Read Kambera 1 HANGANJI 10 Bible Online

1 HANGANJI 10 - Kambera bible

1 HANGANJI 10

¹Mbàda rongu-naka na hanganji kawini la Heimba rukuna na kawulangu-na i Halomu. Ba tuna mai-nanyaka la Yeruhali ka na-manginjiru wànya pa-àrangu makalu - lutu i Halomu.

²Dira danguha da karia-na da mandàki-ya ba namai dàngu ota mambotu pa-pabukungu mbii kati, watu - watu kalilangu dàngu dira danguha da àmahu rara. Ba na-pahàmburu dànyaka i Halomu patàka-nanyaka nyuna paraïna hanganji kawini mbuu ndàba da paàrangu da pa-kanandi-na.

³Mbuu ndàbada nuda da paàrangu nahema ndàba-maha paraïna i Halomu nda ana haua malalu haruiya lai nyuna.

⁴Hakahii wiki-mana-nyaka paraïna hanganji kawini ba kanjupu manggàna-ya i Halomu. Naita-ya na uma hanganji pa-pahada-na i Halomu,

⁵na huri ràmada da panggawi la uma hanganji, dàngu da paki ndihida, da umada. Naita-ha da pangangu pa-ngunungu da pa-payemangu, na paloku-danya na mbabu paraï da ma-paloku, dàngu da kameti maraku pawotu-na i Halomu la Umana i MIRI. Mbuu ndàbada nuda jiaha da pa-hangàtaru-na na hanganji kawini tana Heimba hi dira maratangu-ya.

⁶Ka panii-nanyaka lai Hanganji Halomu, “Mbuu ndàbana na parongu-nggu la tananggu na rukumu nyumu dàngu na pingumu nyumu umbu, langatàka ma-deningu-maya!

⁷Nda kuwai-aya làti la mangilu-na, na nyuna ba kumaika dàngu ba kuita mata ndàba-haka, hina-duka hi kupii hàmunya. Làngatàka mbuu ndàbada nuda da parongu-nggu ndedi paradua-mbuna welingu la paita-nggu nàhu. Na ma-lohangu-ma duna na pingumu dàngu na wulumu umbu dira rihi-mayapa duna welingu la parongu-nggu.

⁸Ai, kanjupu pa-ohangu-ha da papaha-mu umbu! Ai, kanjupu pa-kanyurungu-ha da panggawi da malihi mànunggau hi peku rongu-daha mbuu ndàba da papekangu manggàna welingu lai nyumu wiki, umbu!

⁹Pa-wotungu-ya i MIRI, na Alamu! Ba nawotu-kau pa-hanganji la Ihirailu, paloha-nanyaka i MIRI ba dira mbuha-nanggau nyumu umbu. Nda ana njàpu-ana na mbuha-nanya na Ihirailu; tuna-nuduka hi nawotu-kau nyumu pa-hanganji-nja nyuda ka peku paundu-munya na uku dàngu na ma-deningu,” wànanya.

¹⁰Tunaka nu huharu-nanjaka lai Halomu paraïna na hanganji kawini welingu la Heimba da pawua juangu pangàndi-na, nu ba 4.000 rihi kiluda da àmahu rara dàngu dira danguha da watu kalilangu dàngu mbii kati. Nda nahili ngala padangu-apa mbii kati i Halomu hama tuna na pawua-nanya paraïna na hanganji kawini welingu la Hemba. (

¹¹Da kapalu-na i Hiràmu da mangàndi-nya àmahu rara welingu la Opiru i Halomu, dangàndi padangu-mbu watu kalilangu dàngu ai nitu.

¹²Nuda da ai jiaha da pa-pandoi wàna oka punduku la Umana i MIRI dàngu la uma hanganji-na i Halomu; dàngumbu pa-pandoi wàngu jungga, dàngu jungga lamba ndumada da ba hapajia-ha da matanggu ludu. Nuda da ai, ai nitu mahàmu halawàla-maha da patama ngàndi la Ihirailu; nda nahili itangu-apa ai hàmu tungu nu na tau.)

¹³Nawua-nya na hanganji kawini welingu la Heimba paraïna i Halomu mbuu ndàba da pakarai-na, la pera mbuu ndàba pawua juangu da pakàli wuana i Halomu. Tunaka nu beli-danyaka la Heimba na hanganji kawini dàngu mbuu ndàba da karia-na.

