Read Kambera 2 HAMUILU 17 Bible Online

2 HAMUILU 17 - Kambera bible

2 HAMUILU 17

¹Ndedi nggi mandai ba hàlaka nu, i Ahitopilu nahilu paniinya i Àpuhalomu, “Pulingga ka kupindi tau 12.000. Taï la rudungu ka kulaku pa-naitaku-ya i Ndautu.

²Nyuna napa ku-kangaburu-ya ba talànga njilina dàngu ba talànga wadaru-na na ringgitu-na. Napa ka ku-pakatàtaku-ya, hi lupa mbuu ndàbada da tau karia-na dapalai wàrunya. Jiaya nyuna-a na hanganji Ndautu napa na pa-pameti-nggu.

³Tàka mbuu ndàbada da tau la wawana napa ku-pabeli-nja lai nyumu Tamu umbu, hama tuna na bidi papa kawini na mabeli la mapaha-ya. Màla hi jiaya na lurina na haàtu-a wànggu-ka na parinju-mu?[47] Jàka jiaha hawiangu àmbu nggi - nggiki-dundanja,” wàna.

⁴Na panaungu nuna nahàmu ba nareki-ya i Àpuhalomu dàngu mbuu ndàbada da liku uru la Ihirailu.

⁵Jiapa ka tuna nu, napanii nyuna i Àpuhalomu, “Paaunya nàhu i Huhai, màla ka tarongu-ya na pa-kanandi-na,” wàna.

⁶Ba natàka-ka i Huhai pa-hurungu lai Àpuhalomu, nyuna i Àpuhalomu hi napeka-nya na pa-pakaka-na i Ahitopilu, hi napanii-nya, “Màla takiku-nyaka bàdi na panaungu-na i Ahitopilu, hi ndia? Jàka ndia paniinda hau ànda,” wàna.

⁷Nahema i Huhai, “Na panaungu-na i Ahitopilu la handàka-na nàhu nda nahàmu.

⁸Bau pi-madunja umbu, i Ndautu dàngu da tau la wawana ba bai tau ndàmangu pambeni hanggangu kaborangu-ha. Nyuda da-mbàringu hama tuna bai mbaruangu mbulangu anaha. Hinggilu-nai i Ndautu bai panjuri manyàmungu-yaka, nda na-handàkangu-a patodu karia-nja da tau la wawana.

⁹Talànga wànguna nàhu kawiningu-nanya la hau kubu liangu jàka ndia la hau pa-ngiangu. Jia ba tuna, ngera hama tuna da tau la wawamu nyumu ka na-kangaburu-ha paraïna i Ndautu, tàka hi ningu ma-yàmihu, nggamu biaya na marongu-ya na rukuna nuna, ei na-pakàku-haka da tau la wawana i Àpuhalomu wàda-maka duda.

¹⁰Napa da tau da marihi mbeni torungu dàngu da marihi mbàringu hama tuna hingambu, jiangu-maka napa ba da-wudutu. Nadu mbuu ndàbana na tau Ihirailu dapinya na amamu nyumu umbu ba mini la ngoraya, dàngu da tau la wawana ba mini mbeni hanggangu ma-kanjupu kaborangu-ha.

¹¹Jia ba tuna na panaungu-nggu nyungga nuya: Pauhi hàlanya na tau Ihirailu la nggubulu tana, hi lupa na danguna hama tuna wara la hingi tehiku. Hàla nyumu wikima bàdi umbu mahada ngàndiha nyuda la pa-kangaburu.

¹²Napa tahunggu-maya duna i Ndautu la nggi bia, dàngu napa ka ta-kangaburu-ya dàngu ndedi mbutingu-na jàka nggàraya na matumbu. Napa nda hili ningu-a ma-tamàhiku, ka nyuna-ka jàka ndia da tau la wawana-kai.

¹³Jàka era palai-na la hau paraingu, mbuu ndàbana na rayatu-nda napa dapiti kalorungu ka tawindu hànditu-ya nuna na paraingu,[48] ka na-kabuhaku la lolangu lihina. Àmbu ningudu hau watu maenga-na lai nu la palindi,” wàna.

¹⁴Narongu-yaka nuna i Àpuhalomu dàngu mbuu ndàbana na tau Ihirailu, panii-danyaka, “Na panaungu-na i Huhai nahàmu ningupa welingu la panaungu-na i Ahitopilu,” wàdaka. Tubana, i MIRI-maka duna na mambàda botaya la pa-ratahu-ya na panaungu-na i Ahitopilu na mahàmu làti, ka peku hanggàmaru-na i Àpuhalomu.

