Read Kambera 1 HANGANJI 11 Bible Online

1 HANGANJI 11 - Kambera bible

1 HANGANJI 11

¹Dadangu da kawini hangàdangu pambuha-na i Halomu. Hinggilu-na na ana hanganji Mehiru, na-kanoma-mbu kawini Heti, Muapu, Amungu, Endumu dàngu Hindungu i Halomu.

²Mbàda wuangu-naka hupu liina i MIRI ka àmbu nalalei-mangoma pa-haürungu-du dàngu ba - banjaru nuda na tau Ihirailu, nadu napa nyuda da-pawiti-nya na tau Ihirailu la pa-lumungu kamàla - kamàla ala. Jiapa-kai ba tuna, kanoma bia-nanya kawini - kawini hangàdangu i Halomu.

³Pihu ngahuda da ana maràmba da pa-kanoma-na i Halomu, dàngu ningumbu kala wihina ba tailu ngahuda. Jiaha da papaha-manaka da ma-pawiti-nya i Halomu la pa-dunjaku-nya i Ala,

⁴hi lupa la rehi kaweda-na dapaulu-ya ba da-pamanda-nya pa-marubukungu kamàla - kamàla ala. I Ndautu, na amana i Halomu, na-tuturu duna lai MIRI, na Alana, tàka i Halomu nda hama tuana na amana.

⁵I Halomu nalumu-nya na Ahitoritu, na marapu kawini banjaru Hindungu, dàngu na Moluku-mbu na marapu pa-labungu eti na palumu banjaru Amungu.

⁶Tuna nuduka ba nanjala lai MIRI i Halomu. I Ndautu, na amana i Halomu na-panamatu weli etingu lai MIRI, tàka i Halomu nda tuna nua.

⁷La pinu palindi la tuba pahunga lodu welingu la Yeruhali mbàda pahadangu-naka ngia pa-lumungu ndumana na Kamuhu, na marapu Muapu, dàngu ndumana na Moluku na marapu banjaru Amungu — pa-kadua-da, marapu pa-labungu etiha.

⁸Na-pahadangu-mbu ngia patunu-da dupa da papaha tau hangàdangu-na i Halomu dàngu ngia pawotu-da maraku nduma marapu - marapu wikida.

⁹Mbàda pandua wundangu-naka i MIRI, na Ala Ihirailu, pa-pawuwangu wikina lai Halomu dàngu napanii-nya ka àmbu na-lumungu kamàla - kamàla ala, ba tuna nda na-karadaku-a i Halomu lai MIRI. Hama huka dunjaku bia-nanya i MIRI, hi lupa nahàngga-nya paraïna i MIRI.

¹⁰

¹¹Napanii i MIRI, “Rukuna ba harawuku-mu papangga-ya na pa-njanjingu-mu dàngu Nyungga, dàngu ba ndau karadaku-nja da hupu liinggu, ka wànjiru-nggunyaka napa na pa-hanganji welingu lai nyumu, hi kuwua-ya la haàtu panggawi-mu.

¹²Jiapa-kai ba tuna, lumuna na amamu i Ndautu, nda jia wunda-anggunya nuna la ngala lurimu. La rehi pareta-na na anamu minipa hina hi kuwunda-ya nuna.

¹³Na nyuna nda ku-wànjiru ndàba-aya nggubulu-na napa na pa-hanganji welingu lai nyuna. Nadu, lumuna na atanggu i Ndautu, dàngu lumuna na Yeruhali, na pambàda tunggu paraingu-nggu, napa ku-parihi-nya hau kabihu na anamu mini,” wànanya.

¹⁴Ka pawiti-nanyaka i Handàtu, na haàtu wàla wua hanganji Endumu paraïna i MIRI, la pamuhu-nya i Halomu.

¹⁵Mandai ba ndedipa nu, ba na-parajaku-yaka na Endumu paraïna i Ndautu, lua-nanyaka patani-nja da tau mameti-na la Endumu i Yuàpu, na ngora kanguhuru pabera-na i Ndautu. Nomu mbua wulana mandaina ba na-ndàdiku la Endumu dàngu da tauna. Tàka la rehi nu nyuda, da-pameti ndàbaha da tau mini lai nu.

