Read Kambera DEDI 50 Bible Online

DEDI 50 - Kambera bible

DEDI 50

¹I Yuhupu napàpa wikina la amana ba dàngu hiina ba na-puduku weli mata-nya.

²Hàla, nawua-nja lii pareta i Yuhupu da mapingu pa-kahàngu mameti la patunya rungu na metina i Yakupu.

³Na paràma nuna patu kambulu loduna mandaina, nu na rehi na pakàli wàda ba datungu rungu mameti. Na tau Mehiru na-hawina-nya i Yakupu, pihu kambulu loduna mandaina.

⁴Ba nanjàpu-ka na lodu hawina, panii-nanyaka i Yuhupu la panggawi - panggawi hanganji, “Patàka àrunya na lii yiana la hanganji,

⁵‘Ba mareni njàpu-ama-naka na amanggu, na-paràha-ngga pa-panjanjingu lai nyuna, ba lupangu-ma bàdi kutani ninya la reti na pambàda payema-na la tana Kanaàngu. Jia ba tuna puli àrungga ka kulua patani-nya na amanggu. Hàlaka nu napa beli-manggunya duku wàna wàminya,’ ” wànanja.

⁶Nanapa-ya na hanganji, “Mulua-wa nu patani-nya na amamu, hama tuna na pambàda njanji-munya,” wànanya.

⁷Ka laku-nanyaka i Yuhupu patani-nya na amana. Mbuu ndàbada da panggawi-na na hanganji, da ama bokulu la kuru uma hanganji dàngu mbuu ndàbada da tau bokulu la Mehiru, da laku karia hàlanya i Yuhupu.

⁸Da kuru umana, da anguna paluhu, dàngu da nua da kalembi-na hawiangu, dalaku hàla. Jiaha da anakeda kudu-kiaka dàngu da banda da pa-bànjalu-da la Nggohingu.

⁹Da pajuru tanatara la kareta dàngu la njarambu da-kariangu hàla, hi lundu hau pajuru malaina na malaku.

¹⁰Ba datàka-ka la ngia pa-pambalungu uhu nggàndumu la Nggoringu-Haatàtu, la pahunga loduna na Luku Yorundangu, padudurungu-danyaka paraï pa-hawina, ba da wàngu pa-kaladaku i Yuhupu nawunda lii hawina, pihu mbua lodu mandaina.

¹¹Ba daita-yaka paraï da mangia-nya na tana Kanaàngu, na lii hawina tungu nu la Nggoringu-Haatàtu, panii-danyaka, “Lalu mbana pamila etiya na lii hawina-na na tau Mehiru!” wàdaka. Jia-duyaka na pangia lai nu hi da-patamu-nya Ambilu-Mihiraïmu.[105]

¹²Tuna nuduka da anana i Yakupu ba danunju-ya na hupu ràndina i Yakupu lai nyuda.

¹³Dangàndi-ya na metina la Kanaàngu tàka hi datani-nya la liangu Màkapela, la pahunga loduna la Màmurei, la woka na pambàda keina i Ambarahàmu welingu lai Epurungu tau Heti, ka tuya reti ba wàna.

¹⁴Ba nahàla-ka i Yuhupu patani-nya na amana, beli-nanyaka la Mehiru kariangu da anguna paluhu dàngu mbuu ndàbana na tau na ma-kikungu la patani-nya na amana.

¹⁵Ba na metika na amada, panii-danyaka da ayana i Yuhupu, “Màla nggiki-ndaka ngera hama tuna jàka natuu kiringu i Yuhupu dàngu jàka na-pahimbalu-nya na akatu-nda àmangu?” wàda.

¹⁶Jia ba tuna da-pangàndi-nya langu i Yuhupu, “Ba ndedi nameti na amanda,

¹⁷na-paràha-nggama la papanii-nggau nyumu, ‘Jàma àrunja da njalada da ayamu da pawunda-da àmangu hanggangu lai nyumu,’ wàna. Jia ba tuna ba atana i Ala-kama na palumu-na na amanda, ma-kamahi-nggau, jàma àrunja da njalama da pambàda wundama àmangu,” wàdanya. Ka hii-nanyaka i Yuhupu ba narongu-yaka na lii pa-patàka-danya.

¹⁸Ka lua wiki-danyaka da anguna paluhu hi da-maràbaku la hanggana dàngu hi dapanii, “Nyuma yia atamu-nggama,” wàdanya.

¹⁹Tàka nanapa-ya i Yuhupu, “Àmbi mangàdatu; nadu ba nda jia pa-luangu-anggu limanggu ka beri Alaka.

²⁰Tubangu-ma ba mbàda pa-hamangu-mika nyimi la pawunda ma-akatu hanggangu lai nyungga, tàka i Ala duna nuna na ma-akatu na-panjilu wànya mahàmu ka pekuna rukuna na matumbu àmangu nadangu na tau na maluri la rehi nàhu na pa-pamara.

²¹Àmbi nggidiku etimi. Napa nyungga ku-pamàtu hàla-nggainja da pa-kalana-mi nyimi dàngu da ana-mika,” wàna. Tuna nu i Yuhupu ba na-pangudu-ha da etida da ayana, ba nawàngu pulu ma-malijangu, hi lupa dira hàmu jarangu-ha da etida.

²²I Yuhupu pa-daingu-mananya la Mehiru dàngu da nua da kalembi-na; nyuna na luri lupa hangahu hakambulu ndauna.

²³Nyuna naita-mahapa da ana umbuku-na i Epuraïmu. Nyuna peku anggaraa-mana-hapa da anana i Makiru da umbuku-na i Manahi, hama tumana da ana wikina.

²⁴Napanii-nja da anguna paluhu, “Na rehinggu nyungga mareni-ama-naka, na nyuna i Ala daingu mana duna ba na-anggaraa-kai mbuu ndàbami dàngu ba na-kapipi-kai la paluhu welingu la tana yiana, hi milaku la tana na pambàda ràndi wàngu harangu-na Nyuna lai Ambarahàmu, i Ihàku dàngu i Yakupu,” wànanja.

²⁵Ka paràha-nanjaka i Yuhupu da nua da kalembi-na mbuu ndàbada la pa-harangu, “Pa-njanjingu-wa lai nyungga, ba jiangu-ma mingàndi-mbuya na metinggu jàka era iru ngàndi-nanggai i Ala la tana nuna,” wànanja.

²⁶Tunaka nu meti-nanyaka i Yuhupu la Mehiru, ba hangahu hakambulu ndau-naka na lurina. Ka tuda-nyaka rungu na metina dàngu hi datuya la pati mameti.