa wàngu-ndanya wàda jàka dangaa dànja da tau Imbarani.

³³Da anguna paluhu i Yuhupu natuha la menja ma-papangu dàngu na menjana i Yuhupu, tundu-manya na pa-ndàkingu-na na dedida, piti welingu la ma-maaya dehi lupa la ma-maeri hupu. Ba daita-yaka na pa-mandapu tunanja nu, ka maràngga pa-tàngaru-danyaka pa-kariangu hangàtaru-da.

³⁴Nyuda pa-wuangu-ha pangangu welingu la menjana i Yuhupu, tàka i Mbanyamingu ba da wuanya pangangu da palima hama dangu bàdi welingu la ndumada da aya - ayana. Ka ngangu ngunungu-danyaka dàngu i Yuhupu lundu hodada.