¹⁵Hàlaka nu i Huhai hi na-wàlahu-nja da ratu Handuku dàngu i Ratu Àpuyataru, na panaungu-na i Ahitopilu dàngu na panaungu wikina nyuna lai Àpuhalomu dàngu ba hapajia-ha da liku uru Ihirailu.

¹⁶Napanii i Huhai, “Parenggangu! Paniinya i Ndautu ka àmbu natodu ningu la ngia papala la luku la maràda telangu. Nyuna màta ka napala parenggangu la Luku Yorundangu. Jàka nda tuda nu, nyuna dàngu da pambana napa da-pakabu-ha,” wàna.

¹⁷Ba talànga tunaka nu i Yunatàngu anana i Àpuyataru dàngu i Ahimaàhu anana i Handuku patiangu-da padua la lihi matawai Eni-Ronggilu, la hingi paraingu Yeruhali. Nyuda nda datoru mbenia patama la paraingu, ba da-mangàdatu paita-ha tau. Hama tuna na pakàli wàda, na haàtu ata kawini na-patàka-nja lai nyuda na lii na pa-patàka-danya napa i Hanganji Ndautu.

¹⁸Tàka la rehi nu ninya na haàtu na anakeda mini na maita-ha, ka patàka-madua-nanyaka i Àpuhalomu. Jia hi dapare - renggangu palaku hi da-kapàndi la umana na haàtu na tau la paraingu Mbahurimu. La lihina na uma nuna ningu humuru hi datama daa.

¹⁹Na papaha-na na mangu umangu na-palàmbaru-nya hinggi ndàbina la pinu ngaru humuru hi na-wewaru-nya uhu nggàndumu dita, hi lupa nda pahili itaya nuna na humuru.

²⁰Da atana i Àpuhalomu tàka-madua-danyaka la uma lai nu, hi da-paàra-nya na tau kawini kawai, “Nggihaka i Ahimaàhu dàngu i Yunatàngu?” wàda. “Nyuda bidi pala-ma-adanya na luku,” hi wànanja. Dahimbu-ha nuda da bidi mini, tàka nda dahunggu-aha, ka beli-danyaka la Yeruhali.

²¹I Ahimaàhu dàngu i Yunatàngu luhu-danyaka welingu la humuru, hi dapare - renggangu palaku tomaya i Ndautu, hi da-wàlahu hàlanya. Dapeka-nya, “I Ahitopilu na-wuangu panaungu la pa-hàngapu-kau nyumu Tamu umbu. Jia ba tuna hadangu-wa nàhuma kai palaya na luku yiana,” hi wàda.

²²I Ndautu dàngu da tau la wawana pala-danyaka na Luku Yorundangu, ba datàka la hapapa pabarahu-yaka.

²³Nyuna i Ahitopilu ba napi-nyaka na panaungu-na ba nda patundu-nya, wotu-madua-nanyaka na helana na kalandai-na, ka beli-nanyaka la paraingu wikina. Ba na-hàlaka pa-palànyapu ndàbaha da pa-paloku-na, kandila-nanyaka wikina, hi taninya la reti hapa-kalembi-na.

²⁴I Ndautu mbàda tàka-naka la paraingu Mahanaïmu, ba napala-ya na Luku Yorundangu i Àpuhalomu, ba dàngu tundu-nanya tau Ihirailu. (

²⁵I Àpuhalomu nawotu-yaka i Amaha liku-uru pamba tanatara hiluna i Yuàpu. I Amaha anana i Yitura tau Ihimailu;[49] na inana i Ambinggaïlu-ya na tamuna anana i Nahàhu, na anguna kawini i Haruya inana i Yuàpu.)

²⁶I Àpuhalomu dàngu da tau la wawana da-pamaüngu la tana Nggiliatu.

²⁷Ba natàka-ka i Ndautu la Mahanaïmu, nyuna nanggepi-ya paraïna i Hombi, anana i Nahàhu, welingu la paraingu Ramba la Amungu, dàngu paraïna i Makiru anana i Amialu, welingu la Londimbàru, dàngu i Mbàrahilai, welingu la Ronggilimu la Nggiliatu.

²⁸Nyuda dangàndi kaba kawinga, kawalu dàngu topu lati ndumana i Ndautu dàngu tau la wawana; dàngumbu uhu nggàndumu, kamanggihu, kanguta, uhu nggàndumu pa-handarangu, kambii rara, kapapangu, manggaluangu, kenju, huhu ka windaku dàngu ba pi - pirada da mbimbi. Dapinya nyuda i Ndautu dàngu tau la wawana ba manjiu-danya, madau-danya dàngu ba mànggilu-danya paraï palaku-nya na maràda telangu.