Read Kambera 2 HAMUILU 15 Bible Online

2 HAMUILU 15 - Kambera bible

2 HAMUILU 15

¹Hàlaka patuna nu i Àpuhalomu pa-yemangu-nanyaka nduma wikina hau kareta pabera dàngu njara hamanai tau lima kambulu malaku karia-nya.

²Nimbihu lodu nahada mba - mbarungu i Àpuhalomu hi nalua pa-ndolaku la hingi ànda la ngaru pindu bokulu uma hanganji. Nimbihu-na na tau mamai papeka palakara la hanganji, napaau-nya dàngu na-paàra-nya paraïna i Àpuhalomu, “Nyumu nggi kabihu-kau?” wànanya. Jàka dahema-ya, “Welinggu la kabihu nggunangu, ngganangu,” jàka wànaka,

³ka panii-nanyaka i Àpuhalomu, “Tundunya na uku nyumu ma-patubangu, jia-ayaka nyuna na pamila eti wàngu ba nda ningu wakilu-na na hanganji na matanggu patingi-nya na palakara-mu,” wànanya.

⁴Hàla nahili tunya anguna, “Làti ngera hama tuna jàka hakimu-ka nyungga, nimbihu-na na tau na maningu pahili-na jàka ndia na maningu pa-karuhi-na, pekuna ka namai lai nyungga tàka nyungga duku kuwànya mamola,” wàna.

⁵Jàka ninguka tau ma-ndàharu lihinya i Àpuhalomu la pa-patika ka maraku-nya nyuna nanggepi pajola-nya lima, hi narohu-ya dàngu hi na-puduku-ya.

⁶Tuna nu na pawàna i Àpuhalomu hanggangu la nimbihu tau Ihirailu na mangàndi palakara-na la hanganji, ba wàngu patuna nu piti-nanya eti tau Ihirailu.

⁷Palàngangu-ka patu[37] mbua ndaungu, panii-nanyaka i Àpuhalomu lai Hanganji Ndautu, “Ama, puli àrungga ka kulua la Hemburungu la pa-pahàra-nya na panjanji-nggu lai MIRI.

⁸Nadu ba ninggapa la Nggehuru la Hiria, ku-panjanjingu ba kulua palumu-nya i MIRI la Hemburungu,[38] jàka na-pahia-ngga Nyuna pabeli la Yeruhali, wànggu,” wàna.

⁹Nahema na hanganji, “Lua wàngu mambiru-ka duna,” wànanya. Ka laku-nanyaka i Àpuhalomu la Hemburungu.

¹⁰Tàka ba ndedipa nu mbàda palewa-naka tau la mbuu ndàba kabihu Ihirailu mangàndi lii, “Jàkai ronguka lingu taropitu, handàka warangu-ma, ‘I Àpuhalomu hanganji-yaka la Hemburungu!’ wàmima,” wànanja.

¹¹Welingu la Yeruhali ningu tau dua ngahuya na matundu-nya i Àpuhalomu la Hemburungu. Nyuda nda nggàra-a duda papida na rukuna nuna na pahama kangunduhu, tàka nyuda ba da-tundungu nda nggàrambu papàda-da.

¹²Hàla ba talànga wotuna maraku i Àpuhalomu, na-palewa-mbu tau la paraingu Nggilu papaau-nya i Ahitopilu, na haàtu ama bokulu-na i Hanganji Ndautu. Tuna nu na ma-pahama kangunduhungu la palawa-nya na hanganji ba ngeri kapàru-nanyaka, ngeri da - dangu-mana-nyaka na tau na makiku-nya i Àpuhalomu.

¹³Tunaka nu ninya na haàtu na tau na mangàndi lii hi na-patàka-nya lai Ndautu, “Na tau Ihirailu na-hapeparu-ka lai Àpuhalomu,” wànanya.

¹⁴Hàla i Ndautu hi napanii-nja mbuu ndàbada da panggawi-na da maninja la Yeruhali, “Màlawa ka ta-hinggilu kàdi. Jia-makia-yaka nuna na ànda hi tamara welingu lai Àpuhalomu. Nda namandai-apa ba nàmunya. Pa-renggangu, napa natoma-dunda hi natalu-ta, ka lupa pameti mbuta-nanyaka na ihi paraingu!” wàna.

¹⁵“Hàmu, Tamu umbu,” wàda. “Wai rehingu-mamanya duma la pawànya jàka nggàra wàmu Tamu umbu,” wàdanya.

¹⁶Hàla hadangu-nanyaka na hanganji, hi datundu-nya paraï da kalembi-na dàngu da panggawi-na, hinggilu-da da kala wihina ba tau hakambulu-ha da madaiya na uma hanganji.

¹⁷Ba da-dunjaku-nya na paraingu paraïna hanganji dàngu mbuu ndàba da matundu-nya, pànjangu-danyaka la lihi uma na mangia hupu.

¹⁸Mbuu ndàbada da panggawi hanganji da-ndolaku[39] la hapapa-na ba talànga nàhunja da pamba manggangu hanganji da ma-pajurungu pa-mangilu-nja. Dàngumbu da panjuri da manomu ngahuda da matundu-nya welingu la Nggàta, da-pajurungu la hanggana.

