Read Kambera 2 HAMUILU 2 Bible Online

2 HAMUILU 2 - Kambera bible

2 HAMUILU 2

¹Hàlaka nu paàrangu-nanyaka i Ndautu lai MIRI, “Màla MIRI pekuna wàmu nu ka kulaku pa-kuaha-ya na hau na paraingu la Yahunda?” wàna. “Wua,” hi wàna i MIRI. “Nggi paraingu-yaka nu?” hi wàna i Ndautu. “La Hemburungu,” hi wàna i MIRI.

²Ka laku-nanyaka i Ndautu la Hemburungu da-kariangu dàngu da papaha-na ba dadua: i Ahinuamu welingu la Yihireyilu, dàngu i Ambinggaïlu, kawini Kàramilu na pameti wàruna i Nambàlu.

³Tumanai da tau la wawana dàngu kuru umada haàtu - haàtu dakiku hàlanya i Ndautu, hàla pa-engangu-danyaka la Hemburungu dàngu la winggiru-na.

⁴Tunaka nu da tau Yahunda mai hàla-danyaka la Hemburungu, hi da-katua-ya i Ndautu la pa-hanganji la Yahunda. Ba narongu-ka i Ndautu da tau Yambihu la Nggiliatu ba dahàla-ka patani-nya i Haulu,

⁵palewa-nanjaka tau pa-patàka-nja panii, “Mili àru i MIRI ka na-pakanyuru-nggai, nadu nyimi bai pa-itangu-ka tuturu-mi la hanganji-mi bai paloku-ya na metina la patani-nya.

⁶Jia ba tuna, mili àruki i MIRI ka na-paita-nggai mila etina dàngu tuturu-na lai nyimi. Nyunggambu napa kupali-manggai duku mahàmu ruku ba timi nu.

⁷Pa-màndungu etimi dàngu pa-luangu-wa limami ba mini mbeni hanggangu-kai! Deningu-mana ba mbàda meti-naka i Haulu na hanganji-mi, tàka na nyuna mbàda katua-danggaka paraï tau Yahunda la pa-hanganji-nja nyuda,” wànanja.

⁸Na ngora pabera tanatara-na i Haulu, nu i Àpuneru anana i Neru, napalai karia-nya i Ihimbohitu, anana i Haulu la Mahanaïmu la hapapa Luku Yorundangu.

⁹Lai nu i Àpuneru nawotu-ya i Ihimbohitu la pa-hanganji la ngaba Nggiliatu, Ahiyuri,[2] Yihireyilu, Epuraïmu dàngu Mbanyamingu, màlamai la nggubulu Ihirailu.

¹⁰I Ihimbohitu mbàda patu kambulu ndaunaka na lurina ba tuya hanganji la Ihirailu, dàmbu ndauna ba na-pareta. Tàka na kabihu Yahunda daingu tuturu-mada lai Ndautu,

¹¹tàka i Ndautu na-pareta-ya la Yahunda, pihu ha-kawita mbua ndauna la Hemburungu.

¹²La hau na lodu i Àpuneru nalua welingu la Mahanaïmu la paraingu Nggimbiungu, da-karia-nya tau la wawana i Ihimbohitu.

¹³I Yuàpu, (na inana Haruya-ya na tamuna) dàngu da tau la wawana i Ndautu, lua-madanyai duda lai nu. Ka pa-hanggangu-danyaka nu da dua juruda ma-papapangu la tàma la Nggimbiungu. I Àpuneru dàngu karia-na mandapu-danya mbara yiahu, i Yuàpu dàngu karia-na mbara papaha.

¹⁴Ka panii-nanyaka i Àpuneru lai Yuàpu, “Màla ka ta-pahuhuku-nja da tau la wawanda ka da-pararingu!” wàna. “Hàmudu” wàna i Yuàpu.

¹⁵Ka hurungu-danyaka da tau hakambulu madua welingu la kabihu Mbanyamingu huruna i Ihimbohitu, dàngu tau hakambulu madua welingu la tau la wawana i Ndautu.

¹⁶Ka kawàra pa-hambitu-danyaka lunggi papada, hàla hi da-kawàra pahunju weli kambungu, ka maràngga meti-danyaka. Jia-duyaka na pa-ngiangu nuna la Nggimbiungu la “Woka Hapanda,” hi wàdanya.

