Read Kambera 2 HAMUILU 23 Bible Online

2 HAMUILU 23 - Kambera bible

2 HAMUILU 23

¹I Ndautu anana i Ihai napindi-ya la pa-hanganji dàngu na-bohuru pa-bokulu-ya paraïna na Alana i Yakupu. Nyunamai na ma-pandoi-ha da ludu hangia - hangia ndumana na Ihirailu. Yiada-haka da hupu liina i Ndautu da ma-malamiri dehi:

²Na Ngahuna i Miri mbàda panii-naka la ngarunggu nyungga; na lii langu dàngu na lii panaungu-na la tàda ngaru-nggunya.

³Na Alana i Yakupu mbàda panii-naka; na ma-katindi-ya na Ihirailu napanii-ngga nyungga, “Na hanganji na ma-pareta rayatu wàngu mamola na ma-pakapipi wàngu karadaku-na lai MIRI,

⁴Nyuna hama tuna harii pabarahu ma-tambàkahu-ya la harii mbaru ba na-habola na awangu. Nyuna hama tuna taraku lodu la malàna urangu na ma-pamuru-ya na rumba hi na-kalilangu,” wàna.

⁵Tuna numbu ba na-pakanyuru-ha da wàla wuanggu i Ala, na paràndi-na lai nyungga nda na-panjilu-nya, na ràndina na-padaingu dàngu na-lundungu, na-lànyapu la mbulu ndàba-naka. I Ala jiaya na matanggu-nya na talunggu dàngu na-patutu hàlanya na pawuku etinggu.

⁶Tàka da tau manda karadaku lai MIRI hama tuna rii madàka pa-kawukangu-ha. Na lima tau nda na-torungu-a pa-yopulu-ha;

⁷nda ningu haàtu mabihu pa-jonggaru-ha jàka nda pawànja ai jàka ndia bàhikai. Da tau nuda dambuta na-pakehi-ha epi.[59]

⁸Yiada-haka ba hapajia-ha da parawira-na i Ndautu da mawuwa tamuda: Na ma-wungangu jiaya i Ihumbaalu, tau Hàkumoni, liku uru “Parawira Pa-katailungu”.[60] Handàka la hau pa-kangaburungu nalawa-nja da tau walu ngahu, na-pameti hàla-maha ba nawàngu nimbuna.[61]

⁹Na padua wàda la Parawira Pa-katailungu jiaya i Eliahàru anana i Ndondu, welingu la biliku Ahohi. Nyuna natundu-nya i Ndautu ba da-hanobaku-ha da tau Pilitingu da mambàda pauhi la pa-pabera. Tàka ba jia-yaka na-kandulingu-na na pamba Ihirailu,

¹⁰i Eliahàru pa-ngalangu-mananya pa-patara hi lupa na-pameti mbutaha da tau Pilitingu, hi lupa nanjili ailulu. Na limana nawàngu pa-halata, hi lupa nda peku pahàla-nanya na hapanda-na. La lodu nuna i MIRI nawua-nja talu manda najaru da tau Ihirailu. Da pamba Ihirailu da ma-kandulingu kawai beli-danyaka la pangia-na i Eliahàru pa-kangaburu, hi da-pahili-ha da kalembi pabera welingu la mameti-ka lai nu.

¹¹Na patailu wàda la Parawira Pa-katailungu jiaya i Hama anana i Anggi, welingu la Harari. Ba na-pauhi na tau Pilitingu la Lehi, la hau woka na mambinu wàngu kambii rara, da pamba Ihirailu dapalai welingu la tau Pilitingu.

¹²Tàka i Hama daingu patara-mana, hi na pameti-ha dàngu hi natalu-ha da tau Pilitingu, hi lupa na-ngalangu pa-pamàndu-nya nuna na woka. Tuna nu i MIRI ba nawua-nja talu manda najaru.

¹³La hilu hau lodu ba mareni rehi muti-yaka,[62] da tau matailu welingu la tailu kambulu parawira-na i Ndautu dapuru la liangu Andulàmu. La rehi nu ninya Ndautu la tindingu la liangu nuna. Da tau Pilitingu pa-maüngu-danya la Lolangu Repayimu, tàka na hapamba welingu lai nyuda hanggau-danyaka la Mbetulehimu.