¹⁶

¹⁷Na nyuna i Handàtu na ma-anakeda-iyapa la rehi nu, napalai-ya la Mehiru karia-da da manda pirada da tau Endumu, atana na amana.

¹⁸Da-hadangu-ha welingu la Mindiangu, hi dalaku la Paràngu, lai nu ninja da manda pirada da tau hawiangu da ma-pambulu dànja nyuda, hi da-kariangu palaku la Mehiru la hanganji Mehiru. Nuna na hanganji nawua-nya uma dàngu tana ka na-ngiangu i Handàtu dàngu pa-patoma wàna na lurina.

¹⁹Ka kandua hàmu eti hanganji-yaka i Handàtu hi lupa nawua-nya i Handàtu na balu wikina, ka natuya papaha-na, nu na erina i Tàhapeni na maràmba kawini.

²⁰Tunaka nu pa-anangu-nanyaka anakeda mini na papaha-na i Handàtu na pa-patamu-na Ngginumbàtu. Nuna na anakeda pa-matua wiki-mananya paraïna maràmba kawini dàngu na-ndàdiku la uma hanganji anguda da ana hanganji mini.

²¹Ba narongu-ka i Handàtu ba mbàda meti-naka i Ndautu, dàngu ba mbàda meti-mbunaka i Yuàpu na liku uru kanguhuru pabera Ihirailu, panii-naka i Handàtu la hanganji, “Puli-nggawa làti ka kubeli la tana paraingu-nggu,” wàna.

²²“Ka nggikina?” wàna ba na-paàrangu na hanganji. “Ndiadu ningu manjaka-nggau yiahu hiu mbuhangu pabeli la tana paraingu-mu?” wànanya. “Nda nggàra-a manjaka-ngga,” wàna ba nahema i Handàtu, “na nyuna màta biangga làti ka kulaku,” wàna. Ka beli-nanyaka la tana paraingu-na.[13]

²³Na-pawiti-mbunya i Rehungu, anana i Eliyanda, paraïna i MIRI ka namuhu-nya i Halomu. I Rehungu ata mapalai welingu la miri-nanya nu i Hanganji Handandehiru welingu la Homba.

²⁴Handàka mbàda pakàku-nanyaka i Handandehiru paraïna i Ndautu dàngu na-pameti-ha da anguna i Handandehiru welingu la Hiria. La rehi nu palai-nanyaka i Rehungu welingu lai Handandehiru, hi na-pauhingu tau hi nanjadi ngora kalibaru tau rambangu. Nyuna dàngu na anana dalaku pa-ndàdiku la Ndamàhiku. Lai nu dawotu-ya pa-hanganji Hiria paraï da tauna.

²⁵Hama tuna i Handàtu, tuna numbu i Hanganji Rehungu ba namuhu-nya na Ihirailu la ngala lurina i Halomu dàngu ba na-pakuwaru la tana nuna.

²⁶Na tau hawiangu na ma-patula ngganggangu la pa-tumbaru-ya i Halomu jiaya na haàtu panggawi-na na ma-tamungu Yerumbiamu, anana i Nembàtu welingu la Harenda la Epuraïmu. Na inana kawini meti lei-yaka, na ma-tamungu Harua.

²⁷Tuna nu na ruku patula ngganggangu-na i Yerumbiamu. Ba hungguru-nyaka na tana la mbara luru welingu la Umana i MIRI, dàngu ba pahàmu-ha da kangeli paraingu,

²⁸naràma-mbu lai nu i Yerumbiamu. Ba naita-yaka paraïna i Halomu ba na-ànjaru dàngu ba na-maràna i Yerumbiamu, wua-nanyaka wai ngaba pa-hamata-ya na ràma lerangu la ngaba tana kabihu Manahi dàngu Epuraïmu.

²⁹La hau na lodu ba talànga luhuna welingu la Yeruhali i Yerumbiamu, hàmburu-nanyaka la ànda la padua maràda paraïna i Wunangu Ahia welingu la Hilu na mapaki kalembi malai na mabidi.

