Read Kambera 2 HAMUILU 14 Bible Online

2 HAMUILU 14 - Kambera bible

2 HAMUILU 14

¹I Yuàpu napinya na hanganji Ndautu ba lalu rinju-nanya i Àpuhalomu,

²jia-duyaka hi na-paràhangu palua papiti-ya na haàtu na kawini màhi na ma-ngiangu la Takua. Ba natàka-ka nuna na tau kawini, i Yuàpu hi na-paniinya, “Màta nyumu ina kau hawina kabàli; kau wotu paki tanda hawina-mu, dàngu àmbu tungudu mambii kati. Màta na hurimu ka hama tuu-mana na mahii mandaikau bau hawina-nya na tau pambuha-mu.

³Tunaka nu kau lua la hanganji kau patàka-nya jàka nggàraya taï na papanii-nggunggau,” wànanya. Hàla peka-nanyaka i Yuàpu jàka nggàra-yaka bàdi napa na papanii-na.

⁴Ka hurungu-nanyaka nuna na tau kawini la hanganji, hi na-patika ba na-maraku-nya, hi napanii, “Miringgu duku ma-mangarangu, ndula àruka!” wàna.

⁵“Nggàraya nu?” hi wàna na hanganji. Nahema nuna na kawini, “Nyungga yia kawini meti lei milaka. Na leinggu nameti-ka.

⁶Ninja da ananggu da madua anakeda miniha, la hau lodu dapawui la maràda. Ba nda ningu ma-pahewa-nja, ka pameti-nanyaka na haàtu paraï na anguna paluhu.

⁷Tàka nàhu mbuu ndàbada da nua kalembi-nggu dapapa hàlangga dàngu da-pambana-ka ka kupuli-nya lai nyuda na ananggu na ma-pameti angu dedina, ka huku pameti-ya, nadu nyuna ba na-pameti-yaka na anguna paluhu. Jàka kupuli-manyaka nuna na ananggu, ka pa-mehangu-dunggu-nyaka. Pamau-danyaka napa na pamonu-kinggu ba ana didi-maaya tàka nda haàtu-apa ananggu mini ma-kanjepi ndumana na leinggu na ma-panua-nya na kawuku-na,” wàna.

⁸“Màla ubeliwa,” wàna na hanganji, “napa ka ku-paloku-yaka na palakara nuna,” hi wàna.

⁹“Tamu umbu ma-mangarangu,” hi wàna na tau kawini, “jiapa ka nda nggàraya kadu na pawunda-mu, tàka nyungga-maka dàngu kalembi-nggu duku maita-ya na injana; nyumu dumu Tamu umbu dàngu kuru umamu nda nggàra-a njalami,” wàna.

¹⁰Nahema na hanganji, “Jàka ningu ma-pangàdu-nggau, ngàndi biaya yiahu lai nyungga, nda jia hili ngguma-ana-nggaupa napa,” wàna.

¹¹Nanapa-ya nuna na kawini, “Màla àru Tamu umbu kau hamayangu lai MIRI Alamu, ka pekuna na tau na ma-patikingu pa-pahimbalu-nya na metina na ananggu ka àmbu natoma la pawunda-ya na akatu na marihi bokulu la pahili pameti-ya na ananggu na haàtui,” hi wàna. Nahema i Ndautu, “Parongu-na i MIRI na maluri, na anamu nda nggi - nggiki-adanya, jiapa ka hawutu ndiambu,” wànanya.

¹²Ka panii-nanyaka na tau kawini, “Tamu umbu ma-mangarangu, pahia-kingga làti ka kuhili panii hawutu,” wàna. “Hàmu na,” hi wàna na hanganji.

¹³Napaya nuna na tau kawini, “Ba panii tumu nu miri, peka-munyaka ba nyumu wiki-maka manjala, ba ndau pahia-nya na anamu pabeli welingu la ngia pa-hinggilu-na. Nggikina Tamu umbu hi mutuu manjala tungu nu hangganya na banjaru-na i Ala?

¹⁴Nyuta mbuu ndàbanda napa ba jiangu-madu tameti; nyuta yia beri wai mambungu la tanata, nda peku hilu pauhi-anda-nyapa. I Ala nda na-patikingu-mbu la pahilu paluri beliya na mambàda meti. Jia ba tuna Tamu umbu mu-pawiti-nyaka bàdi ka nabeli beli na tau pa-wàrungu.[34]

¹⁵Tamu umbu hi ku-hurungu la hanggamu nadu nyungga ba ningu ma-pangàdu-ngga. Ku-kanandi-nya nahàmu-pa ka kupanii dànya nyuna wànggunggau miri, nadu na pa-monunggu nahema hàmu-maka duku i Tamu umbu wàna na etinggu.

¹⁶Na pa-kanandi-nggu na-patingi-mangga duku i miri, hi na-pamara-ka la tau mahimbu-ngga wihuna la pa-pameti-ka dàngu na ananggu, wànggu. Ningu pawuku-da màta ka hinggalu-ha welingu la tana na pawua-na i MIRI la banjaru-na.

¹⁷Na pa-kawana-nggu na paràndi-mu Tamu umbu jia-yaka na handera-nggu la pamara, nadu nyumu Tamu umbu ba beri papalewa-na i Ala-dukau, na mapingu la paheka-nya na mahàmu dàngu na ma-akatu.[35] Mili àru i MIRI na Alamu Tamu umbu ka na-karaha mànukau!” wàna.