¹⁹Ba naita-yaka na matuna nu na hanganji hi napanii dànya i Itaï, na liku-uruda da panjuri nomu ngahu, “Ka nggikina nyumu hiu kikumbu-nggama nyuma? Nahàmu-pa kau beli kau ndàdiku dànya na hanganji bidi. Kanii hi tau nàmukau dumu nyumu ma-hinggilu marau welingu la parai wikimu wàngguka?

²⁰Ndedi mumandai-mbu pa-ngiangu lai yiahu, nggiki hama paràha-nggunggauka pa-tundungu la pa-njadangu karia-ngga nyungga? Nyungga wiki nda kupi-mbunya jàka nggi kulaku ningu. Kabeli-wa dàngu karia-njawa da angu banjaru-mu màla àru i MIRI ka namila-nggau eti dàngu ka naingu-na na tuturu-na lai nyumu,”[40] wànanya.

²¹Tàka nahema i Itaï, “Tamu umbu ma-pangarangu, parongu-na i MIRI na maluri dàngu parongu-na na ndewamu Tamu umbu, jiapa nda nggi mu-hanggangu ningu, jiangu-ma duku ba kutundu-nggau, jiapa-kadu nuna ka pameti wànguya,” wàna.

²²“Ka nahàmu-du!” hi wàna i Ndautu, “ndàharu pangalangu!” wànanya. Ka laku-nanyaka i Itaï dàngu mbuu ndàbada da pambana lupa da kalembi-na.

²³Na-kaladaku hàla na rayatu ba nahii, ba nàhunja da pambana i Ndautu ba da-dunjaku-nya na paraingu. Tunaka nu na hanganji napala-ya na ana Luku Kindurungu, da-tundungu hàla da pambana, hàla hi dalaku hanggangu la maràda telangu.

²⁴I Ratu Handuku dàngu i Ratu Àpuyataru[41] nimbunja ba da-kariangu hàla da tau Lewi da mangàndi-ya na Pàti Pa-ràndingu-na i Miri. Na Pàti Pa-ràndingu da-banjalu-ya,[42] nda dahili danda-anya jàka ndedi na-hadangu hàla na rayatu la pa-dunjaku-nya na paraingu.

²⁵Ka panii-nanyaka na hanganji lai Handuku, “Pabeli-nya na Pàti Pa-ràndingu la paraingu. Jàka nanamu-duka i MIRI, napa na-pahia-mangga duku pabeli dàngu hi kuita beliya na Pàti Pa-ràndingu hamanai na ngia pa-ngiangu-na.

²⁶Tàka jàka nda nambuha-nggapa i MIRI, ka nyuna biaka duna i MIRI nggiki-nggunya jàka wànangga!” hi wàna.

²⁷Na-pangala-nya na paniina na hanganji lai Handuku, “Wàndaha i Ahimaàhu, anamu dàngu i Yunatàngu, anana i Àpuyataru; kai beli dàngu hàmungu la paraingu.[43]

²⁸Napa nyungga ku-nedingu la lihi ngia papala - ngia papala la luku la maràda telangu, hi lupa ningu lii matàka-ngga welingu lai nyimi,” wàna.

²⁹Hàla i Handuku dàngu i Àpuyataru ngàndi beli-danyaka na Pàti Pa-ràndingu la Yeruhali hi da-paengangu lai nu.

³⁰Hàla i Ndautu àli-nanjaka da halapa-na. Nyuna dàngu mbuu ndàbada da tau matundu-nya da-kandekalu la Palindi Haitungu dàngu hiida, ba dàngu tamalingu-da tanda hawina-da.

³¹Ba ninguka tau mapanii-nya i Ndautu,[44] i Ahitopilu na-kapuli karia-mbunyaka i Àpuhalomu wàdanya, ka hamayangu-nanyaka i Ndautu, “Dou MIRI, màla àru kau pabeta-nya na panaungu-na i Ahitopilu!” wàna.

³²Ba natàka-ka i Ndautu la pinu palindi la ngia palumu-nya i MIRI, danggepi-ya paraï da anguna da ma-tuturu, nu i Huhai tau Àraki. Da pakina i Huhai da-kahira tàka na katiku-na hi natunya kumburu tana.

³³Napanii dànya paraïna i Ndautu, “Jàka mu-tundungu nyumu, nambotu-ka na ngàndinggu.

³⁴Tàka nyumu pekuna bau ndulaka, jàka ubeli la paraingu dàngu kau panii dànya i Àpuhalomu, nàhu ba nyunaka na pangguma-mu, hama tuna àmangu bau nggumanya na amana, ba tumu nu peku-naka bau pabeta-nja mbuu ndàbada da panaungu-na i Ahitopilu.

³⁵I Handuku ada i Àpuyataru nimbu-njaka lai nu. Patàka hàlanja lai nyuda mbuu ndàbada da parongu-mu la uma hanganji.

³⁶I Ahimaàhu anana i Handuku dàngu i Yunatàngu anana i Àpuyataru da-pakikungu la amada, ba tuna nimbunja nyuda lai nu. Da anakeda nuda màta kau palewa-ha lai nyungga ka dangàndi-ha da lii da pambàda rongumu,” wànanya.

³⁷Ka beli-nanyaka i Huhai, anguna i Ndautu, la Yeruhali, nadeni pàkunya na tàkana i Àpuhalomu lai nu.