¹⁴Nimbihu ndaungu na-ngalangu àmahu rara i Halomu tika pa 23.000 kilu,

¹⁵ndedi padiha-aha da utungu pangala-na welingu la danggangu-na, dàngu da hilu katiku welingu la tau danggangu, la hanganji - hanganji Arapu dàngu da nggumbunuru Ihirailu.

¹⁶Na-pandoi 200 temingu bokulu i Halomu welingu la àmahu rara papàha. Da àmahu rara da pawàngu nduma nimbihu-da nuda da temingu[11] rakangu pihu mbua kiluda.

¹⁷Na-pandoi-mbu 300 temingu marihi kudu. Da àmahu rara da pawàngu nduma nimbihu-da nuda da temingu kudu ràkangu dàmbu kiluda, mbuu ndàba da àmahu rara papàha-ha. Mbuu ndàbada nuda da temingu natuha la rowa ma-tamungu Rowa Omangu Limbanongu.[12]

¹⁸Na-pandoi-mbu hau kanjàka pareta ma-bokulu pa-tapalungu nggedingu dàngu pa-pamanandangu wàngu àmahu rara ihi mbàngina.

¹⁹Nuna na kanjàka ningu limana, tàka la hapapa - hapapa-na ningu kahala hada hingada. La kajia-na na kanjàka ningu kahala hada katiku hapi. Nuna na kanjàka ningumbu wua panongu-na ba nomuda.

²⁰La hupu kalai dàngu la hupu kawana-da da wua panongu nimbihu-da ningu kahala hada hingada — hakambulu dàmbuda nggubulu-da. Ndedi ninguma kanjàka pareta tungu nu jiapa ka langgi pareta hanganji-yakadu.

²¹Mbuu ndàba da paunu wàna i Halomu pa-pandoi welingu la àmahu raraha. Dàngu mbuu ndàba da kanaingu la Rowa Omangu Limbanongu-mbu pa-pandoi welingu la àmahu rara ihi mbàngi-naha. Nda ningua kanaingu àmahu bara, nadu la ndaungu-na i Halomu nda da-pawilingu-a da àmahu bara.

²²Ningu kapalu bokulu danguna i Halomu da ma-palirungu la tehiku lerangu karia-da da kapalu-na i Hiràmu. Nimbihu tailu mbua ndaungu da-handakangu pabeli-ha nuda da kapalu ba dangàndi àmahu rara, àmahu bara, nggedingu, buti dàngu manu maràku.

²³Welingu la mbuu ndàba hanganji la pinu tana jiaya i Halomu-maka na marihi halawàla pawulu dàngu pa-manggàna.

²⁴Mbuu ndàba na tau la pinu tana na-pamukarungu pamai lai Halomu ka ronguha da pa-pekangu manggàna pawua-nanya nyuna paraïna i Ala.

²⁵Dàngu nimbihu-na na tau mamai dawua-manya pawua juangu i Halomu. Dangàndi-nya kanaingu àmahu bara, àmahu rara, paki, pambeni wàngu, mbii kati, njara dàngu mbanggalu; tuna numa hau ndau - hau ndaungu.

²⁶Na-pamàtungu kanguhuru pabera i Halomu ba jiaha da 1.400 kareta pabera, dàngu 12.000 tanatara li la njara. Hawiangu welingu nuda natuha la Yeruhali tàka da rihida la parai - paraingu hawiangu-naha.

²⁷La rehi pareta-na i Halomu, da àmahu bara la Yeruhali hama ngga - nggàra pakàli ndàmangu-maaha hama tuna da watu, tàka da kajiu Limbanongu nda pataü-aha hama tuna pingi kapilitu.

²⁸La pa-mbapangu-da da wihi danggangu-na na hanganji, da njara patama ngàndi welingu la Mehiru dàngu la Kilikia-ha,

²⁹tàka da kareta pabera patama ngàndi welingu la Mehiru-ha, wili heu njara 150 àmahu bara, tàka wili hau kareta pabera 600 àmahu bara. Hàlaka nu la pa-mbapangu-da nuda da wihi danggangu hi hili dangga belinja da njara dàngu da kareta la hanganji - hanganji Heti dàngu hanganji - hanganji Hiria.