¹⁷Hàlaka tumbu-nanyaka na pa-kangaburungu-da na mambàringu, i Àpuneru dàngu da tanatara Ihirailu da-pakàku-ha paraï da tau la wawana i Ndautu.

¹⁸Ni hàla-manja lai nu ba tau madua haàtu-ha da anana i Haruya, nu i Yuàpu, i Ambihai dàngu i Ahailu. I Ahailu na palaina hama palai bai hawurungu-ya,

¹⁹ka nutaku-nanyaka pakeha-nya i Àpuneru.

²⁰I Àpuneru na-nggilaku la kajia hi na-paàra-nya, “Jiakau na Ahailu?” wànanya. “Wua,” wàna ba nahema.

²¹“Àmbu yaulu-duka!” wàna i Àpuneru. “Kamangu làti kau yàpa ningu bia haàtu panjuri kau pitiha da madàka-na!” wànanya. Tàka i Ahailu yaulu pangala-mananya.

²²Nahilu panii i Àpuneru handàkangu lai Ahailu, “Àmbu yauluka! Napa ku-pameti lera-dunggau. Hàla nggikina wàngguka ba kuita mataya i Yuàpu na ayamu?” wànanya.

²³Tàka ba pa-daingu nda bihu-mana pa-pànjangu i Ahailu, ka tungu handalurungu-nanyaka[3] i Àpuneru, hi nanggàna weli kambuya i Ahailu hi lupa nalumbu làpahu na nimbu la kajia-na. Ka nggubalu wàna-ma-duaka i Ahailu, nameti memangu-ma lai nu. Mbuu ndàbana na tau na matàka lai nu la ngia pa-tanulahu-na, na-ndaudaku hàla lai nu.

²⁴Tàka i Yuàpu dàngu i Ambihai pangalangu-madanya payaulu-ya i Àpuneru. Ba natama-ka na lodu, tàka-danyaka la Tandula Ama, la pahunga loduna la Nggia, la tuba maràda telangu Nggimbiungu.

²⁵Lai nu da tau la kabihu Mbanyamingu pa-pohungu beli-danyaka dàngu i Àpuneru, hàla da-wandalu-ha da pambada la pinu hau tandula.

²⁶Welingu lai nu wara-nanyaka i Àpuneru lai Yuàpu, “Màla nu ta-pakangaburu pangalangu-maka bàdi? Ndau pàda-anya dumu na pabera yiana ba ngàndi-nanya mapuri mapaita? Nyuma yia angu dedimi-nggama, angu tana parainda, angu luku mananga-nda. Pirangu-mapa nu bau patiangu, hiu mangu pawua-nja pareta da tau la wawamu ka da-pànjangu payaulu-kama?” wànanya.

²⁷Nahema i Yuàpu, “Parongu-na i MIRI na maluri, làti jàka nda nyumu ma-mangilu ngarumu, jiangu-ma duna làti da tau la wawanggu ba dayaulu pangala-nggai lundu haromu la mbaru,” wàna.

²⁸Hàla i Yuàpu hapii-nanyaka na taropitu ba jiaya na tanda ndumada da tau la wawana ka da-pànjangu payaulu-ha da tau Ihirailu, ka pànjangu-danyaka pa-kangaburungu.

²⁹I Àpuneru dàngu da tau la wawana maru - rudungu-da ba dali ningu la Lolangu Yorundangu, hàla hi dapala-ya na Luku Yorundangu, tàka ba dalaku pangalangu-ka la lodu haromu-na tàka-danyaka la Mahanaïmu.

³⁰Ba na-pànjangu-ka nu i Yuàpu pa-nutaku-ya i Àpuneru, pauhi hàla-nanjaka da tau la wawana. Pi-nanjaka ba tau hakambulu mahiwa-ha da ma-maromba, hinggilu-na i Ahailu.

³¹Da tau la wawana i Yuàpu mbàda tau 360-haka da tau la pambana i Àpuneru welingu la kabihu Mbanyamingu da pa-pameti-da.

³²Hàlaka nu i Yuàpu dàngu da tau la wawana hi dadanda-nya na metina i Ahailu hi datani-nya la reti hapa-kalembi-da la Mbetulehimu. Ka laku maru - rudungu-danyaka hi lupa datàka la Hemburungu la mbaru hada rudungu.