Read Kambera 2 HAMUILU 10 Bible Online

2 HAMUILU 10 - Kambera bible

2 HAMUILU 10

¹Pi - pirana na rehi malamiri i Hanganji Nahàhu welingu la Amungu nameti, dàngu i Hanungu anana, jia-yaka na hanganji.

²Ka panii-nanyaka i Hanganji Ndautu, “I Nahàhu ariyaa-manggunya na ma-tuturu. Ba tuna ku-ariyaa-mbunyaka bàdi i Hanungu na anana,” wàna. Jia-duyaka hi na-paràhangu papalewa-na la tana Amungu la pa-panggaüru-ya i Hanungu ba nameti na amana.

³Ba datàka la Amungu da liku uru la tana nuna ba hapajia-ha da-paniinya i Hanganji Hanungu, “Àmbu kaka-duya Tamu umbu hi na-paràhangu pa-palewana i Ndautu ba ruku tembi-nanya na amamu! Hi na-paràha-nja yiahu da tau maidanya pa-kapilitu-ya yiana na paraingu, ka peku wàhi-nanya,” wàda.

⁴Ka yàpa-nanjaka da papalewa-na i Ndautu paraïna i Hanungu; da njerida na-kikiru hapapa-ha, da pakida na-kadipu pahupu bàngginja, hàlaka hi na-paràha-nja palaku.

⁵Tàka nyuda da-makia pabeli la tanada. Ba ninguka mapanii-nya i Ndautu na rukuna nuna, hi na-pangàndi-nja langu da tau papalewa-na ka da-nedingu pàku la Yeriku ka lupa datumbu beli da wulu njerida.

⁶La malamiri da-pàdangu wikida da tau Amungu nu na pawunda-da jiayaka na kiringu na pamuhu wànanja paraïna i Ndautu. Jia-duyaka hi dahewa 20.000 panjuri Hiria da ma-ngiangu la Mbetu-Rehupu dàngu Homba dàngumbu 12.000 panjuri welingu la Tòpu, lupa na hanganji la tana Maaka dàngu 1000 da tau la wawana.

⁷Ba narongu-ka na rukuna nuna i Ndautu, paràha-nanyaka i Yuàpu dàngu mbulu ndàbada da kalibaru pabera-na la pa-ndàharungu palawa-nya na muhu.

⁸Da tau Amungu daluhu hi da wandalu-ha da pambada la hangga pindu bokulu la Ramba na paraingu puhu pareta-da, tàka da tau Hiria, da tau Tòpu dàngu Maaka da-wandalu-ha da pambada la maràda.

⁹I Yuàpu naita-ya ba nggàpi-nanyaka paraï pamba muhu la hangga la kajia. Tuna nuduka hi napindi tanatara marihi hàmu la Ihirailu, hi na-wandalu pahangga-nja da tanatara Hiria.

¹⁰Da marihi da tanatara na-pakata-nja lai Ambihai, erina, na ma-wandalu-ha da pambana pa-hanggangu dàngu tanatara Amungu.

¹¹I Yuàpu napanii-nya na erina, “Jàka nda kumàka-pa pa-hàngapu-ya na tanatara Hiria, manyamalu-ma kau ndulaka; hamanai jàka ndau màka-mapa nyumu pa-hàngapu-ya na tanatara Amungu, jiangu-ma duku ba kumai pandula-kau.

¹²Pa-torungu-ma! Màlawa ka ta-pajàrungu ba dàngu taranda lumuna na banjaru-nda dàngu lumuda da paraingu-na na Alanda. Mili àru i MIRI ka nawunda-ya na pawuku-na,” wàna.

¹³Tunaka nu i Yuàpu dàngu da pambana hi da-ndàharungu pa-kangaburu, ka palai-danyaka da tanatara Hiria.

¹⁴Da tau Amungu ba daita-haka da tanatara Hiria ba dapalai, nyuda palai-maada-nyai duda welingu lai Ambihai, hi da-kandulingu patama la paraingu. Ba nahàla-ka pabera-ya na tau Amungu i Yuàpu beli-nanyaka la Yeruhali.

¹⁵Na tau Hiria daita-ya ba mbàda pakàku-nahaka paraï tau Ihirailu, jia-duyaka hi napaau hàlanya na pambana la pahili pauhi.

¹⁶I Hanganji Handandehiru paràhangu-nanyaka papaau-nya na tau Hiria da maninja da mangiangu la pahunga loduna na Luku Epuratu, ka mai-danyaka la Helàmu, da pa-kapipi-na i Hombàku, na ngora tanatara-na i Handandehiru welingu la Homba.

¹⁷Naronguyaka na rukuna nuna i Ndautu, manyamalu pauhi-madua-nanjaka mbuu ndàbada da pamba Ihirailu, hi dapala-ya na Luku Yorundangu, tunaka nu ndàharungu-danyaka la Helàmu. Lai nu da tau Hiria pa-wandalu-danjaka da pambada hi da-ndàharungu pa-kangaburu-ha da pambana i Ndautu.

¹⁸Ba tuna da tau Ihirailu da-làndahu pa-kanduli-maanja da tanatara Hiria. I Ndautu dàngu da pambana da pameti-ha da tau 700 da ma-ulingu kareta pabera, dàngu hi tau 40.000-ya na tanatara na mali la njara; hinggilu-nai nu, i Hombàku na ngora tanatara muhu, na-manua mandàkangu hi lupa nameti la ngia pa-kangaburu.

¹⁹Ba daita-yaka paraï da maràmba da ma-tangara lai Handandehiru ba kàku-danyaka, karai-danyaka la pa-papeku dàngu panyàku-danyaka wikida la tau Ihirailu. Piti welingu nu na tau Hiria nda nahili toru mbeni-apa la pandula-ya na tau Amungu.