¹⁸Nahema na hanganji, “Ka ku-paàra-nya hangia wànggunggau, màta kau hema patànjingu,” wànanya. “Màla Tamu umbu panii bia,” hi wàna.

¹⁹Napaya na hanganji, “I Yuàpu nu na ma-paràha-nggau?” hi wànanya. Nahema na tau kawini, “Parongu-na na ndewamu miri, nyungga nda peku-ana pa-hinggilu-nya na hema-nggunya na pa-paàra-mu miri.[36] Ma-tubanguya miri, nyuna-maka i Yuàpu na mapanii-ngga jàka nggàra pawunda-nggu dàngu jàka nggàra papanii-nggu.

²⁰Tàka hi tuna nu Tamu umbu màta ka panjàpu dàngu hàmunya na rukuna nuna wàna. Nadu nyumu Tamu umbu ma-manggàna-kau hama tuna na papalewa-na i Ala, hiu pi hàlanya jàka nggàraya napa na matumbu,” hi wàna.

²¹Hàlaka nu na hanganji hi na-paaunya i Yuàpu dàngu hi napanii-nya, “Na parinju-mu nyumu napa ku-pajàngapu-nya. Luawa papiti-ya i Àpuhalomu kau karia-nya yiahu,” wànanya.

²²Patika-nanyaka i Yuàpu la hanggana i Ndautu, hàla hi napanii, “I Ala na-pakanyuru-kau miri! Nàhu pi-nggunyaka bau hàmungga nyungga, nadu bau pa-jàngapu-nyaka na pa-kamahi-nggu,” hi wàna.

²³Ka laku-madua-nanyaka i Yuàpu la Nggehuru, hi na-karia belinya i Àpuhalomu la Yeruhali.

²⁴Ba tuna na hanganji nda na-pahia-anya i Àpuhalomu pa-ngiangu ningu la uma hanganji, “Nda ku-mbuhangu nyungga paita-ya,” wàna. Jia-duyaka i Àpuhalomu hi nalaku pangalangu la uma wikina, dàngu nda na-hurungu-a la hanganji.

²⁵I Àpuhalomu nawotu hàlanya tau ba nyuna na marihi paràka miningu la nggubulu Ihirailu. Nda hili ningu haàtu marihi-nya la paràka miningu. Piti welingu la tàbalu wihina lupa la hupu ruu lunggina nda ninguma nyurana.

²⁶Na lunggina lalu mbana timbiya, nyuna na-handàkangu-ma bàdi hau ndaungu pa-kàtahu-ya na lunggina, ba lalu malaina dàngu ba lalu mbotuna. Na lunggina na pa-kàtahu na mbotuna narihi-nyapa na dàmbu kilu tundunya na timbangu hanganji.

²⁷I Àpuhalomu ningu anana tau madua haàtu mini dàngu haàtu kawini na malalu mbana manandangu-na, Tamàru-ya na tamuna.

²⁸Mbàda dàmbu ndau-naka i Àpuhalomu ba ninya la Yeruhali, tàka ndedi-mapa na-pahàmburu dànya na hanganji.

²⁹La hau na lodu napaau-nya i Yuàpu, ka paràha-nya pa-hurungu la hanganji, tàka i Yuàpu nda nabihu pamai. I Àpuhalomu nahilu paau-manyai, tàka i Yuàpu daingu-mana ba nda nabihu pamai.

³⁰Tunaka nu i Àpuhalomu hi napanii-nja ba hapajia-ha da atana, “Nyimi mipinya wànggu na wokana i Yuàpu la papana na wokanggu na pa-tondungu kamànggihu? Iluawa kai huluya nuna na woka,” wànanja. Ka lua-danyaka pahulu-ya.

³¹Ka mai-nanyaka i Yuàpu la umana i Àpuhalomu hi na-paàra-nya, “Nggikina da atamu hi dahulu-ya na wokanggu?” wànanya.

³²Nahema i Àpuhalomu, “Ka ba ndau bihudu pamai ba ku-palewa tau papaau-nggau. Ka ku-palewa-ya pa-hurungu la hanganji wànggunggau kau patàka-nya na paàrangu-nggu, ‘Nggàra lingu-naka ba ku-dunjaku-nya la Nggehuru hi ku-pamaingu lai yiahu? Nahàmu-pa duku làti jàka haningga lai nu, wàna,’ wàmunya,” wànanya. Hàla i Àpuhalomu hi na-pangala-nya na paniina, “Pa-mukarungu-ma nu ka lupa napeku ba ku-hurungu la hanganji, dàngu jàka ningu-madupa njalanggu, nedingu-manggunya duku ka huku pameti-ka,” wàna.

³³Tunaka nu ka lua-nanyaka i Yuàpu pa-hurungu la hanganji Ndautu dàngu hi na-patàka-nya na pa-kamahi-na i Àpuhalomu. Hàla paau-nanyaka i Àpuhalomu paraïna hanganji, tàka hi namai i Àpuhalomu hi na-patika la hanggana na hanganji. Tàka hi nanggepi puduku-ya paraïna hanganji.