Read Kambera 2 HAMUILU 19 Bible Online

2 HAMUILU 19 - Kambera bible

2 HAMUILU 19

¹Ningu mapanii-nya i Yuàpu, ba hii-nanya i Hanganji Ndautu dàngu hawina-nanya lumuna i Àpuhalomu.

²Na talu la lodu nuna na-pambeli-yaka pa-hawina wàna mbuu ndàbana na tanatara-na i Ndautu, nadu ba darongu-ya na hanganji ba hii-nanya na anana.

³Dawàngu pa-kangunduhu-maaka ba dabeli la paraingu, hama tuna na tanatara na ma-makia ba napalai welingu la ngia pa-kangaburungu.

⁴Na hanganji na-palumburu-manya na matana ba dàngu kaladaku-na ba na-padudurungu, “Doi na ananggu duku! Na ananggu i Àpuhalomu! Àpuhalomu na ananggu duku!” wàna.

⁵Ka hurungu-nanyaka i Yuàpu la hanganji hi napanii, “La lodu nàhu nyumu Tamu umbu pamakia-munjaka da tau la wawamu, tàka làti duna nyuda da mambàda pamara-ya na lurimu Tamu umbu, da lurida da anamu mini kawini, da papaha-mu, da kala wihimu.

⁶Nyumu Tamu umbu mumbuha-nja da tau da makaraü-nggau eti, tàka hi mu-karaü-nja eti da tau da mambuha-nggau nyumu Tamu umbu! Lohangu-mana-nyaka Tamu umbu bau paita-nja ba hapajia-ha da parawira dàngu ba hapajia da tanatara-mu ba nda ningu linguda nyuda lai nyumu Tamu umbu. Malai da-pàda-manyaka ba lalu hàmu-aya làti na etimu la lodu nàhu jàka luri-nanyapa i Àpuhalomu tàka nyuma yia ka mameti mbuta!

⁷Nahàmu-mapa nu Tamu umbu kau hadangu dàngu kau luhu tomaha kau pamanda-nja da tau la wawamu. Ku-harangu nyungga, parongu-na i MIRI, nàhu jàka ndau luhu tomaha, la rudungu nàhu-maaka ba nda hilu ningu-apa haàtu ma-mbuhangu paangu-nggau nyumu Tamu umbu. Na matuna nu hanggàmaru marihi bokulu halawàla-mayaka na pahunggu-mu napa la ngala lurimu Tamu umbu,” wànanya.

⁸Tunaka nu hadangu-nanyaka na hanganji hi naluhu. hi nalua pa-mandapu la lihi pindu bokulu. Da tau la wawana ba darongu-yaka ninya lai nu, ka mai hàla-danyaka pa-hurungu lai nyuna. Ba talànga tunaka nu mbuu ndàbada da pamba Ihirailu palai-danyaka hi dabeli la umada haàtu - haàtu.

⁹La honga mbuu ndàbada da kabihu Ihirailu tumbu-nanyaka na pawunjingu-da. Dapanii, “I Hanganji Ndautu na-pamara-taka welingu la tau Pilitingu dàngu na-pahàla-taka welingu la muhu - muhunda hawiangu, tàka nàhu napalai-ka welingu lai Àpuhalomu, hi na-dunjaku-nya na paraingu yiana.

¹⁰I Àpuhalomu ta-katua-yaka la pa-hanganji, tàka nàhu yàmihu-nanyaka la pa-kangaburu. Nggikina hi nda ningu ndoku haàtu ma-patikingu la pa-karia belinya i Hanganji Ndautu?” wàda.

¹¹Na kareuku-da nuna natàka-ma lai Hanganji Ndautu.[50] Jia-duyaka hi na-palewa-ha i Ratu Handuku dàngu i Ratu Àpuyataru pa-paàra-nja ba hapajia-ha da liku uru la Yahunda, “Nggikina hi nyimi-ika ma-malamiri dehi la panggepi-ya dàngu la patundu-nya na hanganji ba nabeli la uma hanganji?

¹²Màla nu nda angu dedi-anggunggai dàngu nda nua kalembi-anggunggai? Nggikina hi nyimi ma-malamiri dehi la panggeli-ka pabeli?” wàna.

¹³I Ndautu na-palewa-mbuha la papeka-nya i Amaha, “Màla nda kalembi-anggunggau nyumu? Piti welingu nàhu wotu-nggunggauka nyumu ka ngora pabera-kau la tanatara-nggu, kau hiluya i Yuàpu. Mili àru i Ala ka na-pameti-ka jàka nda ku-palangatàka-nya na rukuna nuna!” wàna.

