Read Kambera 2 HAMUILU 22 Bible Online

2 HAMUILU 22 - Kambera bible

2 HAMUILU 22

¹Ba nahàla-ka i MIRI pa-pamara-ya i Ndautu welingu lai Haulu dàngu la muhu - muhu-naka hawiangu, wunda-nanyaka i Ndautu na ludu yiana ndumana i MIRI:

²[Kumbuha-nggau Nyumu, ou MIRI, jiakau Nyumuma na kapàru-nggu.]

³I MIRI hama tindingu kapàru-ya ngia paini-nggu. Na Alanggu hama palindi watuya, ngia pa-pamaü-nggu. Hama tuna temingu-ya ba na-pandàda-ngga, dàngu namangga-ngga ka ku-mandangu mànu.

⁴Kuwara-nya i MIRI na paràka pa-wotungu, na-pahàla-ka Nyuna welingu la muhunggu.

⁵Na-winggiru-ngga hanggàmaru pameti wàngu dàngu na-lumburu-ngga iwa manjurangu.

⁶Na-winggiru-ngga manjurangu pameti wàngu, na oka kahili-na na meti ninya padua la hangganggu.

⁷La dalu handuka-nggu kuwara-nya i MIRI, ku-kaladaku la Alanggu pakarai pa-ndulangu. Welingu la Umana na patingi-nya na talia liinggu dàngu naeti wànya na waranggu.

⁸Hàla hi na-yoyangu dàngu na tandidu na tana, da lata palindi danggoda dàngu da-kandàndaku ruku hànggana i Ala!

⁹Na kutungu na-hamburatu welingu la kubu uruna, na epi dàngu na wàla epi na-tapanjiru welingu la ngaruna.

¹⁰Nabika-ya na awangu, hàla hi napuru Nyuna, wàngu karumangu kapàtangu la lumbu wihina.

¹¹Na-hawurungu Nyuna ba na-kaliti patau awangu; nahiri la pinu ruu kàpa ngilu.

¹²Nyuna na-palumburungu wikina wàngu kapàtangu; na karumangu kapàta mitingu na-winggiru-nya Nyuna.[55]

¹³Welingu la kajilaku kabilaku la hanggana, luhu-nanyaka na karumangu, na ura watu mboka dàngu na epi.

¹⁴Ka kangguruku-nanyaka i MIRI welingu la awangu, i Mahupu-jangga na parongungu-ya na talia liina.

¹⁵Na-pahàla-nja da panana, hi na-paiha nggangganja da muhu. Na pahàla hili weli - hili welinya na kabàla-na hi kiri palaida nyuda.

¹⁶Na lata tehiku na-hakubu, na lata pinu tana na-tabunggahu ba jiaya na kayàka-nanya na muhuna wàngu hànggana i MIRI.

¹⁷Weli ditangu i MIRI na-pajolangu limana; nayàpa-ka tàka hi nabinda-ka welingu la wai manjolungu.

¹⁸Na-pamara-ka welingu la muhu ma-kaborangu dàngu welingu la tau da-mapaumbi-ngga nadu ba darihi kapàru welingu lai nyungga.

¹⁹Nyuda da-ràkapu-ka ba nanggàna-ka manjurangu ba tuna i MIRI jiaya na mandula-ka.

²⁰Nyuna na-pahàla-ka welingu la hanggàmaru tàka hi na-pamara-ka ruku mbuha-nangga.

²¹I MIRI na-palimba-nya na pawunda-nggu na ma-padeningu; na-pakanyuru-ngga ba nda kunjala.

²²Nyungga ku-karadaku la pareta-na i MIRI, dàngu nda ku-pambelingu welingu la Alanggu.

²³Mbuu ndàbada da ukuna kueti wànja, da pareta-naka nda ningu palànja-nggu.

²⁴Nyuna napi-mangga ba nda ningu nyuranggu dàngu ba ku-pamaraungu wikinggu welingu la njala.

²⁵I MIRI na-palimba-nya na pawunda-nggu na ma-padeningu nadu ba napingga ba nda kunjala.