³⁰Kalàba-nanyaka na kalembi malaina i Ahia, dàngu hi nahi - hiraya lundu hakambulu dua ngiana.

³¹Tunaka nu panii-nanyaka i Yerumbiamu, “Pitiwa hakambulu ngia nduma wikimu nyumu. Nadu i MIRI, na Ala Ihirailu, napanii tuna yia lai nyumu, ‘Napa ku-wànjiru-ya yiana na pa-hanganji welingu lai Halomu, hi kuwua-nggau nyumu hakambulu kabihu.

³²Hau kabihu napa ma-padaingu lai Halomu, lumuna na atanggu i Ndautu, dàngu lumuna na Yeruhali na pambàda lehanggu welingu la nggubulu Ihirailu ka parai-nggu Nyunggaya.

³³Hi kuwunda-ya nuna napa, rukuna ba mbàda dunjaku-nanggaka Nyungga i Halomu dàngu ba mbàda lumungu-naka marapu - marapu, nu: na Ahitoritu, na marapu kawini welingu la Hindungu; na Kamuhu, na marapu Muapu; dàngu na Milikumu, na marapu Amungu. I Halomu nda nanunju-aya na pambuha-nggu. Nda nahama-anya i Ndautu na amana na ma-karadaku-ngga Nyungga dàngu na pa-namatu-nja da hupu liinggu.

³⁴Na nyuna ba tuna nda nggubulu-ana na pa-hanganji na papiti-nggu welingu lai nyuna; napa ku-pahia-nya ka na-pareta la ngala lurina. Nu hi tunggunya nu lumuna na atanggu i Ndautu, na pambàda lehanggu dàngu na mambàda kiku-mbunja da ukunggu dàngu na ma-karadaku-nja da hupu liinggu.

³⁵Napa kupiti-ya yiana na pa-hanganji welingu la anana i Halomu hi kuwua-nggauha nyumu da hakambulu kabihu.

³⁶Tàka ba tuna napa kumàta-nya na hau kabihu lai nyuna ka ningu mànu haàtu welingu la ana umbuku-na na atanggu i Ndautu na ma-pareta ndumanggu Nyungga la Yeruhali, na paraingu pambàda lehanggu ka ngia pa-lumungu-ya lai Nyungga.

³⁷Tàka nyumu dumu, Yerumbiamu, napa ku-panjadi-kau hanganji Ihirailu dàngu ku-pahia-nggau pa-pareta la nggubulu-na na tana pawuku-mu.

³⁸Jàkau hamanya na atanggu i Ndautu, la pa-karadaku weli etingu lai Nyungga dàngu la paluri nunjuha da ukunggu, dàngu hiu liya na etinggu wàngu wunda ndàba-muha da papanii-nggunggau, ku-karia mànunggau napa. Napa ku-panjadi-kau hanganji Ihirailu. Napa ku-pamàndu-nya ba danjadi hanganji Ihirailu, da ana umbuku-mu hilukau nyumu, hama tuna na pambàda wunda-nggunya i Ndautu.

³⁹Rukuna ba nanjala i Halomu, napa kuhuku-nja da ana umbuku-na i Ndautu, tàka nda lundu nu - nua,’ ” wàna.

⁴⁰Ba narongu-yaka nuna i Halomu, himbu-nanyaka wihuna pa-pameti-ya i Yerumbiamu, tàka napalai i Yerumbiamu lai Hanganji Hihàku la Mehiru, hi na-ndàdiku lai nu lundu metina i Halomu.

⁴¹Hawiangu da rukuna i Halomu, mbuu ndàba da pawunda-na dàngu da pinguna, pambàda tulihu-haka la mbuku Rukuna i Halomu.

⁴²Patu kambulu ndaungu mandaina i Halomu ba na-pareta-ya na Ihirailu nggubulu-na.

⁴³Tunaka nu meti-nanyaka hi taninya la paraingu-na i Ndautu. Na anana na ma-tamungu Rehambiamu, nanjadi hanganji hiluya nyuna.