Read Kambera DEDI 49 Bible Online

DEDI 49 - Kambera bible

DEDI 49

¹Tunaka nu i Yakupu hi napaau-nja da anana, “Pauhi-wa lai yiahu la lihinggu. Napa ka kupeka-nggai jàka nggàraya na pahunggu-mi ngeru la lodu malamiri:

²Pauhi-wa ha anana i Yakupu, patingi-nyawa i Ihirailu, na amami.

³Oi Rumbingu kawunga ananggu, nyumuma na kapàru-nggu, na wua kawunga-na na àtalu-nggu. Nyumu marihi àtalu dàngu kapàru la honga mbuu ndàbada da ananggu.

⁴Nyumu namuda la pakoda-nggau hama tuna na wai, jia-duya hi nda nyumu mangia ngaba; nadu bau katuda dànya na kalawi-nggu, bau pa-iraku-ya na ngia pa-katuda amamu.

⁵I Hamiungu dàngu i Lewi ma-paangu dediha; da madàka-da jia na pambana eti wàda.

⁶Nyungga nda kutama-anya na pa-hamangu-da, dàngu ndia mbu la pauhi-da. Nadu ba da pameti tau wàngu karaü etida, ba da-pakaliparu-ha da hapi mbàtingu pahàmu eti wàda.

⁷Pa-ràtungu-ya na hàngga da nyuda, nadu ba lalu nda najaru-na. Pa-ràtungu-ya na kàrangu etida, nadu ba lalu làmburu-na. Napa nyungga ku-paiha nggangganja la nggubulu Ihirailu. Napa nyungga ku-hàbaru jaranja, la honga banjaru nggubulu-na.

⁸Oi Yahunda, napa nyumu mu-njakilu-ya na kahuki papamu; mbuu ndàbada da angumu paluhu dawotu-nggau dàngu da-maràbaku la hanggamu.

⁹I Yahunda beri kamboka hingaya; na-pameti-ya na payàpa-na, hi nabeli la hibuna; nyuna na kauli hi na tanggilungu, dàngu nda haàtu-mbu matoru mbeni pa-kuhiku-ya.

¹⁰I Yahunda napa na-katangu tokungu pa-hanganji, na wàla wuana napa na-pareta lundu nu - nu. Da banjaru-ka napa dangàndi hilu katiku-da,[98] dàngu hi da-maràbaku ba danyàku la hanggana.

¹¹Na ana kalandai-na nahondu-ya la pingi angguru, na pingi angguru na mahàmu halawàla. Nyuna na baha pakina wàngu angguru, angguru ma-parara wai riangu.

¹²Darara da wua matana paraï pa-unungu angguru, dabara da ngànduna paraï pa-unungu huhu.[99]

¹³I Hembulungu napa na ngiangu la lihi tehiku; da kapa - kapalu napa da-palabungu la pahiwi-na; lupa la Hindungu-ya na padira tanana.

¹⁴I Ihakàru beringu kalandai halangatu-ya nyuna na katuda la manggawa kanaingu ngàndina.

¹⁵Naitaya na pangia nuna lalu hàmuya dàngu na-manandangu nda ukuya na tana nuna, ka marubuku-nanyaka ba na-patiangu bukuna, dahàni-ya paràma hama tuna ata.

¹⁶Nyumu dumu Ndàngu napa mu-patanda-nya ngera na banjaru-mu, nyumu munjadi kabihu hama tuna na kabihu hawiangu la Ihirailu.

¹⁷Nyumu hama tuna kataru la hingi ànda kau, kataru pa-upahungu la hingi kanjilitu, na mawitu weli tandanya na njara hi lupa na-kanabu tawàlahu na ma-kaliti-ya.

¹⁸Dou MIRI, na mànangu na pawua-mu, jia-mayaka na panedi napanggu.

¹⁹Nggàtu, napa nyumu na-kaluluku-nggau ma-rambangu, napa nyumu mu-punjilungu la paramba-nja nyuda.

²⁰Oi Ahiaru, da pangamu da-bundungu da-mbokaru, napa nyumu mu-payema-nja pangangu da hanganji.

²¹I Nàputali pangera ruha ma-pahàla-ya, da anana[100] lalu mbana manandangu-ha.

²²I Yuhupu beri kamboka kalandai-ya, kamboka kalandai matàmba la lihi matawai, napalai - lai la karaha palindi.[101]

²³Nda na-najaru ba nahada ngàndiya papana, da yaulu wànya pandi pana dàngu ana pana.

²⁴Na nyuna ba tuna i Yuhupu pa-daingu kapàru-na na punguna,[102] pa-daingu mbangatu-na na panana ruku mbihana i Ma-pawangu na Mahupu-kapàru, na Alana i Yakupu, na Tindingu-na i Ihirailu.

²⁵Na Alana na amamu napa na-ndulakau nyumu; na Mahupu-mbiha na-pakanyuru-nggau nyumu, wàngu urangu welingu la awangu dàngu wai welingu la unu tana. Wàngu ana dàngu hapi,

²⁶uhu nggàndumu dàngu wàla ai.[103] Na kanyuru-na na Ala amamu narihi-nja da pawulu-da da palindi ndai weli nungu.[104] Màla àruwa ka dapuru hàla da kanyuru la pinu katiku-na i Yuhupu, la pinu kaba matana, nyuna na marihi ndudu la honga anguna paluhu-ka.

²⁷I Mbanyamingu jiaya na ahu rumba mbeni. La mbaru nyuna na njàkapu-ya na payàpa-na. La rudungu nyuna na-paberi - beringu,” wàna.

²⁸Nuda-haka da hakambulu dua kabihu Ihirailu, dàngu da pulungu papeka-na i Yakupu na amada ba na-pamuwa-nja da anana nimbihu-da.

²⁹Tunaka nu i Yakupu hi na-ràndiha da anana, “Tiangu-kika talurungu-nggunyaka-duku hama tuda da boku la mangilu-nggu. Tani-manggai duku napa la karaha-da nyuda daa la liangu la Màkapela, la pahunga loduna la Màmurei la tana Kanaàngu. I Ambarahàmu mbàda kei-mana-nyaka na liangu dàngu na woka la winggiru-na welingu lai Epurungu tau Heti ka tuya reti ba wàna.

³¹Lai nuduka ba tani ninya i Ambarahàmu dàngu i Hara, i Ihàku dàngu i Ripuka; dàngu lai numbu nyungga ba kutani ninya i Lia.

³²Na woka dàngu na liangu da maninja lai nu pakei-mahaka welingu la tau Heti. Tani ni-mangga nyungga lai nu,” wàna.

³³Ba nahàla-ka i Yakupu pa-pamuwa tunanja nu da anana, tanggilungu-nanyaka, ka meti-nanyaka.