²⁶MIRI, la tau ma-tuturu Nyumu mu-tuturu-mai dumu dàngu muhàmu la tau[56] hàmu.

²⁷La tau ma-matua mu-palohangu wikimu ba umatua, tàka na tau na ma-akatu mupapa-nya.

²⁸Na tau karàda eti mu-pamara-ya; tàka na tau jangga eti mu-pawawa-ya.

²⁹Nyumu mu-paroka-ya na palita-nggu; na MIRI Alanggu na-paharii-ya na kapàtangu-nggu.

³⁰Nyumu mu-paàtalu-ka la pa-patàlaru-ya na muhu; wàngu pa-ndulangu-na na Alanggu ku-bàriku ngia pa-torungu muhu.

³¹Na pawunda-na i Ala na-lànyapu, ràka pawaiha da paràndi-naka! Nyuna hama tuna temingu-ya nduma mbuu ndàba tau na ma-handera lai Nyuna.

³²Nadu ba jiaya i MIRI-a na Ala; jiaya i Ala-a na ma-kahiri-ta nyuta.

³³Jiaya Nyunama na Ala na ma-paàtalu-ka nyungga dàngu na-pamambiru[57]-ya na àndanggu.

³⁴Na pa-kapànduku-ha da wihinggu hama tuna wihi ruha, dàngu namangga-nya na malundungu-nggu la ma-palindingu.

³⁵Nyuna na-pandàma-ngga la pa-pabera, hi peku pandàngi-nggu pàndi pana ma-màndungu halawàla.

³⁶MIRI, Nyumu muopa-ngga dàngu mu-pamara-ka, dàngu mutula-ngga wàngu mbihamu kurihi meha rukuna na pawunda-mu.

³⁷Mumangga-ngga ka àmbu ku-tanawangu dàngu hi ndedi ku-handàkangu-ma panjoru.

³⁸Kuyaulu-ha da muhunggu lupa kutalu-ha, nda hidama pa-kandulingu lundu da-tàlaru.

³⁹Ku-ndakilu-nja hi lupa nda da-hadangu beli, da-tanulahu la wihinggu hi nda da-pawidi.

⁴⁰Nyumu muwua-ngga kapàru la pa-pabera, dàngu la patalu-ha da muhunggu.

⁴¹Mu-pawiti-nya hi dapalai-ngga muhunggu; da tau ma-paumbi-ngga ku-patàlaru-ha.

⁴²Nyuda da-kaladaku, tàka nda ningu mandula-ha, dawara lai MIRI, tàka nda nahema-aha.

⁴³Ku-palàjaru-ha hi hama kumburu tana ma-tanyalangu, kuwari-ha hama kapihaku la ànda.

⁴⁴Mu-pahàla-ka welingu la banjaru ma-katadaku, hi mu-panjadi-ka ma-kuaha-ha da banjaru; na banjaru panda tandanggu làti, danjadi-haka atanggu.

⁴⁵Da tau hangàdangu danyàku lai nyungga, da-patundungu ba darongu-ya na pareta-nggu.

⁴⁶Na-mbulangu hàla na kaborangu-da; da-kandàndaku hi daluhu[58] welingu la tindingu-da.

⁴⁷I MIRI naluri! Pawotungu-ya na ma-kahiri-ka! Pa-mangunju-yawa na bokulu-na i Ala na ma-pamara-ka!

⁴⁸Nawua-ngga patalu wàngu hanggangu la muhunggu, dàngu na-panyàku-ha da banjaru la hangganggu,

⁴⁹na pamara-ka welingu la papa-ngguka. MIRI, muwua-ngga patalu wàngu hanggangu la muhunggu, muopa-ngga welingu la tau mambana eti.

⁵⁰Jiaya hi ku-pamangunju-kau la hongada da banjaru, dàngu ku-ludungu lodu wotungu lai Nyumu.

⁵¹I Ala nawua-nya talu manda najaru na hanganji pawotu-na, na-padaingu na mbuha-nanya na tau papindi-na, nu i Ndautu dàngu wàla wuana lundu nu - nu.