Read Kambera 2 HAMUILU 9 Bible Online

2 HAMUILU 9 - Kambera bible

2 HAMUILU 9

¹La hau na lodu i Ndautu na-paàrangu, “Ningupa ihu tau maluri la kuru umana i Haulu ai? Jàka ningu, ku-mbuhangu patunya mahàmu lumuna i Yunatàngu,” wàna.

²La kuru umana i Haulu ninya na haàtu na tau la kaheli, na tamuna Himbaya, hi da-paràha-nya palua lai Ndautu. Hi na-paàrangu na hanganji, “Jia-kauka nyumu i Himba?” wànanya. “Deningu-na, Tamu umbu,” hi wàna.

³Tunaka nu na hanganji hi na-paàra-nya, “Ningupa nu tau maluri la kuru umana i Haulu? Nyungga ku-mbuhangu patunya pahàmu wàngu hama tuna na pambàda ràndinggu lai Ala,” wàna. Nahema i Himba, “Ninyapa na anana i Yunatàngu, haàtu-na. Nyuna na-kanjiku,” wàna.

⁴“Nggiya nyuna?” hi wàna na hanganji. “La Londimbàru, la umana i Makiru anana i Amialu,” hi wàna i Himba.

⁵Ka paràhangu-nanyaka na hanganji papaau-nya na anana i Yunatàngu.

⁶Nuna na anana i Yunatàngu Mepimbohitu-ya na tamuna. Ba natàka-ka, hi na-patika patembi-ya i Ndautu. I Ndautu napanii dànya, “Mepimbohitu,” wànanya, nahema, “Ou Tamu umbu,” wàna.

⁷Napanii i Ndautu, “Àmbu mangàdatu. Nyumu napa ku-milanggau eti lumuna i Yunatàngu, amamu. Mbuu ndàbada da tanana na bokumu i Haulu, kuwua beli-nggauha napa, dàngu kau padai pangalangu pangangu la uma hanganji,” wànanya.

⁸I Mepimbohitu nahilu patika hi napanii, “Nggàra-aka duku manda palingu! Nggikina hi tu-inaka na hàmumu lai nyungga?” wàna.

⁹Tàka na hanganji hi na-paaunya i Himba na tau la kaheli-na i Haulu, hi napanii-nya, “Mbuu ndàbada da pa-bànjalu-na i Haulu dàngu kuru umana, wua-ngguhaka la umbuku-na na Tamu umbumu yiana.

¹⁰Nyumu dàngu na anamu hamanai da ma-pambapa dànggau màta kai ràmaya nuna na tana ndumana na kuru umana na Tamu umbumu i Haulu dàngu na ihina nuna na tana kau wuanja ka na-patoma wàngu na lurida. Na nyuna i Mepimbohitu màta-nyaka ka nangangu mànu la uma hanganji,” wànanya. (I Himba ningu tau hakambulu malima-ha da anana mini dàngu hi tau dua kambulu-ha da tau la kaheli.)

¹¹Nahema i Himba la hanganji,[23] “Mbuu ndàbana na pareta-mu Tamu umbu napa ku-paloku hàla-maya duku,” wàna. Jia-duya i Mepimbohitu hi nangangu la uma hanganji, hama tuna da ana wikina na Hanganji Ndautu.

¹²I Mepimbohitu ninya na anana, Mikaya na tamuna. Mbuu ndàbada da angu kuru umana i Himba tau la kaheli-na i Mepimbohitu-ha.

¹³Tuna nuduka i Mepimbohitu na maruha ndàba wihina ba dua mbunguda ba na-engangu la Yeruhali dàngu ba nangangu mànu la uma hanganji.