Read Kambera 2 HAMUILU 5 Bible Online

2 HAMUILU 5 - Kambera bible

2 HAMUILU 5

¹Hàlaka patuna nu tàka-danyaka da liku uru la kabihu - kabihu Ihirailu lai Ndautu la Hemburungu, hi dapanii dànya, “Nyuma yia nua wai ria-manda Tamu umbu.

²Piti weli àmangu, jiapa ba nyuna-mapa i Haulu na ma-pareta-kama, ba nyu - nyumu-madu Tamu umbu mairu ngàndiya na tanatara Ihirailu la pabera - pabera-ka; hinggilu-na nu i MIRI mbàda ràndi-mana-nggauka ba nyumuka liku-uruna na banjaru-na dàngu na hanganji-da,” wàdanya.

³I Ndautu na-paràndi dànja nuda da liku uru Ihirailu, hàla hi dawotu-ya nyuna la pa-hanganji la Ihirailu.

⁴I Ndautu tailu kambulu ndau-naka na lurina ba na-hanganji, tàka hi na-pareta patu kambulu ndaungu mandaina.

⁵La Hemburungu na-pareta-ya na Yahunda pihu mbua ndau ha-kawita-na, dàngu la Yeruhali nyuna na-pareta hàlaya na Ihirailu nggubulu-na dàngu na Yahunda, tailu kambulu tailu mbua ndaungu mandaina.

⁶La hau na lodu i Hanganji Ndautu dàngu tau la wawana hadangu-danyaka palua pa-kangaburu-ya la Yeruhali. Na tau Yembuhu, na mangia-nya nuna na paraingu, ba dakira-ya i Ndautu nda na-ngalangu-a patalu-ya na Yeruhali. Jia-duyaka nu hi dapanii-nya, “Ndau duluku-a nyumu patama lai yiahu; da tau poki dàngu da tau kaliparu damàka-mbu pawàngga-kau nyumu,” wàdanya.

⁷I Ndautu na-paàra-nja da tau la wawana, “Ningu nàhu lai nyimi yiahu ma-paumbi-nya na tau Yembuhu hama tuna nyungga ba ku-paumbi-nja? Mi-paumbi langatàka-dunja la pa-pameti-ha nyuda? Jàka tuna nu, tama liwa la holana na wai kai kangaburu-ha da tau kanjiku dàngu da tau poki da pa-paumbi-nggu,” hi wànanja. (Jia-duyaka na tau hi nalara li wàngu, “Na tau poki dàngu na tau kaliparu nda uku patama la Umana i Miri,” hi wàna.)[6] I Ndautu na-ngalangu-ma pawàhi-ya na tindingu Hiungu hi na-mandapu-nya. Natunya tamuna, “Paraingu-na i Ndautu” wànanya. Nuna na paraingu na-pahada winggiru-nya nuna na tindingu, pakiri welinya la pahunga loduna na tandula na-pawotu pa-janggangu tana.

¹⁰I Ndautu paruka - rukangu-nanyaka pa-kapingatu, nadu i MIRI Ala na Mahupu-mbiha ba ndula-nanya-padua.

¹¹I Hanganji Hiràmu welingu la tana Tiruhu na-palewa-ha da ndutana lai Ndautu; i Hiràmu na-pamàtu-nya i Ndautu ai kajiu Limbanongu, tukangu - tukangu ai dàngu tukangu - tukangu watu, la pa-pahada-nya na uma hanganji-na i Ndautu.

¹²Rukuna nuna napi hàmunya paraïna i Ndautu ba pamàndu-nanyaka nyuna la pa-hanganji la Ihirailu paraïna i MIRI, dàngu na-pakapingatu-ya na pa-hanganji-na nduma pahàmu wàna na banjaru-na.

¹³Ba na-lelingu-ka la Yeruhali i Ndautu welingu la Hemburungu, hili piti-nanyapa ba mapira-ha da papaha-na dàngu da kala-wihina; ka pa-bonjangu-danyaka da anana mini kawini.

¹⁴Da anana mini da madedi la Yeruhali, jiaha: i Hamua, i Hombàpu, i Natàngu, i Halomu,

¹⁵i Yipuhàru, i Elihua, i Nepiku, i Yapia,

¹⁶i Elihama, i Eliyanda dàngu i Elipahelitu.

¹⁷Ba narongu-ka na tau Pilitingu, ba nyunaka i Ndautu na hanganji Ihirailu, mai-danyaka ka yàpaya ba wàda. Tàka i Ndautu narongu-maya na rukuna nuna, ka laku-nanyaka la tindingu.

¹⁸Da tau Pilitingu datàka la Lolangu Repayimu tàka hi da-mandapu-nya.

¹⁹I Ndautu na-paàra-nya i MIRI, “Ku-kangaburu-mayaka bàdi na tau Pilitingu? Màla nu MIRI muwua-dungga nu patalu wàngu?” wàna. “Kangaburu-ya!” hi wàna i MIRI. “Napa kuwua-manggau nyumu patalu wàngu!” wànanya.

²⁰Tunaka nu laku-nanyaka i Ndautu la Mbaàlu-Parahimu, lai nu hi na-pakàku-ya na pamba tanatara Pilitingu. Hi napanii, “I MIRI na-tumburu-yaka na ngia pa-padàdungu-na na muhunggu, hama tuna na iwa ba ndedi mbàdiku-na handàka lapi hàla-ma-ananya,” wàna. Jia-duyaka na pa-ngiangu nuna la Mbaàlu-Parahimu,[7] wàdanya.

²¹Da pamba tanatara Pilitingu dapalai dàngu nda peku ngàndi-danja da kahala hada marapu-da. Da kahala hada nuda dapiti-ha paraïda i Ndautu dàngu tau la wawana.

²²Ndedi nggi tuna mandaina hili mai-danyaka da tau Pilitingu pa-mandapu belinya la Lolangu Repayimu.

²³I Ndautu hilu paàrangu-nanyai handàkangu panaungu-na i MIRI. Nahema i MIRI, “Àmbu kangaburu-duha welingu yiahu, tàka màta kau laku pa-winggirungu kau mangu pa-kangaburu pali kajia-nja, la lihida da pingi ai murumbai.

²⁴Jàka era rongumu lingu kandukungu wihi tau ma-pajurungu la kapuka-da da ai indàharungu-wa, nadu ba nàhu-nggaka Nyungga la hanggami la patalu-ya na tanatara Pilitingu,” wàna.

²⁵I Ndautu nalaku-manya jàka nggàraya na lii pareta-na i MIRI, ka ngalangu-nanyaka pa-nàhaku pa-kanduli-nya na tau Pilitingu welingu la Nggemba tàka la Nggehiru.