¹⁴Tuna nu i Ndautu ba na-ngalangu payila-ya naeti tau Yahunda mbuu ndàbana, hi lupa da-pangàndi-nya langu na hanganji, ka nabeli-wa la uma hanganji karia-nja mbuu ndàbada da panggawi-na.

¹⁵Ka hadangu-nanyaka na hanganji hi nalaku tàka la Luku Yorundangu, nu ba talànga tuna nu da tau Yahunda mbàda tàka-daka la Ngginggalu la papiti-ya na hanganji dàngu la pamangga-nya ba napala-ya na luku.

¹⁶I Himei anana i Nggera, na tau Mbanyamingu, tau 1.000-ya na pa-karia-na welingu la kabihu Mbanyamingu dàngu hi napare - renggangu palaku karia-nja da tau Yahunda la pa-kataku-ya na hanganji. Tuna numai duna i Himba na tau ma-hadangu la kuru umana i Haulu, pa-kariangu da anana ba tau hakambulu malima-ha, dàngu da atana ba tau dua kambulu-ha, mbàda pala-danyaka na Luku Yorundangu ba ndedi natàka na hanganji.

¹⁷

¹⁸Nyuda da mandula-ha da kuru umana na hanganji pa-papala-nja,[51] hamanai la pa-paloku hàlaya ba na-palewa-ha paraïna hanganji. Nu la rehi ka pala-yawa na luku ba wàna na hanganji, i Himei na-patika la hanggana hi napanii,

¹⁹“Ku-kamahingu nyungga atamu, màla àru làti Tamu umbu ka àmbu rekiya ba ni mànu-manggapa la njalanggu. Màla àru kau maromba-nya na pawunda-nggu la lodu dunjaku-munya na Yeruhali.

²⁰Kupàda-manyaka duku ba manjala-ya na pawunda-nggu, jia-duyaka nu, welingu la kabihu - kabihu-ka na ma-ngiangu la ngaba tana mbara dia, nyungga-maka duku ma-kawunga tàka pa-hàmburu-kau la lodu nàhu,” wàna.

²¹Ba narongu-ya nuna paraïna i Ambihai anana i Haruya napanii, “I Himei ràka-mana ka huku pameti-ya, nadu ba naràtu-nya na hanganji na papindi-na i MIRI,” wàna.

²²Tàka nanapa-ya i Ndautu lai Ambihai dàngu i Yuàpu na ayana, “Àmbi tamangu-du. Nggikina nyimi hi mi-pahanduka-ka? La lodu nàhu nyungga hanganji beli-kaka la Ihirailu, jia-duya àmbu ningudu haàtu tau Ihirailu pa-hukungu meti,” wàna.

²³Tunaka nu harangu-nanyaka na hanganji hi napanii-nya i Himei, “Patanggu-nggu nyunggaya ba nda pahuku pameti-akau nyumu,” wànanya.

²⁴Màlambu i Mepimbohitu, umbuku-na i Haulu, namaimbu pa-hàmburu-ya na hanganji. Nyuna nda nabaha wihina, nda na-kikiru-mbu wulu njerina, dàngu nda nabaha-mbuha da pakina, kandai dunjaku-nanya na Yeruhali i Ndautu hi lupa nabeli dàngu nda nggàra ehina.

²⁵Ba natàka-ka i Mepimbohitu welingu[52] la Yeruhali la pa-tàbuku-ya na hanganji, ka panii dàna-nyaka paraïna hanganji, “Mepimbohitu, nggikina nyumu hi ndau kikungga yia nana ba kulaku?” wànanya.

²⁶Nahema nyuna, “Tamu umbu ma-mangarangu, bau pi-madungga nyungga yia ba ku-kanjiku. Ku-paràha-nya na papalewa-nggu la pa-payema-ngga kalandai, pa-kaliti-nggu ka kutundu-nggau nyumu Tamu umbu. Tàka na atanggu na-kaleka-maangga.

²⁷Màlai ba napulu wàngga la hanggamu nyumu Tamu umbu. Na nyuna nyumu dumu hama tuna papalewa-na Alakau. Jia-duya wunda biaya jàka nggàraya na mahàmu bau rekiya.

²⁸Mbuu ndàbana na tau la kuru umana na amanggu ràka-mana jàka uhuku pameti-ha Tamu umbu, ba tuna nyungga duku yia mu-pahia biangga pangangu la uma hanganji. Nàhu duku nda kutoru mbeni-apa pakarai ngga - nggàra welingu lai nyumu, Tamu umbu,” wàna.

