Read Kambera 1 HANGANJI 1 Bible Online

1 HANGANJI 1 - Kambera bible

1 HANGANJI 1

¹Nàhu kaweda halawàla-mana-nyaka i Hanganji Ndautu. Jiapa-kai ka pa-lumburu wànya hakàla timbi, pa-daingu kaliku biana.

²Tuna nuduka hi dapanii ba jia ndàbaha da panggawi-na, “Tamu Umbu, nahàmu làti ka mahimbu-nggau haàtu ana karia ka na-ndàdiku lai nyumu ka nalumu-nggau umbu. Napa na-mangguli la lihimu ka peku mamitu-mu Tamu Umbu,” wàdanya.

³Ka himbu-danyaka haàtu ana karia ma-manandangu la nggubulu Ihirailu. Dahunggu haàtu ana karia ma-tamungu Ambihàku la Hunimu, kanjupu manandangu-ya. Dalua ngàndiya la hanganji, hàla ka tutu-nanyaka na hanganji hi nalumu-nya paraïna nu na ana karia. Na nyuna nda na-kanoma-aya paraïna hanganji.

⁴

⁵Ba nameti-ka i Àpuhalomu, jiaya i Andunia-ka na ma-maaya la anana i Ndautu. Na inana jiaya i Hanggitu. Ma-paràka mininguya i Andunia. Ndedima na-kanyàngi-nya amana jàka nawunda manjala. Ba rinjungu halawàla-mananya panjadi hanganji pandengingu-nanyaka kareta pabera nduma wikina dàngu tanatara malii la njara dàngu tau lima kambulu ma-karaha-ya.

⁶

⁷Hi nalua pa-pahama dànja i Yuàpu dàngu i Ratu Àpuyataru. Na inana i Yuàpu Haruya-ya na tamuna. Da-kahau etingu i Yuàpu dàngu i Àpuyataru la pandula-ndemaya na rinju etina i Andunia.

⁸Na nyuna i Ratu Handuku, i Mbanaya anana i Yuyanda, i Wunangu Natàngu, i Himei, i Rei dàngu da-karaha wikina i Ndautu nda daangu-anya i Andunia.

⁹La hau na lodu la hau pangia ma-tamungu Watu Ularu la lihi mata wai Eni-Ronggilu, nawotu hunggu maraku mbimbi, hapi mini dàngu ana hapi mambo - mboka i Andunia. Da anana mini hawiangu i Hanganji Ndautu dàngu da panggawi la uma hanganji welingu la kabihu Yahunda mbàda dunda-nanjaka paraïna i Andunia la mbabu kameti maraku nuna.

¹⁰Tàka i Halomu, na erina, dàngu i Wunangu Natàngu dàngu i Mbanaya dàngu da-karaha wikina i Hanganji Ndautu nda nadunda-anja.

¹¹Lua-naka i Wunangu Natàngu lai Mbàtihemba, inana i Halomu, hi napanii-nya, “Ndau rongua Tamu Ràmbu, ba mbàda wotu-naka wikina pa-hanganji i Andunia, anana mini i Hanggitu, bundu ndapi-nanya i Hanganji Ndautu na rukuna nuna?

¹²Jàkau mbuhangu pa-pamara-ya i Halomu dàngu na wikimu Tamu Ràmbu, ku-paita-nggau ànda,

¹³lu lua pa-renggangu bàdi lai Hanganji Ndautu ka tuna yia bau panii-nya, ‘Ka nda mbàda harangu-amu lai nyungga Tamu Umbu ba i Halomu na ananggu mini napa na manjadi hanganji pahilu-kau nyumu? Ka nggikina nàhu hi jiaya i Andunia biai na manjadi hanganji?’ wàmu,” wànanya.

¹⁴Nahili panii i Natàngu, “Napa, ba talànga panii daa-munya i Hanganji Ndautu, kutama nyungga ka pa-kawàndi-ya na pambàda panii-mu nyumu Tamu Ràmbu,” wànanya.

¹⁵Ka lua-nanyaka i Mbàtihemba lai Hanganji Ndautu la kurungu-na. Kaweda halawàla-mana-nyaka na hanganji la rehi nu, tàka i Ambihàku, na ana karia welingu la Hunimu, lumu-nanya-padua na hanganji.

¹⁶Ba nahàla-ka pa-marubuku la hangga hanganji i Mbàtihemba, paàrangu-nanyaka na hanganji, “Ningu nggà - nggàra pa-karaimu?” wànanya.

¹⁷Nahema i Mbàtihemba, “Tamu Umbu ma-mangarangu, mbàda hara wa-munyaka na tamuna i MIRI, na Alamu, lai nyungga ba i Halomu na ananggu mini napa na manjadi hanganji hilukau nyumu Tamu Umbu.

¹⁸Tàka nàhu mbàda hanganji-yaka i Andunia, bundu nda pimunya nyumu Tamu Umbu na rukuna nuna.

