Read Kambera 2 HAMUILU 3 Bible Online

2 HAMUILU 3 - Kambera bible

2 HAMUILU 3

¹Na pa-kangaburungu-da da mandula-ya na kuru umana i Haulu dàngu da mandula-ya na kuru umana i Ndautu, pangalangu-mananya. La ngabana i Ndautu ngeri kapingatu-mana-nyaka, tàka la papana ngeri malijangu-nanyaka.

²Da anana i Ndautu da madedi la Hemburungu, jiaha yiada da ma-pandàkingu dedida: I Àmunungu. Na inana jiaya i Ahinuamu welingu la Yihireyilu.

³I Kiliapu. Na inana jiaya i Ambinggaïlu, na papaha pameti wàruna i Nambàlu la Kàramilu. I Àpuhalomu. Na inana jiaya i Maaka, na ana hanganji Tàlumai la Nggehuru.

⁴I Andunia. Na inana jiaya i Hanggitu. I Hapaha. Na inana jiaya i Ambitàlu.

⁵I Yituramu. Na inana jiaya i Enggula. Nu pa-kanomu-da da mini madedi la Hemburungu-ha.

⁶Ba talànga pangalangu-na na pabera-da da mandula-ya i Ndautu dàngu da mandula-ya na kuru umana i Haulu, i Àpuneru na-pamukarungu ka peku parukangu-na nyuna pa-pangaru la honga ba hapajia-ha da mandula-ya i Haulu.

⁷La hau na lodu i Ihimbohitu, anana i Haulu, napulu-nya i Àpuneru ba na-katuda angunya na kalawihi-na i Haulu, nu i Ripàhu anana i Aya.

⁸Ka mbeni nda ukuya i Àpuneru hi napanii, “Bau pangàda-ngga nyungga yia Tamu umbu kaleka-nggunyaka i Haulu hi ku-hapeparu la Yahunda? Welingu la wunga-manaka duku ba ku-tuturu lai Haulu, amamu, dàngu hapa-kalembi-na lupa la angu-naka. Nyungga kundula-ya na amamu hi lupa nda natalu-ya paraïna i Ndautu. Jiapa ba tuana nyumu pa-makia bia-mungga ruku tau kawini pàkua!

⁹Rihingu hàmu ka ku-karaha-ya i Ndautu, tàka hi mbàda ràndi-mananyai lai nyuna paraïna i MIRI la papiti-ya na pa-hanganji welingu lai Haulu dàngu welingu la wàla wuana, hàlaka nu hi wotuya Ndautu la pa-hanganji-nya na Ihirailu nggubulu-na dàngu na Yahunda. Màla àruki i Ala ka na-pameti-ka jàka nda ku-pahàra-nya na paràndi-na i Ala lai Ndautu!” wàna.

¹¹I Ihimbohitu nda ana hauma pahema wàna, nadu ba na-mangàdatu-nya i Àpuneru.

¹²Ka palewa-nanyaka tau i Àpuneru mangàndi lii lai Ndautu, na maninya la Hemburungu[4] la rehi nu, “Nggamuya napa na ma-kuaha-ya yiana na tana? Màlawa ka na-paràndi dàngga nyungga, napa nyungga ku-karaha-kau Tamu umbu hi na-hapeparu hàla na Ihirailu nggubulu-na lai nyumu!” wàna.

¹³Nahema i Ndautu, “Hàmu! Patàka-nya na lii yiana lai Àpuneru, nyungga ku-orangu pa-paràndi dà-nggau nyumu, tàka hauna na pa-karuhi: I Mikàlu, anana i Haulu mu-karia-nya bàdi jàka mu-hurungu lai nyungga,” wànanya.

¹⁴Hàlaka nu i Ndautu na-palewa-mbunya tau i Ihimbohitu, mangàndi lii, “Màla upabeli-ngganya bàdi i Mikàlu, papaha-nggu, lai nyungga. Nyuna mbàda wua-nggunyaka wilina hangahu manula kàrina na tau Pilitingu, wàmunya,” wàna.

¹⁵Ka palewa-nanyaka tau i Ihimbohitu palua papiti-ya i Mikàlu welingu la leina, nu i Pàlatialu anana i Lai.

¹⁶Tàka i Pàlatialu natundu pangala-manya i Mikàlu dàngu hiina. Ba datàka-ka la paraingu Mbahurimu, i Àpuneru napanii-nya nyuna, “Jiaka-wa nu, beli biawa!” wànanya. Ka beli-nanyaka i Pàlatialu.

¹⁷Hàlaka nu i Àpuneru hi nabata dànja ba hapajia-ha da mapangora Ihirailu ba napanii, “Mbàda mandai-manaka bai wukuya ka hanganji-minya i Ndautu.

¹⁸Na, nàhu jia-yaka na rehi manggawangu ndumami nyimi. Ipangàda-nya, i MIRI mbàda ràndi-mana-nyaka i Ndautu, ba nyunaka i Ndautu na maràka ma-pamara-ya na banjaru Ihirailu welingu la tau Pilitingu dàngu welingu la mbuu ndàbana na muhu-naka hawiangu,” wàna.

¹⁹I Àpuneru nabata dà-mbunja da tau Mbanyamingu, tunaka nu laku-nanyaka la Hemburungu la pa-paihi-nya i Ndautu jàka nggàraya na pambàda pajia-na na tau Mbanyamingu dàngu na tau Ihirailu.

²⁰Ba jia-yaka na hurungu-na lai Ndautu la Hemburungu i Àpuneru dàngu da tau la wawana da tau dua kambulu, i Ndautu na-paloku-nja remi ndumada nyuda.