¹⁵I Ndautu nanamu-ya na kawindu na talora-na, hi napanii, “Hai-a-ai, ka ningu-aka làti mawua-ngga wai welingu la humuru la lihi pindu bokulu la Mbetulehimu!” wàna.

¹⁶Ba darongu-yaka nuna da parawira ka-tailungu da-turuku-ma-a la ma-pauma terangu tau Pilitingu, hi dataku wai welingu la humuru nuna, hàla hi dangàndi-nya i Ndautu. Tàka i Ndautu nda nabihu paunu-nya, na-paliri-maanya la pa-maraku wànya i MIRI.

¹⁷Napanii, “Ou MIRI, nda peku-ana ba kuunu-nya na wai yiana, ba beri unu-nggunya na wai riada da tau da ma-pajàmangu lurida!” wàna. Jia-duyaka i Ndautu hi nda ana bihu-mana paunu-nya nuna na wai. Nuna-duyaka na hàmuda da Parawira Ka-tailungu da ma-kanjupu taraha.

¹⁸Da tau tailu kambulu parawira da mawuwa tamuda, “Parawira Pa-katailu kambulungu,”[63] wàda-mbunja. Nyuda nu na maliku urunja jiaya i Ambihai erina i Yuàpu, anana i Haruya. Handàka na-pameti tau tailu ngahu wàngu nimbuna. Jia-duyaka hi nawuwa. Tàka na nyuna nda natoma-aha da “Parawira Pa-katailungu.”

²⁰Na hili haàtu parawira na mawuwa, jiaya i Mbanaya anana i Yuyanda, tau Kàpuheyilu. Kanjupu taraya. Tau madua-ha da mini mbeni hanggangu welingu la Muapu da pa-pameti-na. Handàka la hau lodu ba napuru na ura kamba natama nyuna la makubu, hi na-pameti-ya na heu na hinga lai nu.

²¹Hili handàka na-pameti-ya na haàtu na tau Mehiru, na bai mini bokulu jangga na mambeni wàngu nimbu. I Mbanaya na-hàngapu wànya hapungu-a tokungu. Na nimbu na maninya la limana nuna na tau Mehiru nawàhi-maaya hi na-pameti wànya na tau nuna.

²²Nuna-duyaka na ruku tara mbenina na pawàna i Mbanaya, na haàtu welingu la “Parawira Pa-katailu kambulungu.”[64]

²³La pamba nuna, nyuna-maka i Mbanaya na mangia ngaba, ba tuna ndedi nahama-anja da “Parawira Pa-katailungu.” I Ndautu nawotu-ya nyuna kapala tau mamangga-nya na wikina.

²⁴Da anggota-da hawiangu welingu la “Tailu kambulu parawira” jia-duhaka: i Ahaïlu, erina i Yuàpu i Elihanàngu, anana i Ndondu welingu la Mbetulehimu i Hama dàngu i Elika, tau Harutu i Helihu, tau Paluti i Ira, anana i Ikihu tau Takua i Ambiyehiru tau Anatutu i Membunai tau Huha i Hàlamongu tau Ahohi i Maharai tau Netopa i Helipu, anana i Mbaana tau Netopa i Itaï anana i Rimbai tau Nggimbia la ngaba kabihu Mbanyamingu i Mbanaya tau Piratungu i Hindai, welingu la lolangu Nggaahu i Ambialumbongu tau Aramba i Àhamawitu, tau Mbahurimu i Eliyàmbàhu tau Halambungu Da anana i Yahingu i Yunatàngu i Hama tau Harari i Ahiamu anana i Haràru, tau Harari i Elipahelitu anana i Ahambai tau Maaka i Eliamu anana i Ahitopilu tau Nggilu I Hehirai tau Kàramilu i Païrai tau Àrumbi i Yinggàlu anana i Natàngu, welingu la Homba i Mbani tau Nggàta (...)