Read Kambera 2 HAMUILU 21 Bible Online

2 HAMUILU 21 - Kambera bible

2 HAMUILU 21

¹Ba jiaya na-katangu-na pareta i Ndautu, tumbu-nanyaka na rimba nda palàda, tailu mbua ndau tudana ngalana patuna nu. Ka kamahingu-nanyaka panaungu i Ndautu welingu lai MIRI na rukuna nuna, nanapa-ya i MIRI, “Na rimbangu nuna ruku njalana i Haulu dàngu kuru umana, nadu ba mbàda pameti-dahaka da tau Nggimbiungu,” wàna.

²(Da tau Nggimbiungu nda tau Ihirailu-aha, nyuda hau kaliungu kuduha la banjaru Amori. Da tau Ihirailu da-paràndi dànjaka la pa-katindi-ha nyuda, ba tuna i Haulu mbàda patikingu-naka la pa-pambuta-ha nyuda, nadu ba pangàda-nanya na pahàmu wàna na tau Ihirailu dàngu Yahunda.) Ka paau-nanjaka da tau Nggimbiungu i Ndautu

³hi na-paàra-nja nyuda, “Nggàra-yaka bàdi na pawunda-nggu ndumami nyimi? Nyungga ku-mbuhangu pa-himbalu-ya na njala pawunda hanggangu lai nyimi, ka peku pa-kanyuru-minya na banjaru-na i MIRI,” wànanja.

⁴Dahema nyuda, “Na pawunjingu-ma nyuma dàngu i Haulu lupa kuru umana nda peku-ana ka panjàpu wànya àmahu mabara marara, ba tuna nyumai duma nda ma-mbuhangu-a pa-pameti jiapa ka haàtu-ana welingu la banjaru Ihirailu,” wàda. Napaya i Ndautu, “Jàka tuna nu, nggàraya na parinju-mi ka kuwunda-ya?” wànanja.

⁵Dahema nyuda, “I Haulu hanganji papindi-na i MIRI na-patikingu pa-pambuta-kama ka ma-munangu welingu la banjaru Ihirailu.

⁶Jia ba tuna, wua-nggama tau mapihu mini welingu la wàla wuana nyuna, ka ma-tiwalu-nja la hanggana i MIRI la Nggimbia, na paraingu wikina na Hanganji Haulu,” wàda. Nahema na hanganji, “Hàmu, napa ka kuwua-nggainja,” wàna.

⁷Na nyuna ba mbàda maràngga harangu-daka i Ndautu dàngu i Yunatàngu, i Ndautu nda napuli-anya i Mepimbohitu anana i Yunatàngu.

⁸Da papiti-na na hanganji jiaha i Àrumoni dàngu i Mepimbohitu, pa-kadua-da anana i Haulu-ha pa-paana-na i Ripahu anana i Aya; lupa da tau malima anana i Meràpu anana kawini i Haulu, da anakeda nuda dedida welingu ba dapalei pa-pahangu i Meràpu dàngu i Àndarialu anana i Mbaràhilai, tau Mahola.

⁹Nyuda pa-wuangu-ha la tau Nggimbiungu, ka meti pa-kariangu-danyaka ba tau mapihu-ha ba wàngu pa-tiwalu-nja la pinu tandula la hanggana i MIRI. Nuna na hukungu meti pa-palaku-ya la njàpuna na pa-kameli ruu ai, ba pakiringu pamuti kamànggihu.

¹⁰Hàla i Ripahu, kala wihina i Haulu, na-pa-wàlahungu nduma wikina hinggi karungu la pinu watu ngia pa-tanulahu-da da tau meti. I Ripahu nda na-haleli-ma duna welingu lai nu piti welingu la kawunga muti lupa napuru na urangu la pamunju ruu ai. Nda na-pahia-manja da metida pa-kumilu-ha ma-hawurungu la lodu jàka ndia mabohu la rudungu.

¹¹Ba ninguka mapanii-nya i Ndautu jàka nggàra ulana i Ripahu,

¹²lua-nanyaka papiti-ha da riida i Haulu dàngu i Yunatàngu welingu la tau mangia-nya na paraingu Yambihu la Nggiliatu. (Da tau nuda àmangu dapiti manganga-ha la ma-ndidaru paraingu Mbetu-Hàngu, na ngia pa-tiwalu-danja da metida paraï tau Pilitingu, ba datalu-yaka i Haulu la Tandula Nggilimbua.)

¹³Da riida i Haulu dàngu i Yunatàngu dangàndi-ha weli nàmungu, hàla hi da-pauhi papohu-nja da riida da tau mapihu da pa-tiwalungu.

¹⁴Tunaka nu da riida i Haulu dàngu i Yunatàngu dàngu da riida nuda da tau mapihu hi taninja la retina i Kihi amana i Haulu, la Njela ngaba Mbanyamingu. Ba hàla ndàbaka pa-paloku-ha hama tuna na pareta-na na hanganji, hema hàmu-nanjaka i MIRI na hamayangu-da ndumana nuna na paraingu.

¹⁵Hili tungu-nanyai na pabera la tau Pilitingu dàngu tau Ihirailu. Lua-danyaka i Ndautu dàngu tau la wawana pa-pakangaburungu dàngu tau Pilitingu. Nu la pa-kangaburungu manggilu-nanyaka i Ndautu.

¹⁶Ka tàka-nanyaka na haàtu na mahama milimungga-ya, i Yimbihu-Mbenupu-ya na tamuna. Na nimbuna wuduya, na mbotuna ràkangu tailu kilu hatenga-na. Nyuna na-halili-mbuya ba hapungu-na na hapanda bidi, màndungu-mananya la etina la pa-pameti-ya i Ndautu.

¹⁷Tàka i Ambihai anana i Haruya, mai-nanyaka patula-nya i Ndautu. Nyuna na-ràkapu-ya nuna na mahama milimungga-ya hi na-pameti-ya. Hàlaka nu da tau la wawana i Ndautu dakarai-ya ka na-paràndingu i Ndautu la panda hili kikungu la pa-kangaburu, “Tamu umbu, nyumu jiakau pamonu-na na Ihirailu, ka àmbu mahunggu-ya na nda ninggau nyumu Tamu umbu la pahiku la hongama,” wàdanya.

¹⁸Hili tumbu-nanyai na pa-kangaburungu ba dalawa-nya na tau Pilitingu la Nggòpu. Nu la dalu pa-kangaburu-da i Hipukai tau Huha, na-pameti-ya na haàtu na mahama milimungga-ya, Hapùya na tamuna.

¹⁹La hili hau pa-kangaburu lawanya na tau Pilitingu la Nggòpu, i Elihanàngu anana i Yairu[54] welingu la Mbetulehimu, na-pameti-ya i Nggoliatu welingu la Nggàta. Na ulu nimbuna i Nggoliatu hama polu kamba tinungu-ya.

²⁰Hàla hili pa-kangaburu-danyai ba dalawa-nja da tau Pilitingu la Nggàta. Lai nu ninya na haàtu na mahama milimungga-ya, na ma-mbuhangu pàkuna pa-pabera. Nyuna na-kanomungu wua limana la nimbihu limana, dàngu na-kanomungu wua wihina la nimbihu wihina.

²¹Nyuna na-jeriku-ha da tau Ihirailu, jia-duyaka hi na-pameti-ya paraïna i Yunatàngu anana i Himia ayana i Ndautu.

²²Nuda da mahama milimungga-ha ba tau mapatu-ha, da pa-pameti-na i Ndautu dàngu da tau la wawana, wàla wua tau mahama milimungga la Nggàtaha.