²¹Hàla pa-belingu-nanyaka langu i Àpuneru, “Puli-nggawa ka kubeli pakoda-nya mbuu ndàbana na Ihirailu ka peku pa-mbulungu hàlana lai nyumu. Nyuda danggepi-makau duda napa ba hanganji-danggau nyumu, ba tunaka nu napa pareta hàla-dumu-nyaka na tana nggubulu-na, hama tuna na pawuku-mu,” wànanya. Ka pahia-nanyaka palaku i Àpuneru paraïna i Ndautu dàngu narima haha-manya nalaku hàmuna.

²²Ba nabeli-ka duna i Àpuneru, i Yuàpu dàngu hawiangu da tau la wawana i Ndautu, beli-danyaka welingu la pa-kangaburungu dàngu ba dangàndi padangu malanja parambangu.

²³Ningu mapanii-nya i Yuàpu, ba na-hurungu-ka i Àpuneru lai Hanganji Ndautu dàngu ba napuli-nyaka pabeli dàngu hàmungu.

²⁴Ka hurungu-nanyaka i Yuàpu la hanganji hi napanii dànya, “Nggàra ula-muka nu Tamu umbu? I Àpuneru namaika lai nyumu ba wàda. Ka ni hi mupuli bianya pabeli tuna nu?

²⁵Bau pi-madunya wàngguka ba namai tuna nu i Àpuneru kahili-nanggau duna, ka kupi wànya na hurina dàngu jàka nggàra u-ulana hi wànanggau duna” wàna.

²⁶Ba nabeli-ka welingu la hanggana i Ndautu, i Yuàpu na-palewa tau papaau belinya i Àpuneru. Dandutu-ya lupa tàka la lihi humuru Hira, hàla hi da-karia belinya. Nuna mbuu ndàbana ba tuda nu nda napi-anya duna paraïna i Ndautu.

²⁷Manyamalu ba natàka-ka i Àpuneru la Hemburungu, wànda-nanyaka paraïna i Yuàpu la halinggi, la lihi ngaru pindu, beri hama tuna ningu pa-kàpingu papanii-nanya. Ka hunju-nanyaka na kambuna i Àpuneru hi lupa nameti. Tuna nuduka nu i Àpuneru ba na-pameti-ya paraïna i Yuàpu ba natunya hiluna na metina i Ahailu, erina.

²⁸Ba narongu-ka i Ndautu na rukuna nuna, panii-nanyaka, “I MIRI napi-mangga dàngu na rayatu-nggu ba nda mawàngu panjala ndokuma duma ba pameti-ya i Àpuneru.

²⁹Màtaka duna i Yuàpu dàngu kuru umana ka na-hambeta-ya na hukungu rukuna nuna na pawunda-na. Màtawa la kuru umana i Yuàpu dàngu wàla wuana ka ningu mànu tau ma-hambeta hidu manula pa-mayitangu, jàka ndia mini ma-kahala bai, jàka ndia mameti la pa-kangaburungu, jàka ndia manda toma pangana!” wàna.

³⁰Tuda nu i Yuàpu dàngu i Ambihai, erina, ba da datungu hilu paumbingu-da lai Àpuneru, kiringu nyuna ba na-pameti-ya i Ahailu, erida, ba jiaya na pa-kangaburungu la Nggimbiungu.

³¹Tunaka nu i Ndautu hi nawua-nja pareta i Yuàpu dàngu da tau la wawana ka da-bàriku-ha da pakida, dàngu ka dapaki pa-hawina wàngu, hàla ka dahiinya i Àpuneru. Nu la lii taningu, i Hanganji Ndautu wikima na mandàki-ya na pàti meti.

³²I Àpuneru datani-nya la Hemburungu, tàka na hanganji dàngu mbuu ndàbana na rayatu da-kamaliku hàla ba dahii la hangga reti.

³³Hàlaka nu i Ndautu hi na-paduduru-nya i Àpuneru,

³⁴“Tuna nu maka bàdi i Àpuneru ba na-pameti tau ma-ndubangu: dàngu nda pahondu-ha da limana, dàngu nda patangga-ha da wihina? Na metina nyuna meti pahunju-ya paraï ruku tau akatu tau mbana eti,” wàna. Hàla mbulu ndàbana na rayatu da-bonjangu pa-kaladaku ba dahiinya i Yuàpu.

³⁵Nakahau lodungu na rayatu ba na-kamangu pa-pamanda-nya i Ndautu ka nangangu hawutu, tàka na-harangu-maa, “Mili àru i Ala ka na-pameti-ka, jàka jia ngangu bianggu dàngu ndedi tamana na lodu!” wàna.

³⁶Narongu-yaka na rukuna nuna na-hadànjalu wànya na etina na rayatu. Tuna numa, nggàra bia paula-na i Hanganji Ndautu, na-nggaüru wànya na etina na rayatu.

³⁷La lodu nuna mbulu ndàbana na rayatu-na i Ndautu dàngu nggubulu-na na banjaru Ihirailu pi-danyaka, ba nda pambuha-na na hanganji-ya ba pameti-ya i Àpuneru.

³⁸Na hanganji napanii dànja ba hapajia-ha da ma-karia-nya: “Mipinya nyimi wàngguka, la lodu nàhu ba yàmihu-nanyaka na haàtu na liku uru bokulu la Ihirailu?

³⁹Jiapa ka hanganji papindi-na i Alaka nyungga, kupàda-nya na lamanga-nggu la rehi nàhu. Da anana i Haruya lalu mbana etiha. Nda ku-ngalangu-ma papaulu-ha nyuda. Mili àru i MIRI ka nahuku-nja da tau akatu tungu nu, pa-jàngapu-nya na paraï paruku-da!” wàna.