²⁹Nahema na hanganji, “Àmbu ningu-dupa ngga - nggàra papanii-mu. Nyungga mbàda bota-manggu-nyaka la pawua hàla-nggauha da bandana i Haulu lai nyumu dàngu i Himba,” wànanya.

³⁰Nahema i Mepimbohitu, “Màta bianya ka napiti hàlaha i Himba. Nyungga duku jiaka-maaka bau beli dàngu hàmungu-ka nyumu, Tamu umbu,” wàna.

³¹Nyunambu i Mbàrahilai, tau Nggiliatu, namai-maka welingu la Ronggilimu la palaku karia-nya na hanganji ba napala-ya na Luku Yorundangu.

³²I Mbàrahilai lalu mbana kaweda-manaka, na ndau lurina mbàda walu kambulu-naka. Nyuna wulu nda ukuya dàngu ba talànga ninya na hanganji la Mahanaïmu àmangu, i Mbàrahilai-maka na ma-payema-nya pangangu na hanganji.

³³Na hanganji nawànda-ya, “Tundungga la Yeruhali, napa ku-pamàtu hàla-manggaunja da pa-kalana-mu lai nu,” wànanya.

³⁴Tàka nahema i Mbàrahilai, “Nyungga nda namandai-apa na luringgu. Jia nggàra lingu-naipa ba kutundu-nggau nyumu Tamu umbu la Yeruhali?

³⁵Na ndau luringgu mbàda walu kambulu-naka, dàngu nda hili ningu-apa matungga pahàmu wàna na etinggu. Nyungga nda kupàda-anyapa jàka nggàraya na panganggu dàngu na pangunu-nggu, dàngu nda kurongu-ahapa da talia nggoruda da maludu. Nyungga napa pambotu-nggunya na buku-maamu Tamu umbu.

³⁶Nda ràka-anggu duku nyungga la pangala-nya na wunda bokulu tungu nu. Nyungga mbuhangu-nggunya pa-kareni-nggau hawutu-a la hapapa Luku Yorundangu.

³⁷Hàlaka nu, puli-nggawa ka kubeli la uma dàngu ka kumeti la lihi retida da ina amanggu. Tàka yiana-ya na ananggu i Kimuhàmu. Pulinya ka na-karia-nggau nyumu Tamu umbu dàngu kau wundaya lai nyuna jàka nggàra biaya na mahàmu bau rekiya nyumu Tamu umbu,” wàna.

³⁸Nahema na hanganji, “I Kimuhàmu napa ku-karia-nya dàngu napa kuangga-ya hama tuna na parinju-mu, dàngu mbuu ndàba-naka na pakarai-mu napa ku-patutu-nya,” wàna.

³⁹Tunaka nu i Ndautu dàngu da tau la wawana pala-danyaka na Luku Yorundangu. Hàlaka i Ndautu hi na-puduku-ya i Mbàrahilai dàngu hi na-pabeli-nya langu. Hàlaka beli-nanyaka i Mbàrahilai la umana.

⁴⁰Nggubulu-da da pamba Yahunda dàngu na beri mandua-da da pamba Ihirailu dakiku-nya na hanganji ba dapala-ya na luku. Hàlaka nu na hanganji hi na-pangalangu la Ngginggalu, tàka i Kimuhàmu tundu-mananya na hanganji.

⁴¹Tunaka nu tàka ndàba-nanyaka na tau Ihirailu la pa-hurungu la hanganji hi dapanii dànya, “Tamu umbu, nggikina da angu dedima da tau Yahunda, hi dareki-ya ba nyuda-a da mangaba-nya la pamai pa-hàmburu-kau dàngu la pa-katindi-kau nyumu hamanai mbuu ndàbana na kuru umamu dàngu da tau la wawamu nyumu Tamu umbu ba palaya na Luku Yorundangu?” wàda.

⁴²Tàka dahema da tau Yahunda, “Ka jia-duya, na hanganji nua kalembi-ma nyumaya. Nggikina nyimi hi mimbeni wànya? Màla nyuma yia natanggu wotu-haka da wurungu-ma na hanganji, jàka ndia nawua-nggama pawua juangu?” wàda.

⁴³Dahema da tau Ihirailu, “Na hàkuma nyuma hanggangu la hanganji na-pahakambulu wundangu-pa welingu la hàkumi nyimi, jiapa ka nua kalembi-mi nyimiya na hanganji. Nggikina nyimi hi mi-pakalana bia-kama nyuma? Àmbi maromba-nya nyuma ma-kawunga patikingu la pa-karia belinya na hanganji!” wàda. Tàka da tau Yahunda darihi malihu-mapa welingu la tau Ihirailu dàngu nda dabihu pakàku.