Read Kambera 2 HAMUILU 16 Bible Online

2 HAMUILU 16 - Kambera bible

2 HAMUILU 16

¹Ba hinama-apa i Ndautu ba na-lembaru-ya na pinu palindi, hi jia nàmu bianya i Himba, na pa-palewa-na i Mepimbohitu, nalua tomaya ba nangàndi dua ngiuda da kalandai pa-pakàlatungu dua ngahuda da roti, hangahu rangguda da angguru màdu, hangahu paida da wua ai ma-bidingu dàngu hau taneku-na na wai angguru.

²Na-paàrangu i Hanganji Ndautu, “Nggàra ila-njaka yiada yia?” wàna. Nahema i Himba, “Da kalandai yiada màta ka da-kaliti da tau la kuru umamu Tamu umbu, da roti dàngu da wua ai ndumada da atamu, dàngu na wai angguru yiana màta ka da-unungu da manjili la maràda telangu,” hi wàna.

³Hàla hi na-paàrangu na hanganji, “Ka nggiyaka i Mepimbohitu, na umbuku-na na Tamu umbumu i Haulu?” hi wànanya. “Nyuna daingu-manapa duna la Yeruhali,” hi wàna i Himba, “nadu nyuna ba pamàndu-mana-nyapa, nàhu jia-yaka na rehina na tau Ihirailu ba na-pabeli-nya na pa-hanganji-na i Haulu, bokuna,” hi wàna.

⁴Ka panii-nanyaka na hanganji lai Himba, “Mbuu ndàbada da manguna i Mepimbohitu, nàhu mangu hàlamu nyumu-haka,” wànanya. “Malangu-mu Tamu umbu,” hi wàna i Himba. “Mili àruki Tamu umbu kau namu mànuka!” hi wàna.

⁵Ba natàka-ka i Ndautu la Mbahurimu, luhu-nanyaka na haàtu na tau welingu lai nu, ba dàngu mai lihi-nanya na pambana na hanganji, naràtu-nya i Ndautu. Na tau nuna jiaya i Himei anana i Nggera, welingu la kalembi-na i Haulu.

⁶I Himei natuku wànya watu i Ndautu dàngu da panggawi-na, jiapa-kai ka da-winggiru-nya paraï da tau la wawana dàngu ba hapajia-ha da parawira-na.

⁷I Himei naràtu-nya i Ndautu, “Laku! Laku! Ma-pameti tau! Ma-akatu!

⁸Nyumu mbàda wàhi-munyaka na pa-hanganji-na i Haulu! Nàhu nyumu huku-nanggauka i MIRI, nadu ba lalu mbana dangu-daka da pa-pameti-mu da kalembi-na i Haulu. I MIRI wua-nanyaka na pa-hanganji-mu lai Àpuhalomu, na anamu. Nàhu làjaru-munyaka ha ma-pameti tau!” wànanya.

⁹I Ambihai, na erina i Yuàpu, anana i Haruya, napanii dànya na hanganji, “Ka nggikina Tamu umbu hiu puli bianya nina na ma-pakubaru ba naràtu-nggau Tamu umbu? Pulingga nyungga ka kurori-ya na nggoruna!” hi wàna.

¹⁰Tàka na hanganji hi napanii-nja i Ambihai dàngu i Yuàpu, na ayana, “Màtangu, àmbi ihi-lidunya. Màta bianya ka naràtu-ngga. Nadu jàka i MIRI na ma-paràha-nya nggamu na maningu wai ngabana la pa-paàra-nya jàka nggikina hi tuna nu?” wàna.

¹¹Hàla i Ndautu hi nahili paniinya i Ambihai dàngu mbuu ndàbada da atana, “Jiapa-kingu na ana wikinggu na-patikingu-du pa-pameti-ka, nggikina nyimi hi mi-hangàtaru bai itaya na hurina nina na tau Mbanyamingu? I MIRI-maka duna na ma-paràha-nya la paràtu-ngga nyungga; jia-duya àmbu nggi - nggiki diminya, màta bianya ka na-ràtungu.

¹²Talànga wanguna na-hamata-maya duku i MIRI na pa-hambeta-nggu[45] yiana dàngu hi na-pakanyuru-ka himbalu-na nuna na ràtungu,” wàna.

¹³Hàla laku pangalangu-danyaka i Ndautu dàngu ba hapajia-ha da karia-na, tàka i Himei pangga parenggangu-mananyai duna la karaha palindi, ba dàngu ràtungu-na dàngu tuku wànanja watu dàngu tana.

¹⁴Na hanganji dàngu mbuu ndàbada da tau la wawana njili dira matiki-haka ba datàka la Luku Yorundangu,[46] hi da-hangahu lai nu.

¹⁵Ba talànga tunaka nu i Àpuhalomu dàngu mbuu ndàbana na tau Ihirailu na ma-karia-nya tama-danyaka la Yeruhali; i Ahitopilu na-kikungu-mbu.

¹⁶Nu i Huhai, anguna i Ndautu na ma-tuturu, ba na-hàmburu-yaka i Àpuhalomu, warangu-nanyaka, “Na-miripu-wa na hanganji! Na-miripu-wa na hanganji!” wàna.

¹⁷Tàka i Àpuhalomu hi na-paàra-nya, “Ka nggiyaka na tuturu-mu la ariyaa-mu i Ndautu? Ka nggikina nyumu hi ndau tundunya?” wàna.

¹⁸Nahema i Huhai, “Nggiki peku-naka! Nyungga duku ku-hapeparu la tau papindi-na i MIRI, papindi-na yiana-ka na tau dàngu mbuu ndàbana na tau Ihirailu. Nunaya duku na tau na patundu-nggu.

¹⁹Hinggilu-nai, hilu nggamuyai na pangguma-nggu, jàka nda jiaya na anana na miringgu? Hama tuna ba kungguma-nya na maràmba amamu, tuna numbu ba kungguma-nggau nyumu nàhu Tamu umbu,” wàna.

²⁰Tunaka nu i Àpuhalomu hi napanii dànya i Ahitopilu, “Màla nggikina wàndaka bàdi,” hi wàna.

²¹Nahema i Ahitopilu, “Lua toma-hawa da kala wihina na amamu da pa-bànjalu-na la padaiya na uma hanganji, dàngu kau katuda angunja. Nggubulu ndàbana na tau Ihirailu napa pi-danyaka ba tumuka nu nareki-kauka na amamu ba muhu-nanggauka. Hi da-bonjangu patoru mbeni mbuu ndàbada da tau da makiku-nggau,” wànanya.

²²Jia ba tuna, hi dawulu-nya maü tera i Àpuhalomu dita la toku ndidu uma hanganji na ma-linjaku. Hàla la hangga matana mbuu ndàbana na tau, i Àpuhalomu natama la maü tera, hi na-katuda angunja da kala wihina na amana.

²³La rehina nu nimbihu-da da lii panaungu-na i Ahitopilu nanggepi-ya tau hama tuna puluna i Ala wiki maya; i Ndautu-kai hamanai i Àpuhalomu-ka datundu-manya na panau - panaungu-na i Ahitopilu.