Read Kambera DEDI 45 Bible Online

DEDI 45 - Kambera bible

DEDI 45

¹I Yuhupu nda namàka-apa papàtu-ya na etina la hanggada da panggawi-na nyuna. Jia-duyaka hi na-paràha-nja paluhu welingu lai nu la kurungu, ka peku pa-bowangu-na la anguna paluhu jàka nggamu langatàka-ya nyuna.

²Ba daluhu hàlaka da panggawi-na welingu lai nu, hii kaladaku-nanyaka i Yuhupu, hi lupa darongu da tau Mehiru la hambeli, dàngu lupa natoma-mbu na rukuna nuna la uma hanganji.

³I Yuhupu na paniinja da anguna paluhu, “Nyungga yia Yuhupu-ka. Na luri-dupa i ama?” wànanja. Daita-yaka nuna da anguna paluhu lalu mbana mangàdatu-ha, hi lupa nda dapingu-mbu pahema.

⁴Hàla, “Ndàharungu-ki yiahu,” hi wànanja paraïna i Yuhupu. Ka lihi-danyaka hi napanii-nja, “Nyungga yia Yuhupu-ka, na padangga-mi la Mehiru.

⁵Àmbi mangàdatu-du dàngu àmbi pekambu hàla era bai danggangga. Làti duna bai Ala wiki-maka na ma-karia-ngga yiahu la pa-mangilu-nggai nyimi, ka peku pamara-ya na tau dangu.

⁶Nàhu hina apa dàmbu ndau wàna na pa-rimbangu wàngu, tàka lima mbua ndau-manapa ba nda peku ràmana dàngu ba nda nggàra pamuti-na na tau.

⁷I Ala-maka na ma-karia-ngga la pa-mangilu-nggami nyimi ka peku pamara-kai nyimi mbuu ndàbami, ba nawàngu hau ànda pa-hangàtarungu tungu yia, na pa-màndungu wàna na marami dàngu na pa-nuangu-na na wàla wuami.

⁸Jia-duya, nda rukumi nyimia hi kiri ningga lai yiahu, tàka i Alama duna. Nyuna na mawotu-ka la pa-panggawi mahupu bokulu-na na hanganji Mehiru. Nyungga na-pakata-ngga kuwaha la kuru uma hanganji dàngu la tana Mehiru nggubulu-na.

⁹Nàhu, parenggangu kai beli lai ama kai paihi-nya, i Yuhupu, anana ba tuna yia napanii, ‘I Ala na-pakata-nggaka la pa-kuaha hàlaya la tana Mehiru nggubulu-na; pamai parenggangu-makai.

¹⁰I ama napa na-ngiangu la ngaba Nggohingu, ka nalihi-ngga nyungga — i ama dàngu ana umbuku-na, da mbimbi, da kamàmbi dàngu mbuu ndàbada da manguna i ama.

¹¹Jàka ninyaka i ama la Nggohingu, peku-naka duku ba ku-kabubulu-ya na amanggu. Na pa-rimbangu wàngu pa-nuangu-mana-nyapa lima mbua ndaungu tàka napa ku-pamukarungu ka àmbu nggàra manjaka-nja i ama, na kuru umana dàngu da bandana i ama,’ ” wàminya.

¹²Nahili panii i Yuhupu, “Nàhu ita wiki-maminya, nyumu mbu Mbanyamingu, nyungga ba jia langatàka-maka Yuhupu.

¹³Pekanya na amanda jàka nggiki hama bokulu-na na kuaha-nggu lai yiahu la Mehiru, wàlahu ndàbanya na pambàda ita - ita-mika, hàla kai pa-renggangu pa-karia-nya yiahu,” wànanja.

¹⁴Hàlaka nu rohu-nanyaka i Mbanyamingu, na erina, hi nahii; i Mbanyamingu hii-mananyai duna ba na rohuya i Yuhupu.

¹⁵Tunaka nu dàngu hii-manapa i Yuhupu, hi narohu hàlaha da anguna paluhu hi na-puduku-ha. Hàlaka nu pa-kiringu-danyaka pa-pabanjaru dànya.

¹⁶Nu la uma hanganji rongu-danyaka lii, ba ninja da anguna paluhu i Yuhupu, na hanganji dàngu da panggawi-na da hàmu wàmbunya na etida.

¹⁷Ka panii-nanyaka na hanganji lai Yuhupu, “Paràha-nja da angumu paluhu ka da-pakàlatungu uhu nggàndungu la kalandai ka dabeli la Kanaàngu

¹⁸ka dalua papiti-ya na amada dàngu na kuru umana ka da-lelingu lai yiahu. Napa nyungga ka kuwua-nja tana mahàmu halawàla la tana Mehiru, dàngu napa na patoma na lurida welingu la ihina nuna na tana.

¹⁹Paràha-nja ka dangàndi welingu yiahu pi - pira kareta ndumada da papaha-da dàngu da ana màrahu-da, dàngu papiti wànya na amada.

²⁰Àmbu da-pangàda wadunya da malanja da-pa-dunjaku lerada, nadu da mahàmu halawàla la Mehiru nggubulu-na ba manguda nyuda-maduha,” wàna.

²¹Da anana i Yakupu da wamanya na lii pareta-na na hanganji. I Yuhupu nawua-nja nyuda pi - pira kareta, nunjuya na lii pareta-na na hanganji, dàngumbu bàlada nàhu la ànda.

²²Nawua-mbunja haàtu - haàtu hau pahangu paki bidi, na nyuna lai Mbanyamingu nawua-nya tailu ngahu àmahu bara dàngu lima pahangu paki bidi.

²³Na-pangàndi-nya na amana hakambulu ngiuda da kalandai da pa-pakàlatungu malanja mahàmu halawàla welingu la Mehiru, dàngu hili hakambulu ngiu kalandai pa-pakalatungu wàngu uhu nggàndumu roti dàngu pangangu hawiangu ka da-bàlangu la ànda ba dalaku la Mehiru.

²⁴Tunaka nu paràha-nanjaka palaku da anguna paluhu, hi napanii-nja, “Àmbi palumungu nàhu la ànda,” wànanja.

²⁵Ka dunjaku-danyaka la Mehiru hi dabeli la tana Kanaàngu lai Yakupu, amada.

²⁶“I Yuhupu na luripa!” wàdanya. “Nyuna-maka na ma-kuaha la Mehiru nggubulu-na!” wàdanya. Narongu-ya na lii nuna, maratangu-nanyaka i Yakupu, dàngu nda nawai-aha nyuda.

²⁷Tàka ba dahàla-ka pa-paihi ndàbanya na papanii-na i Yuhupu lai nyuda, dàngu ba naita-haka da kareta da pa-pangàndi-na i Yuhupu la papiti-ya nyuna palaku wàngu la Mehiru, hina hi na-katàtaku welingu la maratangu-na.

²⁸“Na ananggu i Yuhupu na luripa!” wàna. “Nuna-aya na parinju-nggu! Kulaku-madu bàdi, ka kuita-ya talànga ndedi kumeti,” wàna.