Read Kambera 2 HAMUILU 13 Bible Online

2 HAMUILU 13 - Kambera bible

2 HAMUILU 13

¹I Àpuhalomu anana i Ndautu, ninya na anawini-na na ma-manandangu, Tamàru-ya na tamuna. I Àmunungu, na anana i Ndautu la papaha haàtu-na, mataru nda uku-nanya i Tamàru

²dàngu na-patikingu pa-katuda angunya. Tàka nuna manda hidaya nadu i Tamàru ba ndedi ràka ma-mangoma-ya ndedi uku nyuna la pa-panggolu dàngu tau mini. I Àmunungu na-kanandi-nya padua nuna hi lupa nahidu wànya.

³I Àmunungu ningu ariyaa-na na mambana màhina, Yunandàpu-ya na tamuna, anana i Himia ayana i Ndautu.

⁴I Yunandàpu na-paàra-nya i Àmunungu, “Umbu kudu, nggikina nyumu hiu biti mànu tumu nu nimbihu lodu? Nggàra ehimu?” wànanya. Nahema i Àmunungu, “Nyungga ku-mataru-nya i Tamàru erina i Àpuhalomu, na angunggu paluhu,” wàna.

⁵Nanapa-ya i Yunandàpu lai nyuna, “Nuna nu namuda-a! Mahuru-wa la ngia pa-katuda-mu ba hama tuna mahidu-kau. Jàka namai na amamu pa-tadalu-kau, kau paniinya, ‘Ama, puli àrunya i Tamàru ka namai ka nawua-ngga pangangu. Jàka kuita-ya nyuna ba na-manahu pangangu lai yiahu, pekuna nyungga pangangu,’ ka wàmunya,” wànanya.

⁶Tunaka nu i Àmunungu mahuru-nanyaka la ngia pa-katuda-na, ba hama tuna mahidu-ya. Ba namaika i Hanganji Ndautu pa-tadalu-ya, napanii dànya na amana i Àmunungu, “Ama, puli àrunya i Tamàru ka namai dàngu ka naràma-ngga pangangu lai yiahu la tuba ngia paita-nggunya, ka pekuna ba kungangu,” wàna.

⁷Tunaka nu i Ndautu pangàndi-nanyaka langu i Tamàru la uma hanganji, “Lua la umana na ayamu i Àmunungu, kau paloku-nya pangangu nyuna,” wànanya.

⁸Ka lua-nanyaka i Tamàru lai nu, natàka-nya i Àmunungu ba mahuru-na padua la ngia pa-katuda-na. I Tamàru napiti hawutu kanguta, hàla hi na-paloku-ya na kanguta la hanggana i Àmunungu ka handara-nya.

⁹Hàla ba na-paluhu-yaka nuna na kanguta welingu la làja hi na-pajàma-nya pangangu. Tàka i Àmunungu nda nabihu pangangu. Napanii, “Paràha-nja ka daluhu ndàba welingu lai yiahu!” wàna.

¹⁰Ba naluhu hàlaka na tau welingu la kurungu nuna panii dàna-nyaka i Tamàru, “Ngàndiha da kanguta lai yiahu, la ngia pa-katuda-nggu dàngu kau pahoba-ngga!” wàna. Na-patundungu i Tamàru.

¹¹Tàka i Tamàru ba na-pajola-nyaka kanguta, hi puta-maana-nya paraïna i Àmunungu, “Eri, mai kau katuda angungga!” wànanya.

¹²“Aiha, màtangu aya!” hi wàna na bidi kawini. “Àmbu pambana-duka la pawunda-ya na ma-iraku tungu nu! Na matungu nu ndedi ninguma mawunda-ya la Ihirailu.

¹³Jàka tunaka nu, la nggini-kaka nyungga ba ku-kawini ninya na matanggu? Hamanai nyumu wikimbu jia-mayai dumu ba na-paaka-nggau tau la Ihirailu. Nahàmu ningupa kau panii dànya na hanganji, napa na-patunju-ma duna ka kunjadi papaha-mu nyumu,” wànanya.

¹⁴Tàka nyuna i Àmunungu nda nabihu patundu-nya nuna, ka ba narihi kapàru-pa duna, puta-madua-nanya na erina, hi lupa na-rumbaku-ya.

¹⁵Tàka ba hàlaka patuna nu nyuna i Àmunungu hi karaü nda uku-nanya eti i Tamàru, nu na karaü-nanya eti naliru lànga-nyapa làti na mbuha-nanya la kawunga-na. Napanii dànya na erina, “Luhu!” wànanya.

¹⁶Nahema i Tamàru, “Yi ha, kanii hi tumu nu aya? Jàka uyauluka nyungga, na akatu-mu nu na-bokulu-pa[28] welingu la akatu patumu kawai!” wànanya. Ba tuna i Àmunungu nda na-talinga-anya.

¹⁷Paau-ma-ananya na papalewa wikina, hi na-paràha-nya, “Karia-nya nana na tau kawini la hambeli, dàngu kuhiya na pindu!” wànanya.

¹⁸Ka tundu-nanyaka na pareta nuna na papalewa-na. I Tamàru nahau kalembi pahàlangu malai lima.[29] La rehi nuna[30] da ana maràmba kawini da mandedi mangoma dapaki tuda nu.

¹⁹Nyuna i Tamàru natunya aü na katiku-na, hi na-bàriku-ya na kalembi pahàlangu-na, hi nalaku dàngu panggàbi kadua mbapa-nanya lima na matana pa-kariangu hiina.

²⁰Ba naita-yaka paraïna i Àpuhalomu, paàra-nanyaka, “Nggikina, rumbaku-nanggau i Àmunungu? Kandiiwa eri, àmbu hili kanandi-dunyapa. Nyuna aya-munya, jia àmbu panii-duya nuna lai ngga - nggamu,” wànanya. Ka pa-hinggilu-nanyaka wikina i Tamàru la umana na ayana i Àpuhalomu, kanjupu hawina-ya dàngu ringu langu-nanya.

²¹I Hanganji Ndautu ba narongu-ya na rukuna nuna, lalu hàngga mbana etiya.

²²I Àpuhalomu paumbi-nanyaka i Àmunungu dàngu nda nahili bihu-apa papanii dànya kiringu ba na-rumbaku-ya i Tamàru, na erina.

²³Palàngangu-ka dàmbu ndaungu mbabu-nanyaka i Àpuhalomu ba na-nggutingu wulu mbimbi la Mbaàlu-Hanjuru, la lihi paraingu Epuraïmu, nadunda hàla-manja da ana maràmba.

²⁴Na-hurungu lai Hanganji Ndautu hi napanii-nya, “Ama, nyungga patumbu-nggunya mbabu nggutingu wulu mbimbi. Màla àru kau luambu la mbabu nuna hamanai ba hapajia-ha da ama bokulu la uma hanganji,” wàna.

²⁵Tàka nahema na hanganji, “Ndia-a ha ananggu, nadu jàka malua hàla-maka pa-handuka-manggau nyumu-duka,” wànanya. I Àpuhalomu parukangu-mananya pa-dàhiku-ya, tàka na amana daingu-mana ba nda nabihu pa-kikungu. Jia-aya ba nawàngu pa-kanyuru-nya.

²⁶Ka panii-nanyaka i Àpuhalomu, “Jàka tuna nu puli àrunya na angungu paluhu, i Àmunungu ka nalua karia-nggama,” wàna. Napaya na hanganji, “Ndia-a nggàra palua-na nyuna,” wàna.

²⁷Tàka ba pa-dàhiku pangalangu-mananya i Àpuhalomu, ka lupa puli-duna-nyaka i Àmunungu nyuna i Ndautu hamanai mbuu ndàbada da anana mini la palaku karia-nya i Àpuhalomu. [Hàla i Àpuhalomu pa-yemangu-nanyaka pangangu mbabu ailulu.][31]

²⁸Nawua-nja pareta da atana, “Itàngaru pa-hàmungu, jàka na-maüku-ka i Àmunungu paraï pa-unungu angguru, napa ka ku-kamujuru-nggaika kai pameti-ya. Àmbi mangàdatu-du. Nyungga duku matanggu hemaya na rukuna nuna. Pa-torungu-ma bai hada ngàndingu, àmbi kanodaru-du!” wàna.

²⁹Nyuda da tau ata danunju-maya na pareta-na i Àpuhalomu, hi da-pameti-ya i Àmunungu. Ba daita-yaka nuna paraï da anana i Ndautu hawiangu kali - liti-madua-danjaka da mbanggalu-da hi dapalai.

³⁰Ba talànga nàhu-injapa la ànda ba dabeli, ninguka tau mapanii-nya i Ndautu, “I Àpuhalomu na-pameti hàla-haka da ana hanganji — nda hili ningu haàtu maluri!” wàdanya.

³¹Na-hadangu na hanganji hi na-bàriku-ha da pakina, paraï pa-hawina, hi na-tanggilungu la tana. Mbuu ndàbada da panggawi-na jia-mayai duda ba da-bàriku-ha da pakida.

³²Tàka i Yunandàpu anana i Himia ayana i Ndautu, hi napanii, “Tamu umbu, àmbu hawina dàngu àmbu patanda-dunya ba mbàda meti hàla-daka da ana maràmba. Jiaya i Àmunungu-a duna na mameti, ba lohangu-mananya, ba jiaya nyuna-maka na pawuku-na i Àpuhalomu, kandai rumbaku-nanya i Tamàru, na erina.

³³Jia ba tuna àmbu waiduya na mapanii, ba dameti hàla-maka da ana maràmba, jiaya i Àmunungu-a duna na mameti,” wàna.

³⁴Ba talànga tunaka nu nyuna i Àpuhalomu mbàda palai-naka. Da tau madaiya na uma hanganji-na i Ndautu, da-itangu tau dangu ma-kamburungu welingu la palindi weli nàmuda la Horunaïmu.[32] Ka lua-nanyaka papanii-nya na hanganji hi na-wàlahu-ya nuna na paita-na.[33]

³⁵Hàla i Yunandàpu hi napanii-nya i Ndautu, “Jia-madu-haka nàmu da ana maràmba! Deningu hama tuna ba wànggu kawai,” hi wàna.

³⁶Hina-maapa nahàla papanii, tama-madua-danyaka da anana i Ndautu la kurungu. Pakiringu-danyaka pahii, tàka i Ndautu dàngu da ata-naka dahii hawina hàla.

³⁷Nyuna i Àpuhalomu lelingu-nanyaka la uma hanganji-na na hanganji la tana Nggehuru, lai Tàlumai anana i Amihuru. Nyuna engana lai nu tailu mbua ndaungu. Mandai langatàka i Ndautu ba na-hawina-nya i Àmunungu,

³⁹tàka i Ndautu ba na-làpahu-ka na pa-hawina wànanya i Àmunungu, lalu mbana rinju-nanya i Àpuhalomu.