¹⁹Mbàda wotu padangu-naka maraku mbimbi, hapi mini, dàngu ana hapi mambo - mboka i Andunia. Mbàda dunda-mbuna-njaka la mababu nuna da anamu mini dàngu i Ratu Àpuyataru dàngu i Yuàpu, na liku uru pabera-mu Tamu Umbu. Tàka i Halomu nda nadunda-anya.

²⁰Tamu Umbu ma-mangarangu, na rayatu nàhu nggubulu-na nedingu-na padua-ka wai liimu nyumu Tamu Umbu jàka nggamuya na manjadi hanganji hilukau nyumu Tamu Umbu.

²¹Jàka ndau wuangu-ya nu na wai liimu, la taliu metimu napa, jiangu-maka na-palua-nggama lima, nyungga dàngu na ananggu mini beri tau ma-kaleka-kama,” wànanya.

²²Ba talànga panii-na i Mbàtihemba, tàka-nanyaka la uma hanganji i Natàngu.

²³Ba panii-nyaka na hanganji rukuna nu na maina i Natàngu, luhu-nanyaka i Mbàtihemba hi natama i Natàngu hi na-marubuku la hangga hanganji.

²⁴Napanii i Natàngu, “Tamu Umbu ma-mangarangu, ka mbàda bobaru-munyaka ba i Andunia napa mahilu-kau panjadi hanganji?

²⁵La lodu nàhuma mbàda wotu padangu-naka maraku mbimbi, hapi mini dàngu ana hapi mambo - mboka. Mbàda dunda-nanjaka da anamu mini. Dàngumbu da ngora kanguhuru pabera-mu Tamu Umbu, dàngu i Ratu Àpuyataru. Mbabu-mada-nyaka nàhu dàngu nyuna ba dàngu pao - oinguda, ‘Oha-anaka i Hanganji Andunia!’ wàda.

²⁶Tàka nda nadunda-angga nyungga i Andunia. Nda nadunda-mbunja i Ratu Handuku dàngu i Mbanaya, hamanai i Halomu nda na dunda-mbunya.

²⁷Ka nyumu-maka ni Tamu Umbu ma-paràhangu pawunda ndàbaha nuda bundu nda panii-munja da panggawi-mu jàka nggamu mahilu-kau nyumu Tamu Umbu?” wànanya.

²⁸Ka panii-naka i Hanganji Ndautu, “Paaunya i Mbàtihemba,” wàna. Luhu-nanyaka Natàngu tàka hi na tama beli i Mbàtihemba la hangga hanganji.

²⁹Hi napanii i Tamu Umbu lai nyuna, “Deningu-mana ba mbàda pa-njanjingu-ngguka lai nyumu, parongu-na i MIRI, Ala Ihirailu, ba i Halomu na anamu mini na mahilu-ka napa panjadi hanganji. Ba tuna, nàhu ku-panjanjingu lai nyumu parongu-na i MIRI maluri, na mambàda pahàla-ka welingu la mbuu ndàba handànga-nggu, la lodu nàhuma ba ku-pahàra-nya na pa-njanjingu-nggu lai nyumu,” wànanya.

³⁰

³¹Ka marubuku-nanyaka la hangga hanganji i Mbàtihemba hi napanii, “Oha-amuka Tamu Umbu Hanganji lundu nu - nu!” wànanya.

³²Hàla, paràhangu-nanyaka i Hanganji Ndautu pa-paaunja i Handuku, i Natàngu dàngu i Mbanaya. Ba damaika,

³³panii-nanjaka na hanganji, “Paau ndàbanja da parawira-nggu, kai pa-kariangu palua lai Halomu na ananggu mini pawotu-ya la mbanggalu wikinggu, hàla kai karia-nya la mata wai la Nggihungu.

³⁴Lai nu, lupangu-ma da-katua-ya nyuna panjadi hanganji Ihirailu paraïda i Handuku dàngu i Natàngu. Hàlaka nu kai palingu taropitu dàngu kai pa-oingu, ‘Oha-anaka i Hanganji Halomu!’ wàmi.

³⁵Tunaka nu indàki beliya nàmu ka na-mandapu-nya na kanjàka pareta-nggu, ba jiaya nyunadu na pambàda pindinggu panjadi hanganji hiluka nyungga pa-pareta-ya na Ihirailu dàngu na Yahunda,” wànanja.

³⁶“Tu biana duna Tamu Umbu ma-mangarangu,” wàna ba nahema i Mbanaya, “màla àruki i MIRI, na Alamu Tamu Umbu, ka na-paundu-nya nuna na hupu liimu.

³⁷Hama tuna ba mbàda karia-nanggau nyumu i MIRI, màla àruki ka na-karia-mbunya i Halomu. Màla àruki i MIRI ka napamangunjuya na pareta-na, pa-làpahu-nya na pareta-mu nyumu Tamu Umbu,” wànanya.

³⁸Ka kamahi-danyaka pa-kaliti mbanggalu hanganji i Halomu, paraïda i Handuku, i Natàngu, i Mbanaya dàngu da karaha wikina na hanganji hi dandàki-ya la mata wai la Nggihungu.

³⁹Tunaka nu napiti-ya na kanai mina haitungu i Handuku na pambàda ngàndina welingu la Maü Terana i MIRI, hi na-katua wànya mina haitungu i Halomu. Ka palingu-danyaka na taropitu, dàngu mbuu ndàba da tau lai nu dapaya-aungu, “Oha-anaka i Hanganji Halomu!” wàda.

⁴⁰Tunaka nu ndàki beli-danyaka paraïda nyuda mbuu ndàbada ba wàngu paya-au - ya-auda dàngu pinida taleli, hi lupa natika pa-tandidu-ka àmangu na pinu tana paraï pambabu.

⁴¹Hinama-a dahàla pambabu i Andunia dàngu mbuu ndàba da ariyaa-na, ba darongu-ya nu na mambabu. Ba narongu lingu taropitu i Yuàpu, paàrangu-nanyaka, “Nggàra ulada nu la paraingu hi lupa tuna nu na mbabuna?” wàna.

⁴²Ndedi-mbupa nahàla pa-kareuku i Yuàpu, hi jia nàmu bianya i Yunatàngu, anana i Ratu Àpuyataru. “Tamakau naa,” wàna i Andunia. “Ba tau hàmukau nyumu, jiangu-ma ba pulu hàmuya na pangàndi-mu,” wànanya.

⁴³“Malangu-kimuka, nda tuna nua,” wàna na hemana i Yunatàngu. “Mbàda wotu-nanya panjadi hanganji i Halomu paraïna i Hanganji Ndautu!

⁴⁴Mbàda paràha-nanjaka i Handuku, i Natàngu, i Mbanaya dàngu da karaha wikina na hanganji pandàki-ya i Halomu. Mbàda wotu-danyaka la mbanggalu hanganji,

⁴⁵dàngu mbàda katua-danyaka la mata wai la Nggihungu paraïda i Handuku anguda i Natàngu. Tunaka nu tama-danyaka la paraingu wàngu paya-au - ya-auda dàngu mbabuda. Na-kanggupuku ndàba na paraingu. Nuna-duyaka na mbabu parongu ndàbami kawai.

⁴⁶Mbàda hanganji-yaka nàhu i Halomu.

⁴⁷Jiapa da parawira la pareta hanganji mbàda lua-daka papeka-nya pa-ohangu i Hanganji Ndautu, ‘Màla àruki na Alamu Tamu Umbu ka na-parihi-ya na kawulangu-na i Halomu welingu lai nyumu; màla àruki na pareta-na i Halomu ka narihi mangunju welingu la pareta-mu nyumu Tamu Umbu,’ wàdanya. Tunaka nu patika-nanyaka i Hanganji Ndautu la ngia pa-katuda-na pa-marubuku-nya i Ala,

⁴⁸hi na-hamayangu, ‘Pawotungu-kau MIRI, Ala palumu-na na banjaru Ihirailu. Ba mbàda wotu-ngguka la lodu nàhu haàtu welingu la wàla wuanggu panjadi hanganji hiluka nyungga. Dàngu ba mbàda pahia-munggaka paluri ka kuita mataya!’ ” wàna.

⁴⁹Mangàdatu-danyaka da ariyaa-na i Andunia, lupa da-hadangu hi dalaku maràngga à-ànda-mada nimbihu-da.

⁵⁰Ka kanjupu mangàdatu-yaka i Andunia hanggangu lai Halomu, hi napalai la Maü Terana i MIRI hi nayàpa-ha da hupu ngia pawotu maraku[1] lai nu.

⁵¹Ka ninguka tau malua papanii-nya i Hanganji Halomu, ba kanjupu mangàdatu-ya i Andunia hanggangu lai Halomu, hi mbàda luana la ngia pawotu maraku dàngu nayàpa-ha da hupuna nuna na ngia pawotu maraku dàngu panii-na, “Nda jia yilangu-anggu welingu lai yiahu jàka ndedi na-harangu i Halomu lai nyungga ba nda na-pameti-aka napa,” wàna.

⁵²Nahema i Halomu, “Jàka nahàmu-madu na hurina, nda paana huku-anya napa; na nyuna jàka nawunda ma-akatu, jiangu-ma napa nameti,” wàna.

⁵³Ka palewa-naka tau na hanganji palua papiti-ya i Andunia welingu la ngia pawotu maraku nuna. Ka lua-nanyaka i Andunia la hangga hanganji hi na-marabuku la hanggana. Tunaka nu napanii na hanganji, “Beliwa!” wànanya.