Read Kambera 2 HAMUILU 6 Bible Online

2 HAMUILU 6 - Kambera bible

2 HAMUILU 6

¹Tunaka nu i Ndautu hili paau-nanjaka da panjuri marihi hàmu la pa-pauhi, nggubulu-da tau 30.000-ha.

²Nyuna nairu-ngàndiha pa-hanggangu la Mbaali[8]-Yahunda, la papiti-ya welingu lai nu na Pàti Pa-ràndingu na patiki wànya tamuna i MIRI Mahupu-mbiha na ma-mandapu la pinuda da patau awangu.[9]

³Na Pàti Pa-ràndingu nuna dadanda-nya welingu la umana i Ambinandapu la pinu tunduna dàngu hi dawotu-ya la kareta bidi. Hàla i Uha dàngu i Ahiu, da anana i Ambinandapu, hi dandàki-ya nuna na kareta; i Uha nalaku la karaha-na,

⁴tàka i Ahiu nalaku la hanggana.

⁵I Ndautu dàngu mbuu ndàbana na banjaru Ihirailu da-mangilu-nya na Pàti ba dàngu laku renjada dàngu laku lududa, lundu diraha[10] ba da-pawàndingu ba datembi-ya i MIRI. Nyuda daremi wàngu jungga, jungga lamba, lamba hakapapa, anamongu, dàngu kahàba.

⁶Ba datàka-ka la ngia pa-parina uhu nggàndumu, manguna i Nàkuhungu, da hapi da mayila-ya na kareta da-tunjuru, i Uha na-pajolangu limana la payàpa-ya nuna na Pàti Pa-ràndingu ka àmbu na-kanabu.

⁷La rehi nunama ba nahàngga i MIRI lai Uha, rukuna na pawunda-na ba pawawa-nanya[11] i MIRI. I Uha na-pameti memaya lai nu, la lihi Pàti Pa-ràndingu.

⁸Piti welingu la rehi nuna na pa-ngiangu nuna la Perihu-Uha.[12] wàdanya. Na-hoputu wànya i Ndautu ba nahuku pambotu tunanya nu i Uha paraïna i MIRI.

⁹Ba tuna na-mangàdatu-mai duna i Ndautu lai MIRI, hi napanii, “Nggikina wànggu-aka bàdi nàhu ba kungàndi-ya na Pàti Pa-ràndingu?” wàna.

¹⁰Jia-duyaka hi nabota-ya la panda ngàndiya kàdi nuna na Pàti Pa-ràndingu la Yeruhali, tàka hi na-bànjalu-ya la umana i Ombitu-Endumu, tau Nggàta.

¹¹Nuna na Pàti Pa-ràndingu tailu mbua wulana ba ninya lai nu, tàka i MIRI na-pakanyuru-ya i Ombitu-Endungu dàngu kuru umana.

¹²I Ndautu narongu-ya ba na-pakanyuru-ya i Ombitu-Endumu dàngu kuru umana paraïna i MIRI, hamanai da mangu-naka rukuna na Pàti Pa-ràndingu. Ka lua-nanyaka la umana i Ombitu-Endumu papiti-ya na Pàti, ka paleli-nya la Yeruhali ba nawàngu pambabu pa-bokulungu da tau da madanda-nya na Pàti Pa-ràndingu.

¹³Jàka da-panomungu-ka papangga da tau madanda-nya na Pàti Pa-ràndingu, paràha-nanjaka pa-pànjangu paraïna i Ndautu hi nawotu kameti maraku lai MIRI heu hapi mini rombangu dàngu heu kamboka hapi pa-radangu.

¹⁴Tunaka nu renja-nanyaka i Ndautu ba natika pa-hawola ka tembi wànya i MIRI. La rehina nuna nyuna na-kalambungu laü lipa linangu kababa ba naboru-nya la bànggina.

¹⁵Tuna nuduka i Ndautu dàngu mbulu ndàbana na tau Ihirailu ba da-paleli-nya na Pàti Pa-ràndingu la Yeruhali, nàhu ba dalaku kayaka kakàlaku-nya pa-kariangu lingu taropitu.

¹⁶Ba talànga tama ngàndi-danyaka na Pàti la paraingu, i Mikàlu, anana i Haulu, ngadu-nanya welingu la katonga, hi naita-ya i Hanganji Ndautu ba na-kapunduhu dàngu ba narenja la patembi-ya i MIRI, i Mikàlu na-paaka-nya la etina ba naita-ya i Ndautu ba tuna nu.

¹⁷Na Pàti Pa-ràndingu patama ngàndiya dàngu hi bànjalu-ya daa la padua maü tera na pambàda wuluna i Ndautu tungguna nuna na Pàti. Tunaka nu i Ndautu wotu-nanyaka kameti maraku patunu i MIRI dàngu kameti maraku pa-papeku wàngu.

¹⁸Hàlaka hi na-pakanyuru-ya na rayatu Ihirailu ba nawànya na tamuna i MIRI Mahupu-mbiha.

¹⁹Tàka hi napabe - berinja pangangu nyuda mbuu ndàbada. Nimbihu-na na tau na maninya lai nu ka miniya ka kawini-yakai nawua-nya ha kadipu tolu pa-handarangu,[13] roti dàngu kanguta patungu wua malangga. Hàlaka nu beli hàla-nanyaka la umana haàtu - haàtu.

²⁰Ba nabeli-ka i Ndautu la uma hanganji la pa-kamàhaku-nya na kuru umana, i Mikàlu naluhu tomaya i Ndautu hi napanii, “La lodu nàhu na hanganji Ihirailu langatàka nawunda-ya na patembi wànya na wikina! Ba na-kalulu hama tuna na tau maànga manda pinya na pa-makia wàngu la hangga atada kawini da panggawi la uma hanganji!” wàna.

²¹Nahema i Ndautu, “Nyungga duku ba kurenja tembi-nggunya i MIRI na mambàda jukaru-nya na amamu dàngu kuru umana, hàla hi napindi-ka nyungga la pa-kapipi-ya na Ihirailu, na banjaru-na. Jia-duya nyungga duku renja pangalangu-nggunyaka la patembi-ya i MIRI.

²²Nyungga duku màla bia ka paaka-ngga, jiapa ka narihi-kai welingu kawai. Màla bia kau[14] pa-kalana-ka, tàka da ata kawini ba wàmu kawai, nyuda duda napa da matembi-ka nyungga!” wànanya.

²³I Mikàlu, anana i Haulu nda na-ngalangu ana lundu metina.