Read Kambera 2 HAMUILU 1 Bible Online

2 HAMUILU 1 - Kambera bible

2 HAMUILU 1

¹Ba nameti-ka i Haulu, i Ndautu nabeli-ka welingu la pa-kangaburu, ba natalu-ya na tau Amaliku, na-ndàdiku-pa dàmbu lodu la Hikulàku.

²Hadangu-ka harii tàka-nanyaka na haàtu na bidi mini welingu la ngia pa-pamaüngu-na i Haulu. Ba tanda hawina-nanya nahira walaha da pakina dàngu hi natunya tana na pinu katiku-na. Na-hurungu lai Ndautu hi na-maràbaku la hanggana.

³Na-paàrangu i Ndautu, “Nggi welimu nyumu?” wànanya. Nahema, “Nyungga palai-nggunya welingu la ngia pa-pamaüngu tau Ihirailu,” wàna.

⁴Na-paàrangu i Ndautu, “Màla paniiya jàka nggàraya na matumbu!” wànanya. Nahema na bidi mini, “Da tanatara-ma dapalai-ma welingu la ngia pa-kangaburungu, hi nadangu na mameti, jiambu-duhaka i Haulu dàngu i Yunatàngu,” wàna.

⁵“Nggikina hi mupinja?” hi wàna i Ndautu ba na-paàra-nya.

⁶Nahema, “Talànga ni pàkunggai duku la Palindi Nggilimbua, hàla kuita-ya i Haulu ba na-haria-ya na nimbuna, tàka da kareta dàngu da tanatara muhu la njara, mareni-mada-nyaka la pa-nggupulu-ya.

⁷Tunaka nu nggilaku-nanyaka la kajia, hi naita-ka nyungga, ka paau-nanggaka, hi kuhema-ya, ‘Ou Tamu umbu,’ hi wànggu.

⁸Na-paàra-ngga jàka nggamuka, tàka hi kupanii-nya, nyungga yia ba tau Amaliku-ka.

⁹Hàla panii dàna-nggaka, ‘Nàmu-kikau, kau pameti-ka! Lalu mandàkangu-na na manua-nggu, dàngu meti-ama-ngguka,’ wànangga.

¹⁰Ka ndàharungu-dunggu-nyaka lai nyuna, hi ku-pameti-ya, nadu ba pi-manggu-nyaka jàka nanjoru ba nda namàka-apa pa-ndolaku ba jiangu-ma nameti. Hàla piti-nggunyaka na tubuku àmahu rara la katiku-na dàngu na kara àmahu la punguna, hi kumai ngàndiya nàmu lai nyumu Tamu umbu,” wàna.

¹¹Narongu-yaka nuna i Ndautu bàriku-madua-nanjaka da pakina paraï pa-hawina, hamanai mbuu ndàbada da tau la wawana wàngu tuda numai duda.

¹²Dapadudurungu, da-mahàna dàngu darotu wikida lundu malingu-na lumuda i Haulu dàngu i Yunatàngu, dàngu lumuna na rayatu Ihirailu, na banjaru-na i MIRI, nadu ba nadangu langatàka ma-yàmihu nu la pa-kangaburungu.

¹³Tunaka nu i Ndautu hi na-paàra-nya nuna na bidi mini na mangàndi lii, “Nggiya na ngia paweli-mu nyumu?” wànanya. Nahema, “Nyungga yia tau Amaliku-ka, tàka haàtu tau tama-aka duku la tanamu nyumu Tamu umbu,” wàna.

¹⁴Napaya i Ndautu, “Mutoru mbeni pàku nyumu pa-pameti biaya na hanganji papindi-na i MIRI!” hi wànanya.

¹⁵Hàla paau-nanyaka na haàtu na tau la wawana hi nawua-nya pareta, “Pameti-ya nana!” hi wànanya. Nuna na tau hi nahunju-ya na bidi mini Amaliku lundu nameti.

¹⁶Na paniina i Ndautu la bidi mini Amaliku, “Nyumu wikima dumu marata-ya na hukungu meti nduma wikimu rukuna na papeka-mu ba mbàda pameti-munyaka na hanganji papindi-na i MIRI!” wànanya.

¹⁷Hàlaka nu i Ndautu wunda-nanyaka ludu hali ba na-paduduru-nja i Haulu dàngu i Yunatàngu,

¹⁸tàka hi na-wuangu pareta la pa-papeka-nya na ludu yiana[1] la kabihu Yahunda. (Na ludu yiana pa-tulihu-ya daa la Mbukuna i Yaharu.)

¹⁹“Ha Ihirailu, la tandula - tandula-mu nu lai nu damunju-ka da ma-kaborangu, ba hapajia-ha da ana tana nanggara, damunju-ka ba hama tuna wàlana na banjaru-ha.

²⁰Mili àru da tau la Nggàta ka àmbu darongu-ya na lii nuna. Mili àru la kanjilitu Àhakelungu àmbu natàka-nja lii nuna. Ka àmbu jia kakàlaku wànguda da kawini Pilitingu ka àmbu jia pahangu wànguda da bidi kawini hangàdangu.

²¹Ha dimi tandula la Nggilimbua patingi-nya na waranggu: Àmbu jia pambaha-duna-nggaipa mburungu dàngu urangu! Màtawa ka da-marokutu dàngu ka dambila da woka dàngu da maràda-mu. Nadu ba lai nudu da-yàmihu ningu da temingu mini mbeni. Tàka napatai rara-mbuka na temingu-na i Haulu, ba nda pa-pamina-anyapa.

²²Na panana i Yunatàngu jia hàmuya hi pameti wànguya. Na hapanda-na i Haulu nda nahili paaï na-pameti-ya na muhu na-pamolu-nya na papana.

²³I Haulu dàngu i Yunatàngu, kanjupu kayàwaku-ha ba tau panamu-maha pa-mbuhangu-ha; da-palaku kariangu mànu la lurida la metida; darihi hawàritu-pa welingu la tariku, darihi kapàru-pa welingu la kamboka hinga.

²⁴Ha kawini Ihirailu, paduduru-nyawa i Haulu, na hanganji! Na ma-pamananda wànggai hundarangga rara mambotu wilina, na mawotu-nggai ngaü àmahu rara dàngu watu manandangu.

²⁵Damunju-ka da ngara ma-kaborangu ba hapajia-ha, danjoru la ngia pa-kangaburungu dita la pinuda da tandula malinggitu i Yunatàngu na-tanggilungu nda na-nggàduku.

²⁶Ou Yunatàngu, na angu dedinggu duku, namila mumuhu na etinggu, nadu ba kanjupu pawilingu-kau lai nyungga. Na mbuha-mungga nyungga kanjupu mangarangu-ya, naliru lànganya na mbuhangu-na na kawini.

²⁷Da-yàmihu-ka da mini mbeni Ihirailu ba hapajia-ha. Kahewa pàku-adaka da temi timbi da nimbu